ޕާކިސްތާނު މީހަކު ރާއްޖެއަށް ފަސް ކިލޯ ޑްރަގް އެތެރެކުރަން އުޅެނިކޮށް ހިފަހައްޓައިފި

ވައިގެ މަގުން ޕާކިސްތާނުގެ ކަރާޗީން ރާއްޖެއަށް އައި ޕާކިސްތާނު މީހެއްގެ އަތުން ފަސް ކިލޯއާ ގާތްކުރާ އަދަދުގެ މަސްތުވާތަކެތި އަތުލައިގެންފި އެވެ.

ކަސްޓަމްސް އިން ބުނީ އިއްޔެ ރާއްޖެ އައިސްގެން އުޅެނިކޮށް ޝައްކު ކުރެވިގެން ސުވާލުކޮށް ބަލައި ފާސްކޮށްފައިވަނީ ޕާކިސްތާނުގެ 53 އަހަރުގެ ފިރިހެނެއް ކަމަށެވެ.

އޭނާގެ އަތުން ހޯދުނު ތަކެތި ފުރަތަމަ މަރުހަލާގައި ތަހުލީލުކޮށްފައިވާ އިރު އެ ތަކެތި މަސްތުވާތަކެތީގެ ބާވަތެއް ކަމުގައިވާ ހެރޮއިނަށް ޕޮޒިޓިވް ވެފައިވާ ކަމަށް ކަސްޓަމްސް އިން ބުންޏެވެ.

އެ ތަކެތީގެ ބަރުދަން 4.98 ކިލޯއަށް އަރާއިރު، އެ ތަކެތީގެ މަގުމަތީ އަގު ހަ މިލިއަން ރުފިޔާއަށް ވުރެ މަތިވާނެ ކަމަށް ވެސް ކަސްޓަމްސް އިން ބުންޏެވެ.