ކުރިއަށް އޮތް ރިޔާސީ އިންތިހާބުގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް، ރައީސް އިބްރާހިމް މުހައްމަދު ސޯލިހަށް ތާއީދު ކުރަން ނިންމައިފި އެވެ.
ގާސިމްގެ ވަރަށް ގާތް ބޭފުޅެއް ކަމަށްވާ ޑރ. މައުސޫމް މިނިސްޓަރު ކަމުގައި ހުންނަވަނީ ޖުމްހޫރީ ޕާޓީގެ ސްލޮޓެއްގަ އެވެ.
އަންނަ ރިޔާސީ އިންތިހާބުގައި ވަކިން ވާދަކުރަން ނިންމުމުން، މިހާރު ސަރުކާރުގައި ތިބި ޖުމްހޫރީ ޕާޓީގެ ބައެއް މެމްބަރުން އަންނަނީ ޕާޓީން ވަކިވަމުންނެވެ.
މި ދަނޑިވަޅުގައި މައުސޫމް ކުރެއްވި ޓްވީޓެއްގައި ވިދާޅުވީ މިއީ ދިވެހި ރައްޔިތުންނާއި ދައުލަތަށް އެންމެ ފައިދާ ހުރި ގޮތް ކަމަށްވާތީ ނިންމި ނިންމުމެއް ކަމަށެވެ.
ރައީސް ސޯލިހާއެކު ބައިއަތު ހިފިނަމަވެސް މައުސޫމް މިހާތަނަށް ޖޭޕީން ވަކިވެފައި ނުވެ އެވެ.
ޖުމްހޫރީ ޕާޓީ ވަކިން އިންތިހާބަށް ނުކުތުމަށް ނިންމުމާއެކު، ޕާޓީން ވަކިވި މެންބަރުންގެ ތެރޭގައި ރައީސް އޮފީހުގެ މިނިސްޓަރަކަށް ހުންނެވި އެ ޕާޓީގެ ކުރީގެ ސެކްރެޓަރީ ޖެނެރަލް އަހުމަދު ސަމީރާއި، ހެރިޓޭޖު މިނިސްޓްރީގެ ޑެޕިއުޓީ މިނިސްޓަރު ވަލީދާ ވަލީދާ، އެމްޓީސީސީގެ ސީއީއޯ އާދަމް އާޒިމް، އެމްޑަބްލިޔޫއެސްސީގެ މެނޭޖިން ޑިރެކްޓަރު ހުސައިން ޝާހު، އިމިގްރޭޝަން ކޮންޓްރޯލާ މުހައްމަދު އަހްމަދު (ހަނަފީ) ހިމެނެ އެވެ.
އަންނަ ރިޔާސީ އިންތިހާބުގައި ވާދަކުރަން ޖޭޕީގެ ޕްރައިމަރީއަށް ގާސިމް އެކަނި ކުރިމަތިލުމާއެކު ޕާޓީގެ ރިޔާސީ ޓިކެޓު ވަނީ އެމަނިކުފާނަށް ޔަގީންވެފަ އެވެ.
ރައީސް ސޯލިހާއެކު ކޯލިޝަން ނުހަދައި ޖޭޕީން ވަކިން ވާދަކުރާއިރު، އެ ޕާޓީއަށް ތާއިދުކުރާނެކަމަށް ކުރީގެ ރައީސް މުހައްމަދު ނަޝީދު، އެމްޑީޕީގެ ތެރެއިން އުފައްދާފައިވާ "ފިކުރެއްގެ ދިރުން" ފެކްޝަނުން ވަނީ އިއުލާނުކޮށްފަ އެވެ.
