ނޭޕްލްސް، އިޓަލީ (އޭޕްރީލް 3) - އިޓާލިއަން ލީގުގެ އެއް ވަނައިގައި އޮތް ނަޕޯލީ ދަނޑުގައި ރޭ 4-0 އިން ތަފާތު ބޮޑު މޮޅެއް ހޯދައި އޭސީ މިލާނުން ލީގުގެ ތިން ވަނަ އަށް ޖެހިލައިފި އެވެ. މިއީ މި ފަހަރު ލީގުގައި ނަޕޯލީ އެންމެ ތަފާތު ބޮޑުކޮށް ބަލިވި މެޗެވެ.
މިއީ، 2007-2008 ވަނަ ސީޒަނުގައި އެޓަލަަންޓާ އަތުން ބަލިވި މެޗަށް ފަހު ނަޕޯލީ އެންމެ ފަރަގު ބޮޑުކޮށް ލީގު މެޗަކުން ބަލިވި ފަހަރެވެ. މިލާނާއި ނަޕޯލީ، ޗެމްޕިއަންސް ލީގުގެ ކުއާޓާ ފައިނަލްގެ ދެ ލެގުގައި މި މަހު 12 އާއި 18 ވަނަ ދުވަހު ބައްދަލުކުރާނެ އެވެ.
އިޓާލިއަން ލީގުގެ އެއް ވަަނައިގައި ނަޕޯލީ އަދިވެސް އޮތީ 16 ޕޮއިންޓުގެ ލީޑަކާ އެކު އެވެ. ނަޕޯލީ އަށް ވަނީ 28 މެޗުން 71 ޕޮއިންޓް ލިބިފަ އެވެ. ދެ ވަނައިގައި އޮތް ލާޒިއޯ އަށް ވަނީ 28 މެޗުން 55 ޕޮއިންޓް ލިބިފަ އެވެ. ތިން ވަނަ އަށް ޖެހިލި މިލާނުގެ އޮތީ 28 މެޗުން 51 ޕޮއިންޓެވެ. ހަތަރެއްގައި އޮތް އިިންޓަ މިލާނާއި ފަހެއްގައި އޮތް ރޯމާ އަށް ވަނީ 28 މެޗުން 50 ޕޮއިންޓް ލިބިފަ އެވެ. ރޯމާ، ރޭ ކުޅުނު މެޗުން ވަނީ ސަމްޑޯރިއާ އަތުން 3-0 އިން މޮޅުވެފަ އެވެ.
ނަޕޯލީގެ ޑިއޭގޯ އަރްމާންޑޯ މަރަޑޯނާ ސްޓޭޑިއަމްގައި ކުޅުނު މެޗަށް ނުކުތްއިރު، ނަޕޯލީ އަށް އޮތް އެންމެ ބޮޑު ގޮންޖެހުމަކީ އެ ޓީމަށް ކުޅޭ ނައިޖީރިއާގެ ފޯވާޑް ވިކްޓަ އޮސީމެން އަނިޔާގައި ހުރުމެވެ. އިޓަލީ ލީގުގެ ލަނޑު ލިސްޓު ކުރީގައި އޮތީ އޮސީމެން އެވެ. އޭނާގެ ބަދަލުގައި ނަަޕޯލީގެ ފޯވާޑް ލައިން ބެލެހެއްޓި ޖިއޮވާނީ ސިމިއޯނީ އަށް އެންމެ ރަނގަޅަށް ފުރުސަތުތަކުގެ ބޭނުމެއް ނުހިފުނެވެ.
މިލާނުން ރޭގެ މެޗުގެ ފުރަތަމަ ހާފު ނިންމާލީ ވެސް ދެ ގޯލުގެ ލީޑެއްގަ އެވެ. އެ ގޮތުން މެޗުގެ 17 ވަނަ މިނިޓްގައި ބްރަހިމް ޑިއާޒް ދިން ބޯޅަކަށް ހުސްކޮށް އަރައި، މިލާންގެ ރަފައެލް ލެއާއޯ ވަނީ ހަމަޖެހިލައިފައި ބޯޅަ ގޯލަށް ފޮނުވާލައިފަ އެވެ. މެޗުގެ 25 ވަނަ މިނިޓްގައި ނަޕޯލީގެ ޑިފެންސްތެރެއިން ބްރަހިމް ޑިއާޒަށް ލިބުނު ބޯޅަ ފޮނުވާލުމުން ގޯލަށް ވަނީ ނަޕޯލީގެ ޑިފެންޑަރު، ދެކުނު ކޮރެއާގެ ކިމް މިން ޖައެ ފައިގައި ޖެހިފަ އެވެ.
ދެ ވަނަ ހާފުގެ ކުޅުން ފަށައިގެން 59 ވަނަ މިނިޓްގައި ރަފައެލް ލެއާއޯ ވަނީ މިލާނުގެ ތިން ވަނަ ގޯލު ޖަހައިފަ އެވެ. މިއީ ސަންޑްރޯ ޓޮނާލީ ދިން ބޯޅައަކުން ލެއާއޯ ޖެހި ގޯލެކެވެ. އޭގެ އަށް މިނިޓް ފަހުން، އަލެކްސިސް ސަލަމޭކާ ވަނީ މިލާނުގެ ހަތަރު ވަނަ ލަނޑު ޖަހައިފަ އެވެ.
