މެންޗެސްޓާ (އޭޕްރީލް 1) - މި ސީޒަނުގައި ފޯމު ގެއްލި ނަތީޖާ އެއް ފެންވަރެއްގައި ދެމެހެއްޓުމުގައި ގިނަ މައްސަލަތަކެއް ދިމާވެފައިވާ ލިވަޕޫލުން މިހާރު އޮތް ހާލަތު ބަދަލުކޮށް، އަންނަ ސީޒަނުގައި ކަންކަން ރަނގަޅު ކުރަން ބޭނުންނަމަ އޮތް ހަމައެކަނި ގޮތަކީ ޓީމު ވަރުގަދަކުރަން ހަރަދުކުރުން ކަމަށް އެ ޓީމުގެ ކޯޗު ޔާގެން ކްލޮޕް ބުނެފި އެވެ.
މިދިޔަ ސީޒަނުގެ ހަތަރު މުބާރާތަށް ވާދަކުރި، ލިވަޕޫލް ސީޒަން ނިންމާލީ އެފްއޭ ކަޕާއި ލީގު ކަޕް ކާމިޔާބުކޮށްގެންނެވެ. މި ސީޒަން ފެށިއިރު، އެފްއޭ ޗެރިޓީ ޝީލްޑް ކާމިޔާބުުކުރި ލިވަޕޫލަށް ސީޒަނުގެ ތެރޭގައި ގިނަ މައްސަލަތަކެއް ދިމާވިއިރު، އެއްވެސް މުބާރާތެއްގެ ތަށި ނުލިބި ސީޒަން ނިންމާލަން ޖެހޭނެކަން ވަނީ ޔަގީންވެފަ އެވެ.
ލިވަޕޫލަށް މި ސީޒަނުގައި ގިނަ މައްސަލަތަކެއް ދިމާވި ކަމަށް އެ ޓީމުގެ ކޯޗު ކްލޮޕް ވެސް ވަނީ އެއްބަސްވެފަ އެވެ.
"މި ވަގުތު ހަމައެކަނި ހިތްހަމަޖެހޭ ކަމަކަށް އޮތީ، އަންނަ ސީޒަނުގެ ޗެމްޕިއަންސް ލީގަށް ކޮލިފައިވެވޭ ހިސާބުގައި ޓީމު އޮތުން،" ކްލޮޕް ބުންޏެވެ. "ޔަގީންކަމާ އެކު ބުނަން އެނގޭ އެއް ވާހަކަ އަކީ، އަހަރެމެން ދިމާވި މައްސަލަތަކަށް އެކަށީގެންވާ ހައްލެއް ނުހޯދޭ، އޭގެ ވާހަކަ ދެއްކުމުގެ މާނައެއް ދެން ނެތް، އަހަރެމެން މި އަންނަނީ އަންނަ ސީޒަނަށް ވެސް ތައްޔާރުވަމުން، އެކަން ކުރަން ބަލާއިރު ޔަގީނުން ވެސް ޓީމު ވަރުގަދަ ކުރަން ހަރަދުކުރަން ޖެހޭ،"
ކްލޮޕް ބުނީ ލިވަޕޫލުން ހަރަދުކުރަނީ ކިހާ ވަރަކަށްތޯ، ކިތަށް ކުޅުންތެރިންނަށްތޯ އެ ފަދަ ސުވާލުތަކަށް މި ވަގުތު ޖަވާބު ދިނުމަކީ ވާނެ ކަމެއް ނޫން ކަމަށެވެ. ޔަގީންކަމާ އެކު ބުނަން އެނގޭ އެއް ވާހަކަ އަކީ، ލިވަޕޫލްގައި މިހާރު އޮތް ޓީމަށް ބަދަލު އަންނަން ޖެހޭކަން ކަމުގައި ކްލޮޕް ވަނީ ބުނެފަ އެވެ.
"ވާދަވެރި އެހެން ޓީމުތަކުން ވެސް އެ އަންނަނީ ހަރަދުކޮށްގެން ޓީމު ވަރުގަދަކުރަމުން. އަހަރެމެން ވެސް އެ ހިސާބުގައި ހިފެހެއްޓޭނީ ހަރަދުކޮށްގެން،" މީގެ ކުރިން ޓީމުތަކުގެ ހަރަދުކުރުމުގެ ވައްޓަފާޅި އަށް ފާޑުކިޔާފައިވާ ކޯޗު ކްލޮޕް ބުންޏެވެ.
ބައިނަލްއަގުވާމީ މެޗުތަކަށް ފަހު، އިނގިރޭސި ޕްރިމިއާ ލީގުގެ ކުޅުން މިއަދު ފަށާއިރު، ލިވަޕޫލުން ރަށުންބޭރުގައި ބައްދަލުކުރާނީ މެންޗެސްޓާ ސިޓީއާ އެވެ. އެ މެޗު ފަށާނީ ރާއްޖެ ގަޑިން ހަވީރު 16:30 ގަ އެވެ.
