ލަންޑަން (އޭޕްރީލް 10) - ބްރައިޓަން ހޯލްވް އެންޑް އަލްބިއަން އަށް ކުޅެމުން އަންނަ އާޖެންޓީނާގެ މިޑްފީލްޑަރު، އަލެކްސިސް މެކް އަލިސްޓާގެ އަގު 100 މިލިއަން ޑޮލަރަށް އަރާނެ ކަމަށް މީޑިއާ ރިޕޯޓްތައް ބުނެފި އެވެ.
ބްރައިޓަންއާ އެކު 2025 ވަނަ އަހަރުގެ ޖޫން މަހުގެ ނިޔަަލަށް ކޮންޓްރެކްޓްގައި ހުރި މެކް އަލިސްޓާ، 24، އެންމެ ފަހުން ދިން އިންޓަވިއުތަކުގައި ވެސް އޭނާ އެ ކްލަބްގައި ހުރީ އުފަލުން ކަމަށް ވަނީ ބުނެފަ އެވެ.
އެކަމަކު، މީޑިއާ ރިޕޯޓްތައް ބުނާގޮތުން ބްރައިޓަން އިން ވަނީ މި ސީޒަނަށް ފަހު މެކް އަލިސްޓާ އާއި އެ ޓީމަށް ކުޅޭ އެކުއެޑޯގެ މޮއިސަސް ކައެެސޭޑޯ އެ ކްލަބް ދޫކޮށްލާނެ ކަަމަށް ބަލައި ފިޔަވަޅުތަކެއް އަޅަން ފަށައިފަ އެވެ.
އާޖެންޓީނާއާ އެކު، މިދިޔަ އަހަރުގެ ފީފާ ވޯލްޑް ކަޕް ކާމިޔާބުކުރި މެކް އަލިސްޓާ ގަންނަން މެންޗެސްޓާ ޔުނައިޓެޑް، ޗެލްސީ އާއި ލިވަޕޫލް އަދި މެންޗެސްޓާ ސިޓީން މަސައްކަތް ކުރާއިރު، އިޓަލީ އާއި ސްޕެއިންގެ ކްލަބްތަކުން ވެސް އޭނާ އަށް ފާރަލަ އެވެ.
ބްރައިޓަންގެ އޮފިޝަލަކާ ހަވާލާދީ އިނގިރޭސި މީޑިއާތަކުން ރިޕޯޓްކުރާ ގޮތުގައި އިނގިރޭސި ކްލަބްތަކުގެ ހަރަދުކުރުމުގެ ވައްޓަފާޅި އާއި މި ވަގުތު މާކެޓްގެ އަގުތަކަށް ބަލާއިރު، މެކް އަލިސްޓާގެ އަގު 100 މިލިއަން ޑޮލަރަށް އަރާނެ އެވެ.
ބްރައިޓަންގެ މެޗެއްގެ ތެރެއިން ގޯލު ޖެހުމަށް ފަހު، މެކް އަލިސްޓާ އުފާފާޅުކުރަނީ.
އެ ގޮތުން، ބްރައިޓަންގެ އެ އޮފިޝަލް މިސާލެއްގެ ގޮތުން ދައްކާފައިވަނީ ޖެނުއަރީ މަހުގެ ޓްރާންސްފާގައި ޗެލްސީން ބެންފީކާގެ މިޑްފީލްޑަރު، އެންޒޯ ފެނާންޑޭޒް ގެންނަން ދެއްކި 130 މިިލިއަން ޑޮލަރުގެ ފީ އެވެ. އަދި ޗެލްސީން ޖެނުއަރީ ޓްރާންސްފާގައި ޔޫކްރެއިންގެ ވިންގް، މިހައިލޯ މުޑްރިކް އަށް 100 މިލިއަން ޑޮލަރު ހޭދަކުރަން ނިންމިއިރު، މެކް އަލިސްޓާ އަކީ ޕްރިމިއާ ލީގުގައި ފެންވަރު ސާބިތުކޮށްދީފައިވާ ކުޅުންތެރިއަކަށް ވާތީ އޭނާ އަށް ވެސް އެ އަގު ލިބޭނެ ކަމަށް ބްރައިޓަން އިން ގަބޫލުކުރެ އެވެ.
އާޖެންޓީނޯސް ޖޫނިއާސް އަށް 2016 ވަނަ އަހަރު ކުޅެން ފަށައި، އެ ޓީމު ދޫކޮށް، 2019 ވަނަ އަހަރު ބްރައިޓަން އަށް ބަދަލުވުމަށް ފަހު، މެކް އަލިސްޓާ ވަނީ އަލުން އާޖެންޓީނޯސް ޖޫނިއާސް އާއި ބޮކަ ޖޫނިއާސް އަށް ލޯން އެއްބަސްވުމެއްގެ ދަށުން ކުޅެފަ އެވެ.
ދާދި ފަހުން ޗެލްސީން ވަކިކުރި ކޯޗު، ގްރަހަމް ޕޮޓާގެ ކޯޗުކަމުގައި ބްރައިޓަން އަށް ގެނައި، މެކް އަލިސްޓާ އަންނަނީ މި ވަގުތު ބްރައިޓަންއާ ހަވާލުވެހުރި އިޓަލީގެ ކޯޗު ރޮބާޓޯ ޑި ޒާބީގެ އިރުޝާދުގެ ދަށުން ވެސް މޮޅު ކުޅުމެއް ދައްކަމުންނެވެ. މި ސީޒަނުގައި މިހާތަނަށް ކުޅުނު 29 މެޗުން މެކް އަލިސްޓާ ވަނީ 10 ގޯލު ޖަހައި، ދެ ގޯލު ޖަހަން ފުުރުސަތު ހޯދައިދީފަ އެވެ.
