ލަންޑަން (މާޗް 28) - ޖަރުމަނުގެ ބޮރޫޝިއާ ޑޯޓްމަންޑަށް ކުޅެމުން އަންނަ އިނގިރޭސި މިޑްފީލްޑަރު، ޖޫޑް ބެލިންހަމްގެ މުސްތަގުބަލާ ގުޅޭގޮތުން ނިންމުމެއް ނިންމަން އެއްވެސް ފަރާތެއްގެ ޕްރެޝަރެއް އޮތް ކަމަށް ގަބޫލުނުކުރެވޭ ކަމަށް އޭނާއާ އެކު އިންގްލެންޑް ޓީމަށް ކުޅެމުން އަންނަ މިޑްފީލްޑަރު، ޖޯޑަން ހެންޑަސަން ބުނެފި އެވެ.
ބެލިންހަމް، 19، ޑޯޓްމަންޑާ އެކު ހަދާފައިވާ ކޮންޓްރެކްޓްގައި ބާކީ ދެ އަހަރެއްހާ ދުވަސް އޮތް ނަމަވެސް، މި ސީޒަނަށް ފަހު އޭނާ އެ ޓީމު ދޫކޮށްލާނެ ކަމަށް މީޑިއާ ރިޕޯޓްތައް ބުނެ އެވެ.
ޑިމާންޑް ބޮޑު ކުޅުންތެރިއެއްގެ ގޮތުގައި އޮތް، ބެލިންހަމްގެ ސޮއި ހޯދަން ރެއާލް މެޑްރިޑާއި މެންޗެސްޓާ ސިޓީ، މެންޗެސްޓާ ޔުނައިޓެޑް އަދި ލިވަޕޫލުން މަސައްކަތް ކުރެ އެވެ.
ލިވަޕޫލްގެ ކެޕްޓަން، ހެންޑަސަން ވަނީ ބެލިންހަމްގެ މުސްތަގުބަލާ ގުޅޭ ނިންމުން ނިންމަން ޖެހޭނީ ވަރަށް ވިސްނާފައި ކަމަށް ބުނެފަ އެވެ. އަދި ފެންނަ ފެނުމަށް އެ ނިންމުން ނިންމަން ބެލިންހަމް އަށް މާ ބޮޑު ޕްރެޝަރުތަކެއް ނެތް ކަމަށް ވެސް ހެންޑަސަންގެ ވާހަކައިގައި ވަނީ ފާހަގަކޮށްފަ އެވެ.
"އަހަރެން ބޭނުމީ ބެލިންހަމް އަށް މީގެ އެންމެ ރަނގަޅު ގޮތްވުން. އޭނާގެ އެ ހުރި ހުނަރުގެ ބޭނުންކޮށްގެން އެންމެ މޮޅު ކުޅުންތެރިޔާ އަށް ވާތަން ދެކެން އަހަރެން ބޭނުން، ދެން، މިސާލަކަށް އެއީ އޭނާ ލިވަޕޫލަށް އައިސްގެން ކަމަށްވާނަމަ އެއީ އަހަރެމެންނަށް ވަރަށް ރަނގަޅު ނިންމުމަކަށް ވާނެ، އެކަމަކު، ވަކި ގޮތަކަށް ނިންމަން ބެލިންހަމް އަށް ޕްރެޝަރެއް ނެތް،" ހެންޑަސަން ބުންޏެވެ.
ހެންޑަސަން ބުނީ ބެލިންހަމް މިހާރު އެ ހުރި އުމުރަށް ބަލާއިރު، ދެން އޭނާ ބަދަލުވާ ކްލަބް ވާން ޖެހޭނީ ކެރިއަރުގެ އެންމެ "ޕީކް" އަހަރުތަކުގައި އެންމެ ރަނގަޅު ކުރިއެރުންތައް ހޯދޭނެ ޓީމަށް ކަމަށެވެ.
ސްޕެއިނުގެ މީޑިއާ ރިޕޯޓްތައް ބުނާ ގޮތުގައި، ޑޯޓްމަންޑުން ބެލިންހަމް ވިއްކާލަން ކިޔާ އަގުބޮޑުވުމުން ރެއާލުން ބެލިންހަމް ހޯދުމުގެ ރޭހުން ބޭރުވުމުގެ ފުރުސަތު އެބައޮތެވެ. ބާމިންހަމް ސިޓީ ދޫކޮށް 2020 ވަނަ އަހަރު ޑޯޓްމަންޑާ ގުޅުނު ބެލިންހަމް ވިއްކާލަން ކިޔާ އަގު އުޅެނީ 130-150 މިލިއަން ޑޮލަރުގަ އެވެ.
