މާޒިޔާ ސްޕޯޓްސް އެންޑް ރެކްރިއޭޝަނާއި ނިއު ރޭޑިއަންޓް ސްޕޯޓްސް ކްލަބަށް ކުރިން ކުޅުނު މޫސާ ޔާމީން (ޔާމްބެ) ކުރިއަށް އޮތް ސީޒަނުގައި ވިކްޓަރީ ސްޕޯޓްސް ކްލަބަށް ދެ ވަނަ ޑިވިޝަނުގައި ކުޅެން ސޮއިކޮށްފި އެވެ.
ރާއްޖޭގެ ފުޓްބޯޅައިގެ ގަދަ ދެ ބާރު ކަމަށްވާ ވިކްޓަރީ އާއި ނިއު އިން ދެ ވަނަ ޑިވިޝަނަށް މި ފަހަރު ދުރާލާ ތައްޔާރުވުމުގެ ގޮތުން، ވަރުގަދަ ސްކޮޑެއް އެކުލަވާލުމުގެ މަސައްކަތް ކުރަމުން އަންނައިރު، ދެ ޓީމުން އަންނަނީ ފުރަތަމަ ޑިވިޝަނުގައި ގިނަ އަހަރުތަކެއް ކުޅެފައިވާ ކުޅުންތެރިންތަކެއްގެ ސޮއި ހޯދަމުންނެވެ.
ވިކްޓަރީން ރޭ ސޮއިކުރި ޔާމްބެ، ފުރަތަމަ ޑިވިޝަނަށް ތައާރަފްވީ އުފަން ރަށަށް ނިސްބަތްވާ ތޮއްޑޫ ޓީމުންނެވެ. ތޮއްޑޫ ޓީމާ އެކު ފުރަތަމަ ޑިވިޝަނަށް ތައާރަފްވި ޔާމްބެ އޭގެ ފަހުން ފެނުނީ އޯލް ޔޫތު ލިންކްއޭޖް (އޭވައިއެލް) އިންނެވެ.
އޭވައިއެލް ޓީމުގައި ޔާމްބެ ދެއްކި މޮޅު ކުޅުމުގެ ސަބަބުން 2013 ވަނަ އަހަރު ނިއު ރޭޑިއަންޓް ސްޕޯޓްސް ކްލަބުން އޭނާ އަށް ފުރުސަތު ލިބުނެވެ. ނިއު އިން އެ ސީޒަނުގައި ޔާމްބެ ބޭނުންކުރި ކޮންމެ މެޗެއްގައި މޮޅު ކުޅުމެއް ދެއްކި އެވެ.
މިދިޔަ ސީޒަނުގައި މާޒިޔާ ކުޅުނު މެޗެއްގެ ތެރެއިން ލަނޑު ޖެހުމަށް ފަހު ޔާމްބެ (ވ) އާއި ސްޓެވާޓް އުފާފާޅުކުރަނީ،
ނިއު ދޫކޮށް 2014 ވަނަ އަހަރު މާޒިޔާ އަށް ބަދަލުވެ، ވޭތުވެދިޔަ އަށް ވަރަކަށް އަހަރު އޭނާ ކުޅުނީ އެ ޓީމުގެ ފެހި ޖޯޒީގަ އެވެ. މާޒިޔާ އަށް ގިނަ މެޗުތަކެއް ކުޅެދިން ޔާމްބެ އަށް މިދިޔަ ސީޒަންތަކުގައި ޓީމުގައި ގިނަ މެޗުތަކެއް ނުކުޅެވުނު ސަބަބަކީ އަނިޔާގެ މައްސަލަތަކެވެ.
ޔާމްބެ ވަނީ 23 އަހަރުން ދަށުގެ ގައުމީ ޓީމާއި ސީނިއާ ގައުމީ ޓީމަށް ވެސް ކުޅެފަ އެވެ.
ވިކްޓަރީ ޓީމުގެ ކޯޗަކަށް ހަމަޖައްސާފައިވަނީ ސޮބާހު މުހައްމަދު އިބްރާހިމް (ސޮބާ) އެވެ. ޔާމްބެ އިތުރުން ވިކްޓަރީން ސޮއިކުރި ކުޅުންތެރިންނަށް ބަލާއިރު، ގައުމީ ޓީމުގެ ކެޕްޓަން، އަކުރަމް އަބްދުލް ގަނީ (އަކޫ) އާއި ވިކްޓަރީން ކެރިއަރު ފެށި މުހައްމަދު އުމެއިރު އާއި ހުސެއިން ނިޔާޒް މުހައްމަދު (ބޮކުރީ)ގެ ސޮއި ވެސް ހޯދައިފަ އެވެ.
ދެން، ވިކްޓަރީން ސޮއި ހޯދި ކުޅުންތެރިންނަށް ބަލާއިރު، ވެލެންސިއާ އަށް ކުޅެމުން އައި، ހުސެއިން ފައިސަލް (ފައިޓޯ)، މިދިޔަ ސީޒަނުގައި ނިއު ރޭޑިއަންޓް ސްޕޯޓްސް ކްލަބަށް ކުޅުނު އިބްރާހިމް ސިނާހު (ސިނާ) އާއި ފުރަތަމަ ޑިވިޝަނުގައި ގިނަ އަހަރުތަކެއްގައި ކުޅެފައިވާ ސައްދާމް ހުސެއިން އާއި މިދިޔަ ސީޒަނުގައި ޓީސީ ސްޕޯޓްސް ކްލަބްގެ ކެޕްޓަން، އަހުމަދު ރިލްވާން (ބެން) އެވެ.
ވިކްޓަރީން ވަނީ މިދިޔަ އަހަރު އެ ކްލަބުން ސަސްޕެންޝަނުން ސަލާމަތްވާން ކުރި މަސައްކަތުގައި ކުޅުންތެރިންނަށް ނުދީ ހުރި ހުރިހާ މުސާރައެއް ކުޅުންތެރިންނަށް ދީ ހަލާސްކޮށްފަ އެވެ. އަދި މި ސީޒަނަށް ވިކްޓަރީއާ ގުޅޭ ކުޅުންތެރިންނަށް ދޭން ޖެހޭ އެޑްވާންސްގެ ކަންކަން ވެސް ވީ އެންމެ އަވަހަށް ހަމަޖައްސައިދިނުމުގެ ކަންކަން ފުރިހަމަ ކުރަމުން އަންނަ ކަމަށް އެ ކްލަބުން މައުލޫމާތު ދެ އެވެ.
