ޕެރިސް (އޭޕްރީލް 1) - ލިއޮނަލް މެސީ އަލުން ގެނެވޭތޯ ބާސެލޯނާ އިން މަސައްކަތް ކުރަމުން އަންނަ ކަމަށް އެ ކްލަބްގެ ނައިބު ރައީސް ރަފައެލް ޔޫސްޓޭ ވިދާޅުވެފައިވަނިކޮށް، ޕީއެސްޖީން ވެސް މެސީގެ ކޮންޓްރެކްޓް އާ ކުރަން މަޝްވަރާ ކުރަމުން އަންނަ ކަމަށް އެ ޓީމުގެ ކޯޗު ކްރިސްޓޮފް ގަލްޓިއޭ ބުނެފި އެވެ.
މީގެ ދެ އަހަރު ކުރިން، މެސީ، 35، ބާސެލޯނާ ދޫކޮށްލަން ޖެހުނީ އެ ކްލަބްގެ މާލީ ހާލަތު އަޑިއަޅާލާފައި އޮތް ދަނޑިވަޅެއްގައި ކޮންޓްރެކްޓް އާ ކުރެވޭނެ އެއް ގޮތެއް ވެސް ނުހޯދުމުންނެވެ. އެ ފަހަރު، މެސީ ޕީއެސްޖީ އަށް ބަދަލުވީ ދެ އަހަރުގެ ކޮންޓްރެކްޓެއްގަ އެވެ. އެ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ.
"އަހަރެެމެން މެސީ ގެނެވޭތޯ މަސައްކަތް ކުރަން. ހަމަގައިމު ވެސް އަހަރެންގެ ހިތުގައި މެސީ އަށް އޮތް ގަދަރާއި ބާސެލޯނާ ސަޕޯޓަރުން މެސީ ދެކެ ވާ ލޯބި އެ ދަނީ އަދިވެސް ފެންނަމުން، އަހަރެމެން މެސީ ގެނެވޭތޯ މަސައްކަތްކުރަން،" ސްޕެއިނުގެ މީޑިއާ އަށް ދިން އިންޓަވިއުއެއްގައި ޔޫސްޓޭ ވިދާޅުވި އެވެ.
ބާސެލޯނާގައި ހޭދަކުރި 17 އަހަރު ތެރޭގައި މެސީ ވަނީ އެ ޓީމަށް 778 މެޗުން 672 ގޯލު ޖަހައިފަ އެވެ. މެސީ އަލުން ބާސެލޯނާ އަށް ދާން އުޅޭ ވާހަކަތައް މީޑިއާގައި ދެކެވުމާ އެކު، އެކަމާ ގުޅޭ ސުވާލުތައް ޕީއެސްޖީގެ ކޯޗު ގަލްޓިއޭ އަށް ވެސް ވަނީ އަމާޒުވެފަ އެވެ.
"މެސީގެ ކޮންޓްރެކްޓާ ބެހޭގޮތުން ވާހަކަ ދައްކަން އަދި ވަރަށް އަވަސް. އަހަންނަށް ވަރަށް ރަނގަޅަށް އެނގޭ، މެސީ އާއި ޕީއެސްޖީ ބޯޑުން އަންނަނީ މަޝްވަރާތަކެއް ބާއްވަމުން. މެސީ، ޕީއެސްޖީގައި އަންނަ ސީޒަނުގައި ވެސް މަޑުކުރަން ނިންމާނީ ދެ ފަރާތުން ވެސް ރުހޭ ގޮތަށް އެއްބަސްވެގެން، މެސީ ޕީއެސްޖީގައި ހުރީ އުފަލުން،" މެސީގެ މުސްތަގުބަލާ ގުޅޭގޮތުން ކުރި ސުވާލަކަށް ޖަވާބު ދެމުން ގަލްޓިއޭ ބުންޏެވެ.
ދާދި ފަހުން ފީފާގެ ބެސްޓް އެވޯޑްސްގައި ހޮވި އެންމެ މޮޅު ކުޅުންތެރިޔާގެ މަގާމު ހޯދި މެސީ ގެންދަން އިޓަލީގެ އިންޓަ މިލާނުން މަސައްކަތް ކުރާ ކަމަށް ވެސް ރިޕޯޓްތައް ބުނެ އެވެ. އޭގެ އިތުރުން، ސައުދީ އަރަބިއްޔާގެ އަލް ހިލާލް އިން ރެކޯޑް މުސާރަ އަކަށް މެސީގެ ސޮއި ހޯދޭތޯ ވާހަކަ ދައްކަމުން އަންނަ ކަމަށް ވެސް މީޑިއާގައި ވަނީ އަޑުފެތުރިފަ އެވެ.
