ސްރީލަންކާއަށް މިނިވަންކަން ލިބުނު ފަހުން ކުރިމަތިވެފައިވާ އެންމެ ބޮޑު އިގުތިސާދީ ކާރިސާއިން އަރައިގަތުމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ ބެއިލްއައުޓް ޕެކޭޖުގެ ދަށުން ތިން ބިލިއަން ޑޮލަރު ލިބޭނެކަން ޔަގީންވެއްޖެ އެވެ.
އައިއެމްއެފްގެ އެހީ ހޯދަން ސްރީލަންކާއިން މަސައްކަތް ކުރާތާ ގާތްގަނޑަކަށް އަހަރެއް ވެއްޖެ އެވެ. އެތައް ބިލިއަން ޑޮލަރުގެ ދަރަނި ދައްކަން ޖެހޭ ސްރީލަންކާއަށް އައިއެމްއެފް އެހީއަކީ ބޮޑު އުއްމީދެކެވެ.
ފޮރިން މިނިސްޓަރު އަލީ ސަބްރީ ބީބީސީއަށް ވިދާޅުވީ ސަރުކާރުން އިތުރު ފައިސާ ހޯދަން ރާވާފައި ވަނީ ދައުލަތުގެ ކުންފުނިތައް ރީސްޓްރަކްޗާކޮށް، ގައުމީ އެއާލައިން ޕްރައިވަޓައިޒްކޮށްގެން ކަމަށެވެ.
އެހެން ނަމަވެސް އެނެލިސްޓުން ލަފާދޭ ގޮތުގައި ސްރީލަންކާއަށް އަދިވެސް ގޮންޖެހުންތައް ގިނަ އެވެ. ކޮވިޑް ބަލިމަޑުކަމުގެ ސަބަބުން އިގުތިސާދަށް ބޮޑު ގެއްލުމެއް ލިބުނު އިރު، ކަރަންޓާއި ތެލުގެ އަގު އުފުލި، އިންފްލޭޝަން 50 ޕަސެންޓަށް މަތިވި އެވެ.
ރައްޔިތުންނަށް ދިމާވަމުން ދިޔަ ދަތިތަކާ ހެދި މުޒާހަރާކޮށް 2022 ވަނަ އަހަރު ސަރުކާރު ބަދަލުކުރި އެވެ. ލަންކާއިން ޑޮލަރު ހުސްވެ، އެ ގައުމުގެ ތާރީހުގައި ފުރަތަމަ ފަހަރަށް ދަރަނިތައް ޑީފޯލްޓުވީ މިދިޔަަ މޭ މަހު އެވެ.
އާއްމުންނަށް ގޮންޖެހުން ދިމާވަމުން ދިޔަ ނަމަވެސް ޓެކްސް އިތުރުކޮށް ފައިސާ ހޯދޭނެ ގޮތްތައް ސަރުކާރުން ދަނީ ހަދަމުންނެވެ. އެގޮތުން މި އަހަރުގެ ކުރީކޮޅު ޕްރޮފެޝަނަލް ވަޒީފާތަކުގައި އުޅޭ މީހުންގެ އަތުން 12.5 ޕަސެންޓުން ފެށިގެން 36 ޕަސެންޓާ ހަމައަށް އިންކަމް ޓެކްސް ނަގަން ނިންމި އެވެ.
އޭގެ އިތުރުން ވެސް ގައުމަށް ބޭނުންވާ ތަކެތި އިމްޕޯޓް ކުރަން ފައިސާ ހޯދުމުގެ ގޮތުން ތެލާއި ކާބޯތަކެތިން ނަގާ ޓެކްސް ވެސް މަތިކުރި އެވެ.
އެއާ ހިލާފަށް، މިދިޔަ އަހަރު އިސްތިއުފާ ދޭން މަޖުބޫރުވި ރައީސް ގޮތަބަޔާ ރާޖަޕަކްސަގެ ސަރުކާރުގައި އޮތީ ޓެކްސް ކުޑަކޮށްފަ އެވެ. އޭގެ ސަބަބުން 2019 ވަނަ އަހަރުން ފެށިގެން ކޮންމެ އަހަރަކު ސަރުކާރަށް 1.4 ބިލިއަން ޑޮލަރުގެ އާމްދަނީއެއް ގެއްލެމުން ދިޔަ އެވެ.
