ތައިލޭންޑުގެ ދެކުނުގައި ހިނގި ބަޑި ޖެހުމުގެ ހާދިސާއެއްގައި ހަތަރު މީހުން މަރުވެފައިވާ ކަމަށް އެ ގައުމުގެ ފުލުހުން ބުނެފި އެވެ.
ތައިލޭންޑުގެ ނޫސްތަކުން ރިޕޯޓު ކުރާ ގޮތުގައި ތުހުމަތު ކުރެވޭ މީހާ ވަނީ ފުލުހުންނަށް ފިލައިފަ އެވެ. ހަމަލާ ދިނީ ހޮނިހިރު ދުވަހުގެ ހަވީރު ވެރިރަަށް ބެންކޮކްއާ 600 ކިލޯމީޓަރު ދެކުނުން ސުރަތު ތަނި ޕްރޮވިންސްގެ ހިރި ރަތް ނިހޮމް ޑިސްޓްރިކްޓުގަ އެވެ.
"ހަތަރު މީހުން މަރުވި،" އެ ސަރަހައްދުގެ ފުލުހުންގެ ވެރިޔާ ކްރިއަންގްކްރައި ކްރައިކިއު އޭއެފްޕީއަށް ވިދާޅުވި އެވެ. އިތުރު ތަފުސީލު ދިނުމަށް އޭނާ ދެކޮޅު ހެއްދެވި އެވެ.
ތައިލޭންޑުގެ ނޫސްތަކުން ބުނީ ބަޑިޖެހީ ކުރިން އަވަށުގެ ވެރިޔާގެ މަގާމު އަދާކުރި މީހެއްގެ ގޭ ކައިރީގައި ކަމަށެވެ.
ތައިލޭންޑުގައި ގިނަ ބަޔަކު ބަޑިގެންގުޅެ އެވެ. ފާއިތުވި އަހަރު ދުވަހުގެ ތެރޭގައި ބަޑިޖެހުމުގެ ހާދިސާތައް ވަރަށް ބޮޑަށް އިތުރުވެފައިވެ އެވެ. އެގޮތުން ގައުމުގެ ތާރީހުގައި އެންމެ ހިތާމަވެރި ބަޑީގެ ހާދިސާ ވެސް ހިނގީ މިދިޔަ އަހަރު އެވެ.
މިދިޔަ އަހަަރުގެ އޮކްޓޯބަރު މަހު ކުރިން ފުލުހުންގެ ސާޖަންޓަކަށް އުޅުނު މީހަކު އިރުއުތުރު ނޮންގް ބުއާ ލަމް ފު ޕްރޮވިންސްގެ ޑޭކެއާއެއްގައި ބަޑި ޖަހައި 36 މީހުން މަރާލި އެވެ. އޭގެ ތެރޭގައި 24 ކުދިން ހިމެނެ އެވެ.
