ދިވެހިރާއްޖޭގެ ރުއްތައް މުސްކުޅިވެ އެއިން ލިބޭ ނަފާ މަދުވަމުންދާތީ އިންޑިއާގެ ކެރެލާއިން ރާއްޖެއަށް 5،000 ރުއް އެތެރެކޮށްފި އެވެ.
ބޭރުން ގިނަ އަދަދެއްގެ ރުއްތަކެއް ގެނައީ ރާއްޖޭގައި ރުއްތަކަށް މި ފަހުން ޖެހޭ ބައްޔެއްގެ ސަބަބުން، ކާއްޓައި ކުރުނބާ ލިބުން ދަތިވާތީ އެކަމަށް ހައްލެއް ގެނައުމުގެ ގޮތުން، ރުއްތައް އާލާކުރުމުގެ ގޮތުން ކަމަށް އެގްރިކަލްޗަ މިނިސްޓްރީން ބުނެ އެވެ.
ރުއްތައް ގެނައުމުގެ ރަސްމިއްޔާތުގައި ވާހަކަަ ދައްކަވަމުން މިނިސްޓަރު ޑރ. ހުސައިން ރަޝީދު ހަސަން ވިދާޅުވީ ރުއްތައް ބަހާނީ އެ ރުއްތަކުގައި ވެސް އެއްވެސް ބާވަތެއްގެ ބައްޔެއް ހުރިތޯ ކަށަވަރު ކުރުމަށް ފަހުގައި ކަމަށާއި އެ ރުއްތައް މިހާރު ވަނީ މިނިސްޓްރީގެ ބެލުމުގެ ދަށުގައި ކަރަންޓީން ކޮށްފައި ކަމަށެވެ.
ރާއްޖޭގައި ރުއްގަހަށް ޖެހޭ ބަލިތައް ފެތުރުން ހުއްޓުވުމަށް ކުރެވޭނެ މަސައްކަތްތަކާއި ގުޅޭ ގޮތުން، މިނިސްޓްރީން ވަނީ ކަމާ ގުޅުން ހުރި ދާއިރާތަކާ ދެ ދުވަހުގެ މުއްދަތަށް މަޝްވަރާ ބައްދަލުވުމެއް ވެސް ބާއްވައިފަ އެވެ.
ރާއްޖޭގެ ރުއްތައް ބަލިވާ އެއް ސަބަބަކީ އެ ރުއްތަކަކީ އުމުރުން ދުވަސްވެފައިވާ ރުއްތަކެއް ކަމަށްވާތީ އެވެ. އެހެންވެ، ރާއްޖޭގައި ރުއް އިންދުމުގެ ޕްރޮޖެކްޓެއް ހިންގުމަށް ވެސް ބައެއް ފަރާތްތަކުން ދަނީ ގޮވާލަމުންނެވެ.
