ސަރުކާރުގެ މަސް ކުންފުނި މިފްކޯގެ އާ ބޯޓު "ޖަޒީރާ 103" މިއަދު ރާއްޖެ ގެނެސްފި އެވެ.
އެ ކުންފުނިން ބުނީ އެ ބޯޓު ގަތީ ކުންފުނީގެ ކެޕޭސިޓީ އިތުރު ކުރަން ކުރަމުންދާ މަސައްކަތްތަކުގެ ތެރެއިން ކަމަށެވެ. އެގޮތުން ޖުމްލަ ހަތަރު ބޯޓެއް ގަތުމަށް ހަމަޖެހިފައިވާއިރު "ޖަޒީރާ 103" އަކީ އޭގެ ތެރެއިން ފުރަތަމަ ބޯޓެވެ.
މިފްކޯގެ ސީއީއޯ އިސްމާއީލް ފައުޒީ ވިދާޅުވީ އެ ބޯޓުގައި ދުވާލަކު 120 މެޓްރިކު ޓަަނުގެ މަސް ގަނެ ފިނިކުރެވޭނެ ކަމަށެވެ. އަދި ބޯޓުގައި ޖުމްލަ 420 މެޓްރިކް ޓަނުގެ މަސް ރައްކާ ކުރެވޭނެ ކަމަަށް ވެސް ސީއީއޯ އިސްމާއިލް ފައުޒީ ވިދާޅުވި އެވެ.
"އަޅުގަނޑުމެންގެ އަމާޒަކީ މަސް ގަނެވޭ މިންވަރު އިތުރުކުރުން. އެގޮތުން ބޯޓުގައި ދުވާލަކު 120 މެޓްރިކު ޓަަނުގެ މަސް ގަނެ ފިނިކުރެވޭނެ. ޖަޒީރާ 103 އަކީ ފަސޭހަ ކަމާއެކު މަސްކިރުމުގެ ވަސީލަތްތައް ގާއިމްކޮށްފައިވާ ބޯޓަކަށް ވުމުން މަސްވެރިކަމުގެ މޫސުމުގައި އެންމެ ރަގަޅަށް މަސްބާނާ ސަރަހައްދަކަށް ދަތުރުކޮށް މަސް ވެރިން ބާނާ މަސް ކިރުމަށް އިތުރު ލުއިފަސޭހަތަކެއް ލިބިގެން ދާނެ،" ފައުޒީ ވިދާޅުވި އެވެ.
ފައުޒީ އިތުރަށް ވިދާޅުވީ އެ ބޯޓުން މަސްކިރުމުގެ ކަންތައް 10 ދުވަސް ތެރޭގައި ފަށާނެ ކަމަަށެވެ.
މީގެ ކުރިން 2021 ވަނަ އަހަރު ވެސް މިފްކޯއިން ވަނީ 300 ޓަނުގެ ސްޓޯރޭޖު ކެޕޭސިޓީ ހުރި އަދި ދުވާލަކު 120 ޓަން ފްރީޒްކުރެވޭ އުޅަނދަކާއި މަސް އެކްސްޕޯޓުކުރުމަށް 2،400 ޓަނުގެ ކެރިއާ އުޅަނދެއް ގަނެފަ އެވެ.
