ޕެރިސް (އޭޕްރީލް 7) - އަންނަ ސީޒަނަށް ޕީއެސްޖީގެ ސީޒަން ޓިކެޓް ވިއްކަން އެ ކްލަބުން ނެގި ޕްރޮމޯޝަނަލް ވީޑިއޯއެއްގައި އެ ޓީމުގެ ތަރި ކީިލިއަން އެމްބާޕޭގެ ނަން ބޭނުންކޮށް، އިޝްތިހާރުކުރި ގޮތުން އޭނާ ވަރަށް ބޮޑަށް ހިތްހަމަނުޖެހުން ފާޅުކޮށްފި އެވެ.
ޕީއެސްޖީން މިހާރު ވަނީ އެ ވީޑިއޯ އެ ކްލަބްގެ ރަސްމީ ވެބްސައިޓާއި ސޯޝަލް މީޑިއާ ޗެނަލްތަކުން ފޮހެލައިފަ އެވެ. އެކަމަކު، އެހެން ސޯޝަލް މީޑިއާ އެކައުންޓްތަކުގައި އެ ވީޑިއޯ ވަނީ ވައިރަލްވެފަ އެވެ.
އެ ވީޑިއޯއާ ގުޅޭގޮތުން ހިތްހަމަނުޖެހުން ފާޅުކޮށް، އިންސްޓަގްރާމް މެދުވެރިކޮށް އެމްބާޕޭ ބުނީ އެއީ ޓިކެޓް ވިއްކާ ޕްރޮމޯޝަނަލް ވީޑިއޯ އިންޓަވިއުއެއް ކަމަށް އެ ކްލަބުން އޭނާ އަށް އަންގާފައިނުވާ ކަމަށެވެ. އަދި އެ ވީޑިއޯ ނެގިއިރު، ހީކުރީ އެއީ ޕީއެސްޖީން ކުޅުންތެރިންނަށް ކުރިއަށްގެންދާ މީޑިއާ ޓްރެއިނިން ދުވަހުގެ ބައެއް ކަމަށް ކަމަށާއި އެ ވީޑިއޯ ރަސްމީކޮށް ބޭނުންކުރަން ޕީއެސްޖީ އަށް ހުއްދަ ނުދޭ ކަމަށެވެ.
"އެހެންވެ، އަހަރެން ވާނީ މި މައްސަލައިގައި އަމިއްލަ އިމޭޖް ރައިޓްސްގެ ހައްގުގައި ދައުވާކުރަން ނިންމައިފައި. މިއީ މިކަން ވާންޖެހޭނެ ގޮތެއް ނޫން. ޕީއެސްޖީ އަކީ ބޮޑު ކްލަބެއް، ބޮޑު އާއިލާއެއް. ޔަގީނުން ވެސް ޕީއެސްޖީ އަކީ ކީލިއަން ސެއިންޓް ޖާމެއިން އެއް ނޫން،" އެމްބާޕޭ ބުންޏެވެ.
މީގެ ކުރިން ފްރާންސް ފުޓްބޯޅަ ފެޑެރޭޝަނުގެ ބައެއް ޕްރޮމޯޝަނަލް ހަރަކާތްތަކުގައި ބައިވެރިވާން ވެސް އެމްބާޕޭ ދެކޮޅު ހަދާފައިވެ އެވެ. އެއީ ވެސް އޭނާގެ އަމިއްލަ އިމޭޖް ރައިޓްސްއާ ހިލާފުކަމެއް ކަމަށް ބުނެ އެވެ.
ފްރާންސްގެ މީޑިއާ ރިޕޯޓްތައް ބުނާގޮތުން އެމްބާޕޭ އާއި ޕީއެސްޖީއާ ދެމެދު މި ފަހުން، މައްސަލަ ގޯސްވެގެން އުޅޭ އެންމެ ބޮޑު ސަބަބަކީ އެމްބާޕޭ އާއި އެ ކްލަބާ ދެމެދު ހަދާފައިވާ ކޮންޓްރެކްޓްގެ ސިއްރު ބައެއް މައުލޫމާތު މީޑިއާ އަށް ލީކުވުމާ ގުޅިގެންނެވެ.
އެ ގޮތުން، ޕީއެސްޖީގައި އެމްބާޕޭ މަޑުކުރަން ނިންމާ ކޮންމެ އަހަރަކަށް "ލޯޔަލްޓީ ބޯނަސް"އެއްގެ ގޮތުގައި 60 މިލއަން ޑޮލަރު ދޭން ކޮންޓްރެކްޓްގައި ލިޔެފައިވާ ކަމަށް މިދިޔަ ދުވަސްތަކުގައި ފްރާންސް ނޫސްތަކުން ވަނީ ރިޕޯޓްކޮށްފަ އެވެ.
ޕީއެސްޖީން އަންނަ ސީޒަނަށް ތައްޔާރުކުރާ ޕްރޮމޯޝަނަލް ވީޑިއޯތަކުގައި އެ ޓީމުގެ ދެ ތަރިން ކަމަށްވާ ލިއޮނަލް މެސީ އާއި ނޭމާ ބޭނުންނުކުރެ އެވެ. ރިޕޯޓްތައް ބުނާގޮތުން މެސީ ވަނީ ޕީއެސްޖީއާ އެކު ކޮންޓްރެކްޓް އާ ނުކޮށް، ހިލޭ ޓްރާންސްފާއެއްގައި އެހެން ޓީމަކަށް ބަދަލުވާން ނިންމާފައިވާކަން ޕީއެސްޖީ އަށް އަންގައިފަ އެވެ.
