ޕެރިސް (އޭޕްރީލް 15) - މިދިޔަ ސީޒަނުގައި ފްރާންސްގެ ނީސް އަށް ކޯޗުކޮށްދިންއިރު، މިހާރު ޕީއެސްޖީއާ ހަވާލުވެހުރި ކޯޗު ކްރިސްޓޮފް ގަލްޓިއޭ ކުރި އީމެއިލެއް ކަމަށް ބުނާ މެއިލެއް ލީކުވެ، އޭގައި ނަސްލީ ތަފާތުކުރުމަށް ބާރު ލިބޭ ގޮތަށް ދައްކާފައިވާ ވާހަަކަތަކެއްގެ މައްސަލަ ހޫނުވެއްޖެ އެވެ.
ނީސްގެ ވެރިންނަށް ގަލްޓިއޭ ފޮނުވި ކަމަށް ބުނާ އީމެއިލްގައި އޭނާ ބުނެފައިވާ ގޮތުގައި އެ ކްލަބްގެ ސްކޮޑުގައި ކަޅު ނަސްލުގެ ކުޅުންތެރިންނާއި މުސްލިމް ކުޅުންތެރިން ގިނަ ކަމަށް ބުނެ، ވަނީ ކަންބޮޑުވުން ފާޅުކޮށްފަ އެވެ.
މިދިޔަ ސީޒަނުގައި ނީސް އަށް ކޯޗުކޮށްދިން ގަލްޓިއޭގެ މި މެއިލްގެ މައްސަލަ، ނީސްގެ ޕްރޮސެކިއުޝަން އޮފީހުން ވަނީ ތަހުގީގުކުރަން ފަށައިފަ އެވެ. މިކަން ތަހުގީގުކުރަމުން އަންނަ ފަރާތްތަކުން އަންނަނީ އެކަން ކުރިއަށްދާ މުއްދަތުގައި ގަލްޓިއޭ އަށް ޕީއެސްޖީގެ ކޯޗުގެ ޒިންމާއާ ހަވާލުވެ ނުހުރެވޭނެ ކަމަށް ބުނެ ވެސް ވާހަކަ ދައްކަމުންނެވެ.
ކުރެވިފައިވާ މި ތުހުމަތުތަކަށް ގަލްޓިއޭ ވަނީ ރައްދުދީފަ އެވެ.
"އަހަރެންގެ އަބުރު ކަތިލަން މަސައްކަތްކުރާ މި މީހުންނާ މެދު އަހަރެން ގާނޫނީ ފިޔަވަޅު އެޅުމުގެ މަސައްކަތް ފަށައިފިން. އަހަންނަށް މި ވަގުތަށް އޮތް ހިތްހަމަޖެހުމަކީ މި ވަގުތު މީގެ ތަހުގީގެއް ކުރިއަށްދިއުން،" ފްރާންސްގެ ކްލަބްތަކުގައި ކާމިޔާބު މަސައްކަތްތަކެއް ކޮށްފައިވާ ކޯޗު ގަލްޓިއޭ ބުންޏެވެ.
ޕީއެސްޖީގެ ސަޕޯޓަރުންގެ ކްލަބުން ނެރުނު ބަޔާނުގައި ބުނެފައިވަނީ މައްސަލައިގެ ތަހުގީގު ނިމިގެންދާއިރު، ހަގީގަތް ހާމަވެގެންދާނެ ކަމަށާއި އުންމީދަކީ ގަލްޓިއޭގެ މައްޗަށް ކޮށްފައިވާ ތުހުމަތުތަކުން އޭނާ ސަލާމަތްވުން ކަމަށެވެ.
ގަލްޓިއޭގެ ކޯޗުކަމުގައި، ފްރާންސްގެ ކްލަބް، ލިލް އިން ފްރެންޗް ލީގުގެ ޗެމްޕިއަންކަން ހޯދިއިރު، އެ ޓީމަށް ކުޅުނު ތުރުކީގެ މުސްލިމް ކުޅުންތެރިޔާ، ބުރަކް ޔިލްމާޒް ބުނެފައިވަނީ ގަލްޓިއޭ އަކީ ދީނީ ގޮތުންނާއި އެހެނިހެން ގޮތަކުން ވެސް ނަސްލީ ތަފާތުކުރުމެެއް ގެންގުޅޭ ކޯޗެއް ނޫން ކަމަށެވެ.
