ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނުގެ ވޯޓުލުން ދެންމެއަކު ފަށައިފި އެވެ.
ކ. ގުރައިދޫގެ އިތުރުން އެ އަތޮޅު ގުޅި އާއި މާފުށި ހިމެނޭ އެ ދާއިރާގެ ތިން ރަށުގެ އިތުރުން މާލޭގައި ވެސް މިއަދު ވޯޓުލުން ކުރިއަށްދާނެ އެވެ.
މިއަދުގެ އިންތިހާބުގައި ވާދަ ކުރައްވަނީ ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ އިބްރާހިމް ޝާޒް އާއި އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ހުސެއިން ރިޒާ އާދަމް އާއި މޯލްޑިވްސް ނެޝަނަލް ޕާޓީގެ އަލީ އަރީފެވެ.
ގުރައިދޫގައި ވޯޓުލުމަށް ކިޔޫގައި ތިބި މީހުންގެ އައިޑީ ކާޑު، އިލެކްޝަންސް ކޮމިޝަންގެ އޮފިޝަލް ބަލަނީ. -- ފޮޓޯ: އަހުމަދު ރަޝީދު (ދޮންކޮޅު)
މިއަދު ބާއްވާ އިންތިހާބުގައި 3423 މީހުންނަށް ވޯޓުލުމުގެ ހައްގު ލިބެ އެވެ. އެއީ ގުރައިދޫއިން 1394 މީހުންނާއި މާފުށިން 1366 މީހުންނާއި ގުޅިން 663 މީހުންނެވެ.
އިންތިހާބުގެ ވޯޓުލުން ކުރިއަށްދާނީ ހަވީރު 4:00 އާ ހަމައަށެވެ. އެއަށްފަހު ވޯޓު ގުނަން ފަށައި މިރޭ ނަތީޖާއެއް ލިބޭނެ އެވެ. ހުރިހާ ވޯޓު ފޮޓެއްގައި ވެސް ގަޑިއަށް ވޯޓުލާން ފެށުނެވެ.
ގުރައިދޫ ދާއިރާގެ ބައި އިލެކްޝަނެއް ބާއްވަންޖެހުނީ އެ ދާއިރާގެ ގޮނޑި ފުރުއްވަމުން ގެންދެވި އިބްރާހިމް ރިޒާ، 55، ނިޔާވުމުންނެވެ. އޭނާ ނިޔާވީ ކެންސަރަށް ފަރުވާ ކުރަމުންދާތާ ގިނަ ދުވަސްތަކަކަށްފަހެވެ.
ރިޔާސީ އިންތިހާބު ސެޕްޓެމްބަރު 9، ގައި ބާއްވަން 147 އަށް ކައިރިވެފައި އޮއްވާ މިއަދު ކުރިއަށްދާ އިންތިހާބުން މޮޅުވުން އިދިކޮޅަށް އަދި ސަރުކާރަށް ވެސް މުހިންމެވެ.
ވޯޓު މަރުކަޒުތައް
މާލެ: އިއްޒުއްދީން ސްކޫލް
މާފުށި: މާފުށީ ސްކޫލް
ގުރައިދޫ
- 1 ނަންބަރު ފޮށި: ކައުންސިލް އިދާރާ،
- 2 ނަންބަރު ފޮށި: ޔޫތު ސެންޓަރު
ގުޅި: ގުޅީ ސްކޫލް
