އައްޑޫ ސިޓީ އިކުއެޓޯރިއަލް ހޮސްޕިޓަލުން މީހެއްގެ ލޮލުން އެފްރިކަން އައިވޯމްއެއް ނަގައި ކާމިޔާބު އޮޕަރޭޝަނެއް ކޮށްފި އެވެ.
އެފްރިކަން އައި ވޯމް ނުވަތަ "ލޮއިއޭސިސް" އަކީ ޕެރަސައިޓް ފަންޏެއް ކަމަށްވާ ލޮއަ ލޮއާގެ ސަބަބުން ޖެހޭ އިންފެކްޝަނެކެވެ. އެއީ އެފްރިކާއިން ނޫނީ ވަރަށް މަދުން ފެންނަ އެއްޗެކެވެ.
އައްޑޫ އިކުއިޓޯރިއަލް ހޮސްޕިޓަލުން މިއަދު 'އަދަދު' އަށް ބުނީ، އެފްރިކަން އައިވޯމް ފެނިފައި ވަނީ އެ ހޮސްޕިޓަލަށް ދެއްކި ބިދޭސީ ފިރިހެނެއްގެ ލޮލުން ކަމަށެވެ. އޭނާ ޑޮކްޓަރަށް ދެއްކީ ލޯ ރަތްވެ، ހިރުވާ، އެއްޗެއް ލޮލުގައި އުޅޭ ކަހަލަ އިހުސާސެއް ކުރެވޭތީ އެވެ.
ޑޮކްޓަރަށް ދެއްކުމުން އެފްރިކަން އައި ވޯމްއަށް ޑައިގްނޯސްކޮށްފައި ވަނީ، ބަލިމީހާގެ ލޮލުގެ ފެން ފަށަލައިން އެ ފަނި ފެނުމުންނެވެ. އަދި، އޮޕަރޭޝަންކޮށް އެ ފަނި ނަގާފައި ވާއިރު، ބަލިމީހާއަށް ދޭންޖެހޭ އިތުރު ފަރުވާވެސް އައްޑޫ އިކުއިޓޯރިއަލް ހޮސްޕިޓަލުން ދަނީ ފޯރުކޮށްދެމުންނެވެ.
އައްޑޫ އިކުއިޓޯރިއަލް ހޮސްޕިޓަލުގައި މީހެއްގެ ލޮލުން އެފްރިކަން އައި ވޯމް ނެގުމުގެ އޮޕަރޭޝަން ކުރަނީ -- ފޮޓޯ: އޭއީއެޗް
އެ ހޮސްޕިޓަލުން އިތުރަށް ބުނީ، މިއީ ފެނުނު އެފްރިކަން އައި ވޯމްގެ ފުރަތަމަ ކޭސް ކަމަށެވެ. އަދި ޝައްކު ކުރެވޭ މިފަދަ އިތުރު ކޭސް އެއް ވެސް ފެނިފައި ނުވާ ކަމަށް އެ ހޮސްޕިޓަލުން ބުނެ އެވެ.
އެފްރިކަން އައި ވޯމް އަކީ ކޮބާ؟
ލޮއޭސިސް ނުވަތަ އާންމުކޮށް ކިޔާ ނަމުން ނަމަ އެފްރިކަން އައި ވޯމް އަކީ ޕެރަސައިޓް ފަންޏެއް ކަމަށްވާ ލޮއަ ލޮއާގެ ސަބަބުން ޖެހޭ އިންފެކްޝަނެކެވެ. މި ބަލި ޖެހެނީ އިންފެކްޓްވެފައިވާ ޑިއާ ފްލައިސް ކިޔާ ސުއިއްޕެއް ދަތް އެޅުމުންނެވެ. ޑިއާ ފްލައިސް އިންފެކްޓް ވަނީ މި ބަލި ޖެހިފައިވާ މީހެއްގެ ގައިން ލޭ ބޮއެގެންނެވެ.
މިއީ ގައިން ގަޔަށް އަރާ ބައްޔެއް ނޫން ކަމަށްވާއިރު، ފަތުރުވެރިންނަށް މި ބަލި ޖެހެނީ ގިނަ ދުވަސްތަކެއް ވަންދެން ޑިއާ ފްލައިސް އުޅޭ ސަރަހައްދުތަކުގައި އުޅުމުން ކަމަށް ސީޑީސީން ބުނެ އެވެ. ނަމަވެސް، 30 ދުވަހަށް ވުރެ މަދު ދުވަސްކޮޅަކު އެފަދަ ސަރަހައްދެއްގައި އުޅުނު ފަތުރުވެރިންނަށް މަދުން ނަމަވެސް ބަލި ޖެހިފައި އެބަހުއްޓެވެ.
ޑިއާ ފްލައިސްގެ ޒަރިއްޔާއިން އިންސާނުން ގަޔަށް މި ބަލި ޖައްސާ ޕެރަސައިޓް ދަނީ އާންމު ގޮތެއްގައި، ހުޅަނގާއި މެދު އެފްރިކާގެ ޖަންގަލިތައް ހުންނަ ސަރަހައްދުގަ އެވެ. ސީޑީސީން އާންމުކޮށްފައިވާ މައުލޫމާތުތަކުން ދައްކާ ގޮތުގައި ޑިއާ ފްލައިސް އާންމުކޮށް ދަތް އަޅަނީ، ވާރޭ މޫސުމާއި ދުވާލު ގަޑީގަ އެވެ.
މި ބަލި ޖެހިފައިވާ މީހުންނަށް މަސްތަކެއް ވަންދެން އެއްވެސް އަލާމާތެއް ނުފެނި ވެސް ހުރެދާނެ އެވެ. ބަލި ޖެހިފައިވާ މީހުންގެ ގައިގެ އެކި ތަންތަން ހިރުވާ، ދުޅަވެފައި ހުރެދާނެ އެވެ. މިއީ އާންމުކޮށް ހުޅުތައް ކައިރިން ތަދުނުވާ ޒާތެއްގެ ދުޅައެއް ކަމަށްވާއިރު، ބައެއް ފަހަރު ދުޅަ ތިރިވެ، އަނެއްކާވެސް ދުޅަވެ އެވެ.
ބަލި ޖެހިފައިވާ މީހުންގެ ލޮލުގެ ފެން ފަށަލައިގެ ތެރޭގައި، ފަންޏެއް އުފެދެ އެވެ. އަދި، އެ ފަނި ލޯ ތެރޭގައި އުޅޭ ކަމުގެ އިހުސާސް ވެސް ކުރެވޭއިރު، ބަލާ މީހަކަށް ފަނި ފެނުމަކީ ވެސް އެކަށީގެންވާ ކަމެކެވެ.
މަދުން ފެންނަ ބަލީގެ އިތުރު އަލާމާތްތަކުގެ ތެރޭގައި މުޅި ހަށިގަނޑު ހިރުވުމާއި، މަސްތަކާއި، ހުޅުތަކުގައި ރިއްސުން އަދި ވަރުބަލިވުން ހިމެނެ އެވެ.
