ޕެރިސް (އޭޕްރީލް 1) - ފްރާންސްގެ ފުޓްބޯޅަ ލީގުތަކުގެ މެޗުތަކުގައި ކުޅުންތެރިންނަށް ރޯދަ ވީއްލުމުގެ ފުރުސަތު ދިނުމުގެ ގޮތުން މެޗުތައް ނުހުއްޓުވުމަށް ފްރާންސްގެ ފުޓްބޯޅަ ފެޑަރޭޝަނުން އެ ގައުމުގެ ރެފްރީންނަށް އަންގާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ފްރާންސްގެ ފުޓްބޯޅަ ލީގުތަކުގެ ބައެއް މެޗުތަކުގައި ރެފްރީން ވަނީ ރޯދަ ވީއްލުމުގެ ފުރުސަތު މުސްލިމް ކުޅުންތެރިންނަށް ދިނުމުގެ ގޮތުން މެޗުގެ ކުޅުން މެދުކަނޑާލައި، ކުޑަ ވަގުތު ކޮޅެއް ދީފަ އެވެ. މިކަން އޮތީ ފްރާންސް ފުޓްބޯޅަ ފެޑަރޭޝަނަށް ފާހަގަވެފަ އެވެ.
މީޑިއާ ރިޕޯޓްތަކުން ބުނާގޮތުގައި ފްރާންސްގެ ފުޓްބޯޅަ ފެޑަރޭޝަންގެ ރެފްރީޒް ކޮމިޝަންގެ ހެޑް އެރިކް ބޮރްގީނީ ވަނީ މެޗުތަކުގައި ރޯދަ ވީއްލުމުގެ ފުރުސަތު ނުދިނުމަށް އީ-މެއިލް މެދުވެރިކޮށް ހުރިހާ ރެފްރީންނަށް އަންގައިފަ އެވެ.
އެ އީ-މެއިލްގައި ބޮރްގީނީ ބުނެފައިވަނީ ރޯދަ ވީއްލުމަށް ފުރުސަތު ދިނުމުގެ ގޮތުން މެޗުތަކުގެ ކުޅުން މެދުކަނޑާލުމަކީ ފްރާންސްގެ ފުޓްބޯޅައިގެ ގަވައިދުތަކާ ހިލާފު ކަމެއް ކަމަށެވެ.
މިކަމާ ގުޅޭ ގޮތުން ނީސްގެ ކޯޗު ޑިޑިއޭ ޑިގާޑް ބުނީ މެޗުތަކުގެ ތެރެއިން ރޯދަ ވީއްލުމުގެ ފުރުސަތު ނުދިނަސް، ގިނަ ކުޅުންތެރިން މީގެ ކުރިން ވެސް ރޯހަ ހިފާ ކަމަށެވެ.
"އެއީ މާބޮޑު ކަމަކަށް ނުހަދަން. އެއީ އަހަރެން މި ތިބީ މުސްލިމް ގައުމެއްގައެއް ނޫން. އެ ގައުމެއްގެ އޮންނަ އުސޫލުތަކަށް އިހުތިރާމް ކުރަންޖެހޭނެ،" ޑިގާޑް ބުންޏެވެ.
ފްރާންސްގެ ފެޑަރޭޝަނުން މި ގޮތަށް އެންގި ނަމަވެސް، އިނގިރޭސި ޕްރިމިއާ ލީގުން ވަނީ ރަމަޟާން މަހު ކުޅޭ މެޗުތަކުގެ ތެރެއިން މުސްލިމް ކުޅުންތެރިންނަށް ރޯދަ ވީއްލުމުގެ ފުރުސަތު ދިނުމުގެ ގޮތުން ވަގުތުކޮޅެއް ދިނުމަށް ނިންމައިފަ އެވެ. އަދި ޖަރުމަނު ލީގާއި ނެދަލެންޑްސް ލީގުގައި މިކަން ވަނީ ރެފްރީންގެ އިހުތިޔާރީ ކަމެއްގެ ގޮތުގައި ދޫކޮށްލައިފަ އެވެ.
