ސިވިލް ކޯޓުގެ ގާޒީ ފަރުހާދު ރަޝީދުއަށް ކުރި ތުހުމަތުތަކާ ގުޅިގެން އޭނާ ސުލޫކީ މިންގަނޑާއި ހިލާފުވެފައި ނުވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ކުރި ތަހުގީގުން ނިންމައިފި އެވެ.
އޭނާގެ މައްޗަށް ސިވިލް ކޯޓަށް ހުށަހެޅޭ މައްސަލަތައް ލަސްކުރުމަށްޓަކައިރިޝްވަތުގެ ގޮތުގައި އެކި މަންފާތައް ހޯދަމުން ގެންދާކަމަށާއި، މައްސަލަތަކުގެ ފައިލްތައް ކޯޓުން ބޭރަށް ގެންދާ ކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެއް ހުށަހެޅި އެވެ.
އެކަމާ ގުޅިގެން މީޑިއާގައި ދައުރުވި ހަބަރުތަކުގައި ފަނޑިޔާރަށް ބޮޑެތި ތުހުތަމެއް ކޮށްފައިވުމާ ގުޅިގެން ފަރުހާދުގެ މައްސަލަ ޖޭއެސްސީން ބަލަން ނިންމި އެވެ. އެއީ އެ ކޮމިޝަނުން އާންމު އުސޫލުގެ ތެރެއިން ބެލި މައްސަލައެކެވެ.
"މި މައްސަލަ ބެލިބެލުމުން، ސުލޫކީ މިންގަނޑާ ހިލާފު ޢަމަލެއް ފަނޑިޔާރަކު ކޮށްފައިވާ ކަމަށް ތުހުމަތުކޮށް ހުށަހަޅާފައިވާ ޝަކުވާގެ އެއްވެސް ހެއްކެއް އަދި މި ޝަކުވާއަށް ބާރުދޭ އެއްވެސް ހޯދުމެއް ހޯދިފައިނުވާތީ، މި ޝަކުވާއަކީ ސައްހަ ޝަކުވާއެއް ކަމަށް ކޮމިޝަނަށް ނުފެންނާތީ،" މިއަދު ޖޭއެސްސީން ނެރުނު ބަޔާނުގައި ބުނެފައިވެ އެވެ.
އަދި، އެކަމާ ގުޅިގެން ފަރުހާދުގެ ސުލޫކީ މައްސަލައެއް ބަލާނެ ޖާގައެއް ނެތް ކަމަށް ވެސް ޖޭއެސްސީން ވަނީ ނިންމާފަ އެވެ.
ސާބިތު ނުހިފޭ ތުހުމަތުތައް މީޑިއާތަކުގައި ގެނެސްދިނުމުގައި ފަނޑިޔާރުގެ އިއްޒަތާއި އަބުރަށް އުނިކަމެއް ނާންނާނެހެން ޒިންމާ ދާރުކަމާއެކު ގެނެސްދިނުމަށް ޖޭއެސްސީން ވަނީ އިލްތިމާސްކޮށްފަ އެވެ.
