ކޯޓު އަމުރަކާ ހިލާފުވެ، ސްރީލަންކާގެ ލޯކަލް އިންތިހާބު އަނެއްކާވެސް ފަސްކޮށްފި އެވެ.
އެންމެ ފުރަތަމަ ރާވާފައި އޮތީ މާޗް މަހު އިންތިހާބު ބޭއްވުމަށެވެ. އެހެން ނަމަވެސް އިންތިހާބުގެ ކަންކަމަށް ފައިސާ ދޫކުރަން ސަރުކާރުން ދެކޮޅު ހެދި އެވެ. ސަރުކާރުން ބުނީ މުސާރަ އާއި ޕެންޝަން ދިނުމަށް އިސްކަންދެވޭނެ ކަމަށެވެ.
އެކަމުގައި ސަރުކާރާ ދެކޮޅަށް ސުޕްރީމް ކޯޓުން އަމުރެއް ނެރުނެވެ. އަދި އެޕްރީލް 25 ވަނަ ދުވަހު އިންތިހާބު ބޭއްވުމަށް ފައިސާ ދޫކުރަން އަމުރު ކުރި އެވެ. އެކަމަކު މިހާތަނަށް ފައިސާ ދޫކޮށްފައެއް ނުވެ އެވެ.
"ފައިސާ ދޫކުރާނެ ޔަގީން ތާރީހެއް ސަރުކާރުން ފޯރުކޮށްދީފި ނަމަ ނުވަތަ ސުޕްރީމް ކޯޓުން އިތުރު އަމުރެއް ނެރެފި ނަމަ އިންތިހާބު ބާއްވާނެ އާ ތާރީހެއް އިއުލާން ކުރާނަން،" އިލެކްޝަންސް ކޮމިޝަނުގެ ބަޔާނެއްގައި ބުންޏެވެ.
ލޯކަލް ކައުންސިލަރުން އިންތިހާބު ކުރުމަށް ނަގާ އެ ވޯޓަކީ ރައީސް ރަނިލް ވިކްރަމަސިންހަގެ ސަރުކާރަށް ކުރިމަތިވާ ފުރަތަމަ ވޯޓުގެ އިމްތިހާނެވެ.
ލަންކާއަށް މިނިވަންކަން ލިބުނު ފަހުން ކުރިމަތިވެފައިވާ އެންމެ ބޮޑު އިގުތިސާދީ ކާރިސާއިން އަރައިގަތުމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ ބެއިލްއައުޓް ޕެކޭޖުގެ ދަށުން ތިން ބިލިއަން ޑޮލަރު ލިބޭނެކަން ޔަގީންވީ މިދިޔަ މަހު އެވެ.
އައިއެމްއެފްގެ އެހީ ހޯދަން ސްރީލަންކާއިން މަސައްކަތް ކުރާތާ ގާތްގަނޑަކަށް އަހަރެއް ވެއްޖެ އެވެ. އެތައް ބިލިއަން ޑޮލަރުގެ ދަރަނި ދައްކަން ޖެހޭ ސްރީލަންކާއަށް އައިއެމްއެފް އެހީއަކީ ބޮޑު އުއްމީދެކެވެ.
އެހެން ނަމަވެސް އެނެލިސްޓުން ލަފާދޭ ގޮތުގައި ސްރީލަންކާއަށް އަދިވެސް ގޮންޖެހުންތައް ގިނަ އެވެ. ކޮވިޑް ބަލިމަޑުކަމުގެ ސަބަބުން އިގުތިސާދަށް ބޮޑު ގެއްލުމެއް ލިބުނު އިރު، ކަރަންޓާއި ތެލުގެ އަގު އުފުލި، އިންފްލޭޝަން 50 ޕަސެންޓަށް މަތިވި އެވެ.
ރައްޔިތުންނަށް ދިމާވަމުން ދިޔަ ދަތިތަކާ ހެދި މުޒާހަރާކޮށް 2022 ވަނަ އަހަރު ސަރުކާރު ބަދަލުކުރި އެވެ. ލަންކާއިން ޑޮލަރު ހުސްވެ، އެ ގައުމުގެ ތާރީހުގައި ފުރަތަމަ ފަހަރަށް ދަރަނިތައް ޑީފޯލްޓުވީ މިދިޔަަ މޭ މަހު އެވެ.
