މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް، ރޭ، މި ފަހަރުގެ ޕްރެޒިޑެންޓްސް ކަޕް ފުޓްބޯޅަ މުބާރާތުގެ ފުރަތަމަ މެޗުގެ ދެ ވަނަ ހާފުގައި ޓީސީ ސްޕޯޓްސް ކްލަބުން ހެދި ގޮތުން ކުޅެން ޖެހުނީ ފުޓްބޯޅަ އެއް ނޫން ކަމަށާއި ކުރިއަށް ހުރި މެޗުތަކުގައި އެ ފަދަ ކަންކަަމަށް ސަމާލުވާންޖެހޭނެ ކަމަށް މާޒިޔާ ކޯޗު، ބަލްގޭރިއާގެ ބަލްގޭރިއާގެ އިވާން ވެންކޯވް ކޮލޭވް ބުނެފި އެވެ.
ޕްރެޒިޑެންޓްސް ކަޕް ގްރޫޕް ބީގައި ރޭ ކުޅުނު މެޗުން މާޒިޔާ އިން ވަނީ ޓީސީ އަތުން 2-0 އިން މޮޅުވެފަ އެވެ.
މި މެޗުގައި މާޒިޔާ އިން ދެ ގޯލު ވެސް ޖެހި ފުރަތަމަ ހާފުގެ ފަހުކޮޅުގައި، އިބްރާހިމް އައިސަމް އެވެ. އައިސަމް އަކީ ކުރިން ޓީސީ އަށް ކުޅުނު ކުޅުންތެރިއެކެވެ. މި މެޗުގައި މާޒިޔާ އަށް އިތުރު ގޯލު ޖަހަން ގިނަ ބޯޅަތަކެއް ލިބިގެންދިޔައިރު، ހަމްޒާ މުހައްމަދު (ހަމްޕު) އާއި ހަސަން ރާއިފް އަހުމަދު (ހަންނަ) ޖެހި ޝޮޓްތަކެއް ވަނީ ދަނޑިއަށް އަމާޒުވެފަ އެވެ.
މެޗަށް ފަހު މީޑިއާ އަށް ދިން އިންޓަވިއުއެއްގައި އިވާން ބުނީ މި މެޗަށް ބަލާލުމުން ފެންނާނެ ކަމަކީ މިއީ މާޒިޔާ އިން އެއްކޮށް ޑޮމިނޭޓްކޮށްގެން ކުޅުނު މެޗެއް ކަމަށެވެ.
އެ ގޮތުން ފުރަތަމަ ހާފުގައި ވަރަށް ރަނގަޅު ވަރަށް މޮޅަށް މާޒިޔާ އިން ކުޅުނު ކަމަށާއި އެހެން ނަމަވެސް، ދެ ވަނަ ހާފުގައި މާޒިޔާ އަށް ފުޓްބޯޅައެއް ނުކުޅެވުނު ކަމަށް އިވާން ވަނީ ބުނެފަ އެވެ.
"އެއީ 15 ވަރަކަށް މިނިޓް މި ކުޅެވުނީ. 30 ވަރަކަށް މިނިޓް މި ދިޔައީ އަނިޔާވި ކުޅުންތެރިންނަށް ފަރުވާ ދިނުމުގައި ދެން ކުޅުންތެރިންނަށް ދަނޑުމަތީގައި ފަރުވާ ދިނުމުގައި. ދެ ވަނަ ހާފަށް ކޮމެންޓެއް ދެވެން ނެތް، ފުޓްބޯޅައެއް ނޫން އެ ކުޅުނީ،" އިވާން ބުންޏެވެ.
މާޒިޔާއާ ދެކޮޅަށް ކުޅުނު ޓީސީން މި މެޗުގައި ކުޅެފައިވަނީ އެންމެ ތިން ޕްރެކްޓިހަށް ފަހު އެވެ. އެހެންވެ، އެ ޓީމުގެ ގިނަ ކުޅުންތެރިންގެ މެޗު ފިޓްނަސް މައްސަލަ ދިމާވި އެވެ. މި ފަހަރުގެ ފުރަތަމަ ޑިވިޝަނުގައި މާޒިޔާ އާއި އީގަލްސް ނޫނީ، ހަފްތާ އަކަށް ވުރެ ގިނަ ދުވަސް ޕްރީ ސީޒަން ޕްރެކްޓިސް ކުރި ޓީމެއް ނެތެވެ.
ކުރިއަށް ހުރި މެޗުތަކުގައި މާޒިޔާއާ ދެކޮޅަށް ނުކުންނަ ގިނަ ޓީމުތަކެއްގެ ފަރާތުން ވެސް ޕްރީ ސީޒަން ނުހަދާތީ ދިމާވާ މައްސަލައާ ހުރެ، މެޗުގެ ވަގުތު ދުއްވުމުގެ ކަންކަމާއި އަނިޔާގެ މައްސަލައިގައި ދަނޑުމަތީގައި ފަރުވާ ހޯދުމުގެ ކަންކަން ކުރިއަށްދާނެކަން ހަނދާންކޮށްދީ އިވާން ގާތުގައި ސުވާލުކުރުމުން، އޭނާ ބުނީ މާޒިޔާ އިން އެ ހާލަތަށް ތައްޔާރުވާން ޖެހޭނެ ކަމަށެވެ.
"އަހަރެމެން އެބަޖެހޭ މި ކަަހަަލަ ހާލަތްތަކުގައި ހަދާނެ ގޮތްތައް ވެސް ވިސްނާފައި ބާއްވަން، ހަގީގަތުގައި މިއީ ފުޓްބޯޅައެއް ނޫން، މިއީ ފުޓްބޯޅައެއް ނޫން، އަހަންނަށް ވިސްނޭ. އެމީހުންގެ ފިލޯސަފީ، އެ މީހުން މި ޓެކްޓިކްސް ބޭނުންކުރަނީ ވަކި ބޭނުމެއްގައި. އަހަރެން ދެކޭ ގޮތުގައި މި ކަމަށް އަހަރެމެންނަށް ކުރެވޭނެ ކަމަކީ މިހާރަށް ވުރެ އެގްރެސިވްކޮށް (ވަރުގަދަ އަށް) ކުޅުން އެ މީހުންގެ ހާފުގައި ވެސް އެ ގޮތަށް ކުޅެންވީ، މާ ގިނަ ވަގުތު ބޯޅަ ނުހިފަހައްޓައި ވެސް ޑައިރެކްޓްކޮށް ކުޅެގެން ގޯލު ޖެހޭ ވަރު އިތުރުކުރަންވީ،" އިވާން ބުންޏެވެ.
އީގަލްސް އަތުން މާޒިޔާ މޮޅުވި ޗެރިޓީ ޝީލްޑް މެޗެކޭ އެއް ގޮތަށް މި މެޗުގައި ވެސް މާޒިޔާ އަށް ގޯލު ޖަހަން ލިބުނު ގިނަ ފުރުސަތުތައް ނިންމައިނުލެވުނެވެ. އޭގެ އެއް ސަބަބު ކަމަށް ކޯޗު އިވާން ބުނީ މާޒިޔާގެ ސާބިއާ ފޯވާޑް، ސްޓެފަން މިހަލޮވިޗް މި ފަހުން އަމިއްލަ ގައުމަށް ދާން ޖެހުމުން ގެއްލުނު ޕްރެކްޓިސްތަކުގެ އަަސަރު މި މެޗުގައި އޭނާގެ ކިބައިން ފެނުން ކަމަށެވެ.
"ކުރިއަށް ހުރި މެޗުތަކުގައި ދެން ލިބިފައި މި ތިބި ބިދޭސީ ކުޅުންތެރިން ބޭނުންކުރެވޭނެ، އެއީ ވެސް އިތުރަށްރަނގަޅު ކުރަން ލިބޭ ފުރުސަތެއް،" އިވާން ބުންޏެވެ.
ރޭގެ މެޗުގެ ކުރިން އިއްޔެ މެންދުރު ފަހު ބޭއްވި ނޫސްވެރިންގެ ބައްދަލުވުމެއްގައި ކޯޗު އިވާން ބުނީ މާޒިޔާ އަށް އަންނަ ކޮންމެ ކުޅުންތެރިއަކަށް ވެސް ސައިކޮލޮޖިކަލީ ކޮންމެ މެޗަކުން މޮޅުވުމުގެ ޕްރެޝަރު އޮންނާނެ ކަމަށެެވެ. ސަބަބަކީ އެ ޓީމަކީ ހުރިހާ ކަމެއް ބަރާބަރަށް ކުރަމުން އަންނަ ޓީމު ކަމަށްވެފައި، އެ ޓީމު މޮޅުވާން ޖެހޭނެ ކަމަށް އެ އޮންނަ ގަބޫލުކުރުމާ ހެދި، ފުޓްބޯޅައިގައި ބޮޑު ޓީމަށް އެ އޮންނަ ޕްރެޝަރަށް ބަލާފައި ކަމަށް ވެސް އިވާންގެ ވާހަކައިގައި ފާހަގަކޮށްފައިވެ އެވެ.
އީގަލްސްގެ ކޯޗު އިހުސާން އަބްދުލް ގަނީ (ސާންތީ) ވަނީ ޗެރިޓީ ޝީލްޑް މެޗަށް ފަހު، މާޒިޔާގެ ކުޅުމުގައި އަދި މާ ބޮޑު ތަފާތެއް ނެތް ކަމަށް ބުނެފަ އެވެ.
ސާންތީގެ އެ ވާހަކައާ ބެހޭގޮތުން، ދެކެނީ ކިހިނެއްތޯ އެހުމުން، އިވާން ބުނީ ކޮންމެ މީހެއްގެ ވިސްނުމަށް ވެސް އިހުތިރާމްކުރާނެ ކަމަށާއި އެކަމަކު، އެ އަށް ބަލައިގެން މާޒިޔާ އިން ވަކި ކަމެއް ދައްކަން އުޅުމަކީ ބޭކާރު ކަމެއް ކަމަށެވެ. އޭގެ ބަދަލުގައި، މާޒިޔާ އިން ވިސްނީ އަމިއްލަ އަށް ޓީމުގެ އެންމެ ރަނގަޅު ކުުޅުން ދައްކަން ކަމަށް އިވާން ވަނީ ބުނެފަ އެވެ.
ރޭގެ މޮޅާ އެކު މާޒިޔާ އަށް ޕްރެޒިޑެންޓްސް ކަޕްގެ ސެމީ ފައިނަލުގެ ޖާގައެއް ލިބުމުގެ ފުރުސަތު ވަނީ ބޮޑުވެފަ އެވެ. ހަ ޓީމު މި ފަހަރުގެ ޕްރެޒިޑެންޓްސް ކަޕްގައި ކުޅޭއިރު، މުބާރާތް ކުރިއަށްދަނީ ދެ ގްރޫޕަށް ބަހާލައިގެންނެވެ. މާޒިޔާ އޮތީ ޓީސީ އާއި ބުރު ސްޕޯޓްސް ކްލަބާ އެކު ދެ ވަނަ ގްރޫޕްގަ އެވެ. މި ގްރޫޕްގައި ދެން އޮތް މެޗުގައި ޓީސީ އަށް ބުރު އަތުން މޮޅެއް ނުލިބިއްޖެނަމަ މާޒިޔާ ދެން އޮތް މެޗަށް ނުކުތުމުގެ ކުރިން ވެސް ސެމީ ޔަގީންވާނެ އެވެ.
