ނިއު ދިއްލީ، އިންޑިއާ (އޭޕްރީލް 3) - ދުނިޔޭގެ އެންމެ އަގުބޮޑު ކްރިކެޓް ލީގު ކަމަށްވާ އިންޑިއަން ޕްރިިމިއާ ލީގު (އައިޕީއެލް)ގެ މި އަހަރުގެ ސީޒަންގެ ފެށުން ރޯޔަލް ޗެލެންޖާސް ބެންގަލޫރުން ރަނގަޅުކޮށްފި އެވެ.
މި އަހަރުގެ ސީޒަނަށް ވަރުގަދަ އަށް ތައްޔާރުވި ބެންގަލޫރުން އެ ޓީމުގެ ފުރަތަމަ މެޗުގައިވަނީ މުމްބާއީ އިންޑިއަންސް އަށް ވިކެޓުން ބަލިކޮށްފަ އެވެ.
މެޗުގެ ޓޮސް ދިމާވުމުން ބެންގަލޫރުން ނިންމީ އެ ޓީމުން ފުރަތަމަ ފީލްޑް ކުރާށެވެ. މުމްބާއި ކުޅެން އަރައި، 20 އޯވަރުގައި ހަތް ކުޅުންތެރިން ނުބައިވެގެން ހެދުނީ 171 ލަނޑެވެ. މުމްބާއީ އަށް މެޗުގައި މައްސަލަތައް ދިމާވީ ފުރަތަމަ ތިން ވިކެޓު ފަސް އޯވަރުގެ ތެރޭގައި ގެއްލުމުންނެވެ. އޭގެ ތެރޭގައި ދެ އޯޕަނަރުން ކަމަށްވާ ކެޕްޓަން ރޯހިތު ޝަރުމާ އާއި އިޝާން ކިޝަންގެ ވިކެޓު ހިމެނެ އެވެ.
މުހިންމު ކުޅުންތެރިޔާ ސޫރްޔަކުމާރު ޔާދަވްގެ ވިކެޓު އަށް ވަނަ އޯވަރުގައި ގެއްލި މުމްބާއީ ޕްރެޝަރުގައި އޮއްވައި އެ ޓީމަށް ހަމަޖެހުމުގެ ނޭވާއެއް ލެވުނީ ތިލަކް ވަރުމާ ދެއްކި މޮޅު ކުޅުމުންނެވެ. ތިލަކް ވަނީ ނުބައިނުވެ 46 ބޯޅައިން 84 ލަނޑު ހަދައިފަ އެވެ.
ޖަވާބުގައި ބެންގަލޫރުން ކުޅެން އަރައި ފުރަތަމަ 16.2 އޯވަރުގެ ތެރޭގައި ދެ ކުޅުންތެރިން ނުބައިވެގެން 172 ލަނޑު ހަދާ މެޗު ކާމިޔާބުކުރި އެވެ. އެ ޓީމުގެ ދެ އޯޕަނަރުން ކަމަށްވާ ވިރާތް ކޯލީ އާއި ފަފް ޑު ޕްލެސިސް މޮޅު ކުޅުމެއް ދެއްކިއިރު މުމްބާއީ އަށް މީގެ ތެރެއިން ކުޅުންތެރިއެއް ނުބައިކުރެވުނީ މެޗުގެ 15 ވަނަ އޯވަރުގަ އެވެ.
މި އިނިންގްސްގައި މެޗުގެ މޮޅު ކުޅުންތެރިޔާގެ މަގާމް ހޯދި ބެންގަލޫރުގެ ކެޕްޓަން ފަފްް ވަނީ 43 ބޯޅައިން 73 ލަނޑު ހަދައިފަ އެވެ. ވިރާތު ވަނީ ނުބައިނުވެ 49 ބޯޅައިން 82 ލަނޑު ހަދައިފަ އެވެ.
މުބާރާތުގައި މިހާތަނަށް ކޮންމެ ޓީމަކުން ވެސް އެއް މެޗު ކުޅެފައިވާއިރު ޗެމްޕިއަން ގުޖުރާތުން ފެށި ރަނގަޅު މޮޅަކާ އެކުގަ އެވެ. ކޮލްކަތާ ނައިޓް ރައިޑާސް އަތުން ޕަންޖާބު މޮޅުވިއިރު، ލަކްނޯ އިން ވަނީ ޑެލީ ކެޕިޓަލްސް ބަލިކޮށްފަ އެވެ. މިހާތަނަށް މުބާރާތުގައި އެންމެ ބޮޑު ސްކޯއެއް ހޯދި ރާޖަސްތާން ރޯޔަލްސް އިން ވަނީ ބޮޑު ތަފާތަކުން ސަންރައިސާސް ހައިދްރާބާދު ބަލިކޮށްފަ އެވެ.
އިންޑިއަން ޕްރިމިއާ ލީގުގައި މިރޭ ކުޅޭ މެޗުގައި ޗެންނާއީ ސުޕަ ކިންގްސް ނިކުންނާނީ ލަކްނޯ ސުޕަ ޖަޔަންޓްސް އާ ދެކޮޅަށެވެ.
