ދިވެހިރާއްޖެ އާއި ގާނާއާ ދެމެދު އޮތް ގާތް ދޭދޭ ގުޅުންތައް އިތުރަށް ބަދަހިކުރުމަށްޓަކައި ދެ ގައުމުގެ މެދުގައި ދެ އެއްބަސްވުމެއްގައި ސޮއިކޮށްފިއެވެ.
ރާއްޖެ އާއި ގާނާއާ ދެމެދު ސޮއިކުރެވުނު ދެ އެއްބަސްވުމަކީ އިތުރު ވިސާ ނެގުމަކާ ނުލައި ރާއްޖެ އާއި ގާނާއާ ދެމެދު ދަތުރުކުރެވޭނެ އިންތިޒާމުތައް ހަމަޖެއްސުމަށްޓަކައި ސޮއިކުރެވުނު ވިސާ ވެއިވާ އެއްބަސްވުމަކާއި ރާއްޖޭގެ ސަރުކާރާއި ގާނާގެ ސަރުކާރާ ދެމެދު ސިޔާސީ މަޝްވަރާތައް ބޭއްވުމަށްޓަކައި ސޮއިކުރެވުނު ފަހުމުނާމާއެއް ކަމަށް ފޮރިން މިނިސްޓަރީން ބުނެ އެވެ.
މި ދެއެއްބަސްވުމުގެ ސަބަބުން، ގާނާ އާއި ރާއްޖޭގެ ދޭދޭ ގުޅުންތައް އާ ހަރުފަތަކަށް ގެންދިއުމަށްޓަކައި ދެ ގައުމުގެ ހާރިޖީ ވުޒާރާތަކުގެ މެދުގައި ގަވައިދުން ސިޔާސީ މަޝްވަރާތައް ބޭއްވޭނެ މަގުފަހިވެގެން ދާނެ ކަމަށް މިނިސްޓަރީން ބުނެއެވެ.
އަދި، އިތުރު ވިސާއެއް ނެގުމަކާ ނުލައި ދެ ގައުމުގެ މެދުގައި ދަތުރުކުރެވޭނެ އިންތިޒާމު ހަމަޖެހުމާއެކު، އެއް ގައުމުން އަނެއް ގައުމަށް ދަތުރުކުރުން ފަސޭހަވެ، ދެ ގައުމުގެ ރައްޔިތުންގެ މެދުގައި ގުޅުން ބަދަހިވެގެން ދިއުމަށް މަގުފަހިވާނެ ކަމަށް ވެސް މިނިސްޓަރީން ބުނެއެވެ.
މި އެއްބަސްވުންތަކުގައި ސޮއިކުރައްވާފައިވަނީ ކޮމަންވެލްތު ހާރިޖީ ވަޒީރުންގެ ބައްދަލުވުމުގެ ހަވާސާގައި ބޭއްވުނު ރާއްޖެ އާއި ގާނާގެ ހާރިޖީ ވަޒީރުންގެ ބައްދަލުވުމަށްފަހު އެވެ.
މި ދެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ، މިނިސްޓަރ އޮފް ފޮރިން އެފެއާޒް، ނިޝާން އިއްޒުއްދީނުގެ އިއްޒަތުގެ ވެރިޔާ އަބްދުﷲ ޝާހިދެވެ. އަދި، ގާނާގެ ފަރާތުން މި ދެ އެއްބަސްވުމުގައި ސޮއި ކުރެއްވީ އެ ގައުމުގެ މިނިސްޓަރ ފޯ ފޮރިން އެފެއާޒް އެންޑް ރީޖަނަލް އިންޓަގްރޭޝަން، ޝަރލީ އަޔޯކޯ ބޮޗްވޭ އެވެ.
މި ދެ އެއްބަސްވުމުގައި ސޮއި ކުރުމުގެ ރަސްމިއްޔާތު ބާއްވާފައިވަނީ ކޮމަންވެލްތުގެ މައި މަރުކަޒު ކަމަށްވާ ލަންޑަނުގައި ހުންނަ މާލްބަރޯ ހައުސް ގައެވެ.
ދިވެހިރާއްޖެއިން ގާނާއާއެކު ސިޔާސީ ގުޅުން ގާއިމުކުރީ އޮގަސްޓު 10، 1989 ގަ އެވެ.
