އޭޝިއަން ސާފިން ޗެމްޕިއަންޝިޕް މި އަހަރުގެ ޖުލައި މަހު ރާއްޖޭގައި ބާއްވަން ނިންމައި މި އަހަރު ގައުމީ ސާފް ލީގުގެ ބައެއް މުބާރާތްތައް ބާއްވާ ތާރީހުތަކަށް ބަދަލުގެނެސްފި އެވެ.
އޭޝިއަން ސާފިން ޗެމްޕިއަންޝިޕް މި އަހަރު ރާއްޖޭގައި ބާއްވަނީ ތިން އަހަރުގެ މެދުކެނޑުމަކަށް ފަހުގަ އެވެ. އެންމެ ފަހުން މުބާރާތް ބޭއްވީ ޖަޕާނުގަ އެވެ. އެ ފަހަރު ރާއްޖޭ އިން ވެސް ވާދަކުރި އެވެ. މުބާރާތުގެ ފައިނަލު ހީޓުގައި ވާދަކޮށް ރާއްޖޭގެ ހުސައިން އަރީފް (އިބޫ) ލޯ މެޑަލް ހޯދިއިރު އިސްމާއިލް ރަޝީދު (ސްމައިލީ) ދިޔައީ ހަތަރަކަށެވެ.
ޖުލައި މަހުގެ 8-17 އަށް އޭޝިއަން ޗެމްޕިއަންޝިޕް ބާއްވަން މިހާރު ނިންމާފައި އޮތީ ކ. ހިންމަފުށީގަ އެވެ. މި މުބާރާތުގެ އެކި ކަންކަން ހަމަޖެއްސުމަށް މޯލްޑިވްސް ސާފިން އެސޯސިއޭޝަން (އެމްއެސްއޭ) އިން މިހާރު އަންނަނީ ތައްޔާރު ވަމުންނެވެ.
އޭޝިއާގެ އެންމެ ބޮޑު ސާފިން މުބާރާތް ރާއްޖޭގައި ބާއްވާތީ ގައުމީ ސާފް ލީގަށް ގެނައި އެންމެ ބޮޑު ބަދަލަކީ ޖުލައި މަހުގެ ހަތަރަކުން އަށަކަށް ހިންމަފުށީގައި ބާއްވަން އޮތް "ގާމާދޫކޮޅު" މުބާރާތް ޖޫން މަހަށް އަވަސްކުރުމެވެ. އެ މުބާރާތް މިހާރު އޮންނާނީ ޖޫން 14-18 އަށެވެ.
މީގެ އިތުރުން ޖުލައި މަހުގެ 31 އިން ފަހެއް އޮގަސްޓަށް ބާއްވަން ހަމަޖެހިފައި އޮތް ރ. ކިނޮޅަހު "ހުރާކޮޅު ރާާާޅުގަނޑު" މުބާރާތް ވަނީ ޖުލައި 26-30 އަށް އަވަސްކޮށްފަ އެވެ.
"ގާމާދޫކޮޅު" މުބާރާތާއި ހުރާކޮޅު ރާޅުގަނޑު" މުބާރާތް ބާއްވާ ދުވަސްތަކަށް ބަދަލުތައް ގެނައި ނަމަވެސް ގައުމީ ލީގުގައި ދެން ހުރި މުބާރާތްތައް ޝެޑިއުލް އާ އެއްގޮތަށް ކުރިއަށްދާނެ އެވެ. މި ގޮތުން މިއަހަރުގެ ފުރަތަމަ މުބާރާތް ކަމަށްވާ "ކަޅެގަލެކޮޑާ" މުބާރާތް ގދ. ގައްދޫގައި މިދިޔަ ފެބްރުއަރީ މަހު ވަނީ ބާއްވައިފަ އެވެ. މ. މުލީގައި އޮންނަ "މުލީކޮޅު ރާޅުގަނޑު" މުބާރާތް މެއި ތިން ވަނަ ދުވަހު ފަށާނެ އެވެ.
އަދި ގައުމީ ލީގުގެ ފަހު މުބާރާތް ކަމަށްވާ "ރަންނަމާރި ޗެލެންޖު" އޮންނާނީ މި އަހަރުގެ އޮކްޓޫބަރު މަހުގެ 27 އިން ނޮވެމްބަރު މަހުގެ 25 ގެ ނިޔަލަށެވެ.
އޭޝިއަން ޗެމްޕިއަންޝިޕާއި މި އަހަރު ހުރި އެހެން ބައިނަލްއަގްވާމީ މުބާރާތަށް ތައްޔާރުވުމަށް ގައުމީ ޓީމުން އަންނަނީ މިދިޔަ ފެބްރުއަރީ މަހުން ފެށިގެން ފަރިތަކުރުންތައް ކުރިއަށް ގެންދަމުންނެވެ. އެ ގޮތުން ގައުމީ ޓީމްގެ ހަ ސާފަރުން އަންނަނީ ގައުމީ ޓީމުގެ ފުލްޓައިމް ކޯޗު ކަމަށްވާ ދެކުނު އެފްރިކާގެ ކްލައިޓް މާޓިންގެ އިރުޝާދުގެ ދަށުން ފަރިތަކުރުންތައް ކުރިއަށް ގެންދަމުންނެވެ.
މިއަހަރު ގައުމީ ސާފިން ޓީމަށް ހުރި މުބާރާތްތަކުގެ ތެރެއިން ފުރަތަމަ މުބާރާތަކީ މެއި މަހުގެ 30 ގައި އެލް ސަލްވަޑޯގައި އޮންނަ ވޯލްޑް ސާފިން ގޭމްސް އެވެ. އޭގެ ފަހުން އޭޝިއަން ޗެމްޕިއަންޝިޕްގައި ވާދަކުރުމަށްފަހު ގައުމީ ޓީމުން ތައްޔާރުވާނީ އޮގަސްޓް މަހުގެ ފަހުކޮޅު ފަށާ އިންޑިއަން އޯޝަން އައިލެންޑް ގޭމްސް އަށެވެ.
