ލަންޑަން (އޭޕްރީލް 2) - އިނގިރޭސި ޕްރިމިއާ ލީގަށް ވާދަކުރާ ރޭހުގައި އޮތް އާސެނަލާއި މެންޗެސްޓާ ސިޓީން މިރޭ ކުޅުނު މެޗުތަކުން މޮޅުވެ، ލީގުގެ ވާދަވެރިކަން ބޮޑުވިއިރު، އެސްޓަން ވިލާ އަތްދަށުވެ، ޗެލްސީ ފަހަތަށް ސޮއްސާލައިފި އެވެ.
ސިޓީން ވަނީ ލިވަޕޫލް އަތުން އަމިއްލަ ދަނޑުގައި ފަހަތުން އަރައި 4-1 އިން މޮޅުވެފަ އެވެ. އާސެނަލުން އަމިއްލަ ދަނޑުގައި ލީޑްސް ޔުނައިޓެޑްގެ މައްޗަށް ކުރިހޯދީ 4-1 އިންނެވެ. އަދި އެސްޓަން ވިލާ އިން ވަނީ ޗެލްސީ އަތުން 2-0 އިން މޮޅުވެފަ އެވެ.
މި ނަތީޖާތަކަށް ފަހު އާސެނަލް އެއް ވަނައިގައި އޮތީ އަށް ޕޮއިންޓުގެ ލީޑަކާ އެކު އެވެ. އެއް ވަނައިގައި އޮތް އާސެނަލަށް ވަނީ 29 މެޗުން 72 ޕޮއިންޓް ލިބިފަ އެވެ. ދެ ވަނައިގައި އޮތް ސިޓީ އަށް ވަނީ 28 މެޗުން 64 ޕޮއިންޓް ލިބިފަ އެވެ.
ސިޓީގެ އިއްތިހާދު ސްޓޭޑިއަމްގައި ލިވަޕޫލުން ވަނީ މުހައްމަދު ސަލާހު ޖެހި ގޯލުން 17 ވަނަ މިނިޓްގައި ލީޑުނަަގައިފަ އެވެ. ސަލާހަކީ ލިވަޕޫލަށް ކުޅެމުން އެއް ސީޒަނެއްގެ ހަތަރު މެޗުގައި ސިޓީ ކޮޅަށް ގޯލު ޖެހި ފުރަތަމަ ކުޅުންތެރިޔާ އެވެ. ސިޓީން ވަނީ ފުރަތަމަ ހާފުގައި އެއްވަރުކޮށްފަ އެވެ. އެ ޓީމުގެ ލަނޑު ޖެހީ އާޖެންޓީނާގެ ފޯވާޑް ހޫލިއަން އަލްވަރޭޒް އެވެ. އަލްވަރޭޒަށް މި މެޗުގައި ސިޓީގެ ފުރަތަމަ އެގާރައިން ފުރުސަތު ލިބުނީ އަނިޔާގެ ސަބަބުން އާލިން ބްރައުޓް ހާލަންޑަށް ނުކުޅެވޭތީ އެވެ.
ސިޓީގެ ޖެކް ގްރީލިޝް (ކ) އަތުން ބޯޅަ ހޯދަން ލިވަޕޫލްގެ ޓްރެންޓް އަލެކްސަންޑަ އާނޯލްޑް މަސައްކަތްކުރަނީ
ދެ ވަނަ ހާފްގެ ކުޅުން ފެށިގެން 53 ސިކުންތު ހިނގިތަނާ ސިޓީން ލީޑުނެގި އަލްވަރޭޒް ނެގި ހުރަހަކުން ކެވިން ޑިބްރޭނާ ޖެހި ގޯލުންނެވެ. ލިވަޕޫލް ޑިފެންސް ތެރެއިން ސަލާމަތްނުކުރެވިދިޔަ ބޯޅައެއް ހޯދައި، މެޗުގެ 53 ވަަނަ މިނިޓްގައި އިލްކާއި ގުންޑޮގާން ސިޓީގެ ތިން ވަނަ ގޯލު ޖެހި އެވެ. އަދި މެޗުގެ 74 ވަނަ މިނިޓްގައި ޑިބްރޭނާ ދިން ބޯޅައަކުން ސިޓީގެ ފަހު ގޯލު ޖެހީ މެޗުގައި މޮޅު ކުޅުމެއް ދެއްކި ޖެކް ގްރީލިޝް އެވެ.
މިއީ މި ފަހަރު ލީގުގައި ސިޓީން ޖެހިޖެހިގެން ހަތަރު މެޗުން މޮޅުވި ފުރަތަމަ ފަހަރެވެ. އަނެއްކޮޅުުން، މެޗެއްގައި ލީޑުނެގުމަށް ފަހު ލިވަޕޫލް ބަލިވި ފުރަތަމަ ފަހަރު ވެސް މެ އެވެ.
ލީޑްސް ކައިރިން އާސެނަލަށް ލީޑުނަގައިދިނީ ޕެނަލްޓީ އަކުން ގަބްރިއެލް ޖީސޫސް އެވެ. މިއީ ލީޑްސްގެ ލޫކް އެއިލިން އޭރިއާތެރެއިން ޖީސޫސް އަށް ކުރި ފައުލަކަށް ދިން ޕެނަލްޓީ އެކެވެ. ދެ ވަނަ ހާފުގެ ކުޅުން ފެށިގެން ދެ މިނިޓް ތެރޭ ބެން ވައިޓް ވަނީ އާސެނަލްގެ ލީޑުފުޅާކޮށްދީފަ އެވެ. މެޗުގެ 55 ވަނަ މިނިޓްގައި ލެއަންޑްރޯ ޓްރޮސާޑް ދިން ބޯޅައަކުން ޖީސޫސް ވަނީ އާސެނަލަށް އިތުރު ގޯލެއް ޖަހައިދީފަ އެވެ.
އާސެނަލަށް ހެދުނު ގޯހެއްގެ ފައިދާނަގައި މެޗުގެ 76 ވަަނަ މިނިޓްގައި ލީޑްސްގެ ރަސްމުސް ކްރިސްޓެންސަން ވަނީ އެ ޓީމަށް ގޯލެއް ޖަހައިދީފަ އެވެ. އޭގެ ފަހުން، މެޗުގެ 84 ވަނަ މިނިޓްގައި އާސެނަލްގެ ފަހު ގޯލު ޖެހީ ގްރޭނިޓް ޝަކާ އެވެ.
ޗެލްސީ ދަނޑުގައި ފުރަތަމަ ހާފުގައި އެސްޓަން ވިލާ އިން ލީޑުނެގީ އޮލީ ވަޓްކިންސް ޖެހި ގޯލުންނެވެ. މިއީ، ޗެލްސީގެ މާކް ކުކުރޭލާ ހެދި ގޯހަކުން ޖެހި ގޯލެކެެވެ. ދެ ވަނަ ހާފުގައި އޭރިއާބޭރުން އެސްޓަން ވިލާގެ ޖޯން މެކްގިން ވަނީ އިތުރު ގޯލެއް ޖަހައިފަ އެވެ. މި މެޗުގައި ޗެލްސީން ގޯލެއް ޖަހަން ކުރި މަސައްކަތް ހުއްޓުވުމުގައި އެސްޓަން ވިލާގެ ކީޕަރު، އާޖެންޓީނާގެ އެމިލިއާނޯ މާޓީނޭޒް އިސް ރޯލެއް ކުޅެފައިވެ އެވެ.
މި ނަތީޖާއާ އެކު ޗެލްސީ ވަނީ ލީގުގެ 11 ވަނަ އަށް ވެއްޓިފަ އެވެ. ޗެލްސީ ފަހަތަށް ޖައްސާލައި އެސްޓަން ވިލާ ވަނީ ކުރިއަށް ޖެހިލައިފަ އެވެ. ނުވަ ވަނައިގައި އޮތް އެސްޓަން ވިލާ އަށް 28 މެޗުން 41 ޕޮއިންޓް ލިބިފައިވާއިރު، 10 ވަނައިގައި އޮތް ފުލަމް އަށް ވަނީ 28 މެޗުން 39 ޕޮއިންޓް ލިބިފަ އެެވެ. ޗެލްސީ 11 ވަނައިގައި އޮތީ 28 މެޗުން 38 ޕޮއިންޓާ އެކު އެވެ.
