މަޝްވަރާއެއް ނެތި އަމީނީމަގު ތަރައްގީކުރުމުގެ މަސައްކަތް ކުރަމުންދާތީ މާލެ ސިޓީ ކައުންސިލުން ކަންބޮޑުވުން ފާޅުކޮށްފި އެވެ.
ސިޓީ ކައުންސިލާ ހަވާލުކޮށްފައި އޮތް މާލޭ ސްޓްރީޓްސްކޭޕިން ޕްރޮޖެކްޓު ޕްލޭނިން މިނިސްޓްރީގެ ބެލުމުގެ ދަށުން ކުރުމަށް ނިންމުމުން ސިޓީ ކައުންސިލުން ވަނީ އެކަމުގެ ހުރި ކަންބޮޑުވުންތައް މަޖިލީހަށް ހުށަހަޅާފަ އެވެ.
އެ މައްސަލައާ ގުޅިގެން މިއަދު ބޭއްވި ލާމަރުކަޒީ ކޮމެޓީގެ ބަައްދަލުވުމުގައި ވާހަކަ ދައްކަވަމުން ޑެޕިއުޓީ މޭޔަރު އަހުމަދު ނަރީޝް ވިދާޅުވީ މަގުތަކުގެ މައްސަލައާ ގުޅިގެން ރައްޔިތުންގެ ކަަންބޮޑުވުންތަކަށް ޖަވާބުދާރީވެ، ރައްޔިތުންގެ ވާހަކަތަކުގެ އަޑު އަހަނީ އެ ކައުންސިލުން ކަމަށް ވާއިރު، މިކަމާ ގުޅޭ ނިންމުންތައް ކައުންސިލާ މަޝްވަރާ ކުރުމެއް ނެތި ޕްލޭނިން މިނިސްޓްރީއަށް ނިންމިގެން ނުވާނެ ކަމަށެވެ.
އަމީނީ މަގު ޕްރޮޖެކްޓަށް ސިޓީ ކައުންސިލުން އެއްވެސް ހުރަހެއް އަޅާފައި ނުވާނެ ކަމަށާއި، އެހެން ކަމުން މިމަސަައްކަތް ކުރުމުގައި އެ ކައުންސިލާ މަޝްވަރާ ނުކުރެވެންވީ ސަބަބެއް އޮވެެގެން ނުވާނެ ކަމަށް ނަރީޝް ވިދާޅުވި އެވެ.
"ސަރުކާރުގެ އެއްވެސް އިދާރާއަކަށް މިވަގުތާ ހަމައަށް ޖެއްސުމެއް ކޮށްފައެއް ނޯންނާނެ. އަޅުގަނޑުމެން މިހާ ގުޅިގެން މަސައްކަތްކުރާއިރު އަޅުގަނޑުމެންނާ މަޝްވަރާނުކޮށް މިމަސައްކަތް ކުރިއަށް ގެންދާތީ ކަންބޮޑުވަން،" އޭނާ ވިދާޅުވި އެވެ.
މިކަމާ ގުޅިގެން ޕްލޭނިން މިނިސްޓްރީގެ ފަރާތުން ވާހަކަ ދައްކަވަމުން ޕްރޮޖެކްޓު ކޯޑިނޭޓަރު އިސްމާއިލް ޝާފީ ވިދާޅުވީ، މިއީ މިނިސްޓްރީގެ ބެލުމުގެ ދަށުން ކުރިއަށް ގެންދާ މަޝްރުއޫއެއް ނަމަވެސް މިކަމާ ގުޅޭ އެކި ހުއްދަތައް ސިޓީ ކައުންސިލުން ހޯދާ ކަމަށެވެ. އަދި މި މަޝްރުއޫގައި މާލެ ސިޓީ ކައުންސިލަކީ ސްޓޭކްހޯލްޑަރެއް ކަމަށާއި ކޮންސެޕްޓު ޑިޒައިންތައް ވެސް މާލެ ސިޓީ ކައުންސިލަށް ހުށަހަޅާކަމަށް ޝާފީ ވިދާޅުވި އެވެ.
މާލޭ ސްޓްރީޓްސްކޭޕްގެ މަސައްކަތަކީ މީގެ ކުރިން ސިޓީ ކައުންސިލާ ހަވާލުކޮށްފައިވާ މަސައްކަތެއް ނަމަވެސް މިދިޔަ އަހަރުގެ ޖޫން 23 ވަނަ ދުވަހު އެ މަސައްކަތް ވަނީ ޕްލޭނިން މިނިސްޓްރީއާ ހަވާލުކޮށްފަ އެވެ.
ސިޓީ ކައުންސިލުން މީގެ ކުރިން ކުރިއަށް ގެންދިއުމަށް ނިންމާފައި އޮތް މަސައްކަތްތަކުގެ ތެރޭގައި، ބޭރު މަގާއެކު 16 މަގެއްގައި ތާރު އެޅުމާއި، މާލޭގެ 105 މަގެއް ޒަމާނީ ފެންވަރަށް ތަރައްގީކުރުމާއި، ނޯތު ހާބަރާ ދިމާލުން ތޮށިގަނޑު ފެޔަށް ޖައްސާ މަގު ފުޅާކުރުން ހިމެނެ އެވެ.
