ލަންޑަން (އޭޕްރީލް 5) - އިނގިރޭސި ޕްރިމިއާ ލީގުގައި ރޭ ލިވަޕޫލާއި ޗެލްސީ ބައްދަލުކުރި މެޗު ލަނޑެއް ނުޖެހި، 0-0 އިން އެއްވަރުވިއިރު، މިއީ މި ދެ ޓީމު ލަނޑެއް ނުޖެހި މި ނަތީޖާ އިން ޖެހިޖެހިގެން އެއްވަރުވި ހަތަރު ވަނަ މެޗެވެ.
މި މެޗުގައި ޗެލްސީ އަށް އިރުޝާދުދިނީ ދާދި ފަހުން އެ ޓީމުގެ ކޯޗުކަމުން ވަކިކުރި ގްރަހަމް ޕޮޓާގެ ބެކްރޫމް ސްޓާފެއް ކަމަށްވާ ބްރޫނޯ ސަލްޓޯ އެވެ. މިއީ، ހެޑް ކޯޗެއްގެ ރޯލުގައި ސަލްޓޯގެ އަލަތު މެޗެވެ.
ރޭގެ މެޗަށް ފަހު ބްރޫނޯ ބުނީ ދިމާވެފައިވާ ހާލަތާ ހެދި މި މެޗަށް ފޯކަސް ކުރަން އުނދަގޫވި ކަމަށާއި އެކަމަކު، ދެއްކި ކުޅުމާއި ތަނަވަސްކުރި ފުރުސަތުތަކަށް ބަލާއިރު، މިއީ މޮޅުވެވޭނެ މެޗެއް ކަމަށެވެ.
ޗެލްސީގެ ސްޓެމްފޯޑް ބްރިޖްގައި ކުޅުނު މި މެޗަށް ލިވަޕޫލުން ނެރުނު ފުރަތަމަ އެގާރަ އަށް ވަނީ ބަދަލުތަކެއް އަތުވެފަ އެވެ. ހޮނިހިރު ދުވަހު މެންޗެސްޓާ ސިޓީ ދަނޑުގައި ބަލިވި މެޗުގައި ބޭނުންކުރި ފުރަތަމަ އެގާރަ އަށް ވަނީ ހަ ބަދަލެއް ގެނެސްފަ އެވެ. އޭގެ ތެރެއިން އެންމެ ބޮޑު ބަދަލަކީ މުހައްމަދު ސަލާހު ބެންޗަށް ލުމެވެ.
ރޭގެ މެޗުގެ ފުރަތަމަ ހާފުގައި ޗެލްސީން ވަނީ ގޯލެއް ޖަހައިފަ އެވެ. އެކަމަކު، ރީސް ޖޭމްސް ޖެހި ގޯލު އޮފްސައިޑް ކަމަށް ނިންމީ، އެ އެޓޭކުގައި ޗެލްސީގެ އެންޒޯ ފެނާންޑޭޒް އޮފްސައިޑް ކަމަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ކަނޑައެޅުމުންނެވެ.
ލިވަޕޫލުން ވެސް ކޮންމެ ވެސް ވަރަކަށް އެޓޭކްތަކެއް ކުރި ނަމަވެސް ގޯލެއް ޖެހޭގޮތެއްނުވި އެވެ. ޗެލްސީން ވަނީ ދެ ވަނަ ހާފުގައި ވެސް ގޯލެއް ޖަަހައިފަ އެވެ. ޗެލްސީގެ ކައި ހަވާޓްޒް ޖެހި ގޯލު ވީއޭއާރް އިން ބަލާފައި ބަލައިނުގަންނަން ނިންމީ ބޯޅަ ގޯލަށް ވަނީ ހަވާޓްޒް އަތުގައި ޖެހިފައި ކަމަށްވާތީ އެވެ.
ލިވަޕޫލާއި ޗެލްސީ އެއްވަރުވުމުން ގަދަ ހަތަރެއްގެ ރޭހަށް ވަންނަން މަސައްކަތް ކުރަމުން އަންނަ މި ދެ ޓީމަށް ވެސް ވަނީ އުނދަގޫ ބޮޑުވެފަ އެވެ. ލިވަޕޫލް ލީގުގެ އަށް ވަނައިގައި އޮތީ 28 މެޗުން 43 ޕޮއިންޓާ އެކު އެވެ. ލީގުގެ 11 ވަނައިގައި އޮތް ޗެލްސީ އަށް ވަނީ 29 މެޗުން 38 ޕޮއިންޓް ލިިބިފަ އެވެ.
އިނގިރޭސި ޕްރިމިއާ ލީގުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، ލެސްޓާ ސިޓީ ދަނޑުގައި އެސްޓަން ވިލާ ވަނީ 2-1 އިން މޮޅުވެފަ އެވެ. ލީޑްސް ޔުނައިޓެޑުން ފަހަތުން އަރައި، 2-1 އިން ނޮޓިންހަމް ފޮރެސްޓް ބަލިކުރިއިރު، ރަނގަޅު ފޯމެއް ދަމަހައްޓަމުން އަންނަ ބްރައިޓަން އިން ވަނީ 2-0 އިން ބޯންމައުތުގެ މައްޗަށް ކުރިހޯދައިފަ އެވެ.
