ޗައިނާއިން ހުށަހެޅި ސުލްހައިގެ ޕްލޭނަކީ ޔޫކްރެއިން ހަނގުރާމަ ނިންމުމުގެ ބިންގަލެއްގެ ގޮތުގައި ބޭނުންކުރެވިދާނެ ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
އެހެން ނަމަވެސް އެ ޕްލޭނަށް އަމަލުކުރެވޭނީ ހުޅަނގުގެ ގައުމުތަކާއި ޔޫކްރެއިނުން އެކަމަށް ތައްޔާރުވުމުން ކަމަށް ޕުޓިން ވިދާޅުވި އެވެ.
ޗައިނާގެ ރައީސް ޝީ ޖިންޕިން ރަޝިއާއަށް ކުރައްވާ ދަތުރުގައި ޕުޓިންއާ އެކު ރަސްމީ މަޝްވަރާތައް އޮތީ އަންގާރަ ދުވަހު މޮސްކޯގަ އެވެ. ދެ ގައުމުގެ ގުޅުމުގެ އިތުރުން ޔޫކްރެއިން ހަނގުރާމައާ ބެހޭ މަޝްވަރާ ކުރެއްވި އެވެ.
ސުލްހަ ގެނައުމަށް ޗައިނާއިން މިދިޔަ މަހު އެކުލަވާލި ޕްލޭނުގައި ރަޝިއާގެ ސިފައިން ޔޫކްރެއިނުން ފޭބުމަށް ބާރުއަޅާފައި ނެތް ކަމަށް ބުނެ އެމެރިކާއިން ކަންބޮޑުވެ އެވެ.
ބާރަ ނުކުތާ ހިމެނޭ ޕްލޭނުގައި ބާރުއަޅަނީ ސުލްހައިގެ މަަޝްވަރާ ފެށުމަށާއި ކޮންމެ ގައުމަކުން ވެސް އަނެއް ގައުމުގެ އިސްތިގްލާލަށް އިހްތިރާމް ކުރުމަށެވެ.
ޔޫކްރެއިނުން ބުނަމުން ދަނީ ސުލްހައިގެ މަޝްވަރާ ފެށޭނީ ވެސް ރަޝިއާގެ ސިފައިން އެ ގައުމުގެ ސަރަހައްދުން ފޭބުމުން ކަމަށެވެ.
އަންގާރަ ދުވަހު ދެ ލީޑަރުންގެ ރަސްމީ މަޝްވަރާއަށް ފަހު ޝީ ވިދާޅުވީ ޗައިނާގެ ސަރުކާރުން ބޭނުންވަނީ ސުލްހަ އާއި މަޝްވަރާ އިސްކޮށް "ރަނގަޅު ފަޅީގައި އޮވެގެން ތާރީހުގެ ތެރެއަށް ދާން" ކަމަށެވެ.
ޝީ ތަކުރާރުކޮށް ވިދާޅުވީ ޔޫކްރެއިން ހަނގުރާމައިގައި ޗައިނާއިން ވަކި އަތަކަށް ނުޖެހޭ ކަމަށާއި ސުލްހަ ގެނައުމުގެ މެދުވެރިއެއްގެ ގޮތުގައި އޮންނަން ޗައިނާ ބޭނުންވާ ކަމަށެވެ.
