މެންޗެސްޓާ (މާޗް 31) - މެންޗެސްޓާ ސިޓީގެ ފޯވާޑް އާލިން ބްރައުޓް ހާލަންޑް އެއްކޮށް ފިޓް ނުވާނަމަ، އިނގިރޭސި ޕްރިމިއާ ލީގުގައި މާދަމާ ސިޓީން ލިވަޕޫލާ ދެކޮޅަށް ކުޅޭ މެޗުގައި ހާލަންޑް ރިސްކުނުކުރާނެ ކަމަށް ރިޕޯޓްތައް ބުނެފި އެވެ.
ބައިނަލްއަގުވާމީ މެޗުތަށް ކުޅެން ގައުމީ ޓީމަށް ކުޅުންތެރިން ވީއްލުމުގެ ކުރިން ސިޓީގެ ކުޅުންތެރިން ހެދި ޓެސްޓްތަކުގައި ހާލަންޑް، 22، އުކުޅުވަޅަށް އަނިޔާވެފައިވާތީ، ސިޓީގެ ލަފާގެ މަތިން ނޯވޭ ގައުމީ ޓީމަށް އޭނާ ނުނަގަ އެވެ. އޭރު ބެލެވުނީ، އިންޓަނޭޝަަލް ބްރޭކަށް ފަހު އަލުން ފަރިތަކުރުންތައް ފަށާއިރު، ހާލަންޑަށް ސިޓީ ޕްރެކްޓިހުގައި ބައިވެރިވެވޭނެ ކަމަށެވެ.
އެކަމަކު، ސިޓީން ބުރާސްފަތި ދުވަހު ބޭއްވި އެއްވެސް ޓްރެއިނިން ސެޝަނެއްގައި ހާލަންޑް ބައިވެރިނުވެ އެވެ.
އިނގިރޭސި ކުޅިވަރު މީޑިއާ ސްކައިސްޕޯޓްސް އިން ރިޕޯޓްކުރާގޮތުގައި ހާލަންޑަށް މި ހަފްތާގައި ލިވަޕޫލާ ދެކޮޅަށް ކުޅެވުމުގެ ފުރުސަތު އެއްކޮށް ނުގެއްލެ އެވެ.
ސިޓީން އަދިވެސް ބަލަނީ ލިވަޕޫލާ ދެކޮޅަށް ކުޅޭ މެޗުގައި ހާލަންޑް ބޭނުންކުރުމަށް ކަމަށާއި އެކަމަކު، އެއްކޮށް ފިޓްނުވާނަމަ ހާލަންޑް މި މެޗުގައި ލިވަޕޫލާ ދެކޮޅަށް ނުކުޅުވަން ސިޓީގެ މެޑިކަލް ޓީމުން ނިންމާފައިވާ ކަމަށެވެ.
ބޮރޫޝިއާ ޑޯޓްމަންޑް ދޫކޮށް ސިޓީ އަށް މި ސީޒަނުގައި ބަދަލުވި ހާލަންޑް ވަނީ އެ ޓީމަށް 37 މެޗުން 42 ގޯލު ޖަހައިފަ އެވެ. އިންޓަނޭޝަނަލް ބްރޭކުގެ ކުރިން އެންމެ ފަހުން ސިޓީން ކުޅުނު ދެ މެޗުގައި އެކަނި ވެސް ހާލަންޑް ވަނީ އަށް ގޯލު ޖަހައިފަ އެވެ. އެހެންކަމުން، ހުރި ފޯމަށް ބަލާއިރު، ސިޓީ އަށް ލިވަޕޫލް މެޗުގައި ހާލަންޑް ބޭނުންްކުރެވުމަކީ ފައިދާނެގޭނެ ކަމެކެވެ.
