ބައިނަލްއަގުވާމީ އެކުވެރިކަމުގެ މެޗެއްގައި މި މަހު 21 ވަނަ ދުވަހު ރާއްޖޭގެ ގައުމީ ފުޓްބޯޅަ ޓީމާއި ޕާކިސްތާން ޓީމު ކުޅޭ މެޗު ލ. ގަމު ޒޯން ސްޓޭޑިއަމްގައި ކުޅޭ ގޮތަށް ނިންމައިފި އެވެ.
އެފްއޭއެމްގެ ރައީސް ބައްސާމް އަދީލް ޖަލީލް، ސޯޝަލް މީޑިއާގައި ކުރެއްވި ޕޯސްޓެއްގައިވާ ގޮތުން، ގަމު ޒޯން ސްޓޭޑިއަމްގައި މި މަހު 21 ވަނަ ދުވަހު މެޗު ކުޅެން ނިންމީ ކުޅިވަރާ ބެހޭ ވަޒީރު އަހުމަދު މަހުލޫފްގެ އެދިލެއްވުމުގެ މަތިންނެވެ. މިއީ، ފީފާ އިންޓަނޭޝަނަލް ފްރެންޑްލީ މެޗެއް ކަމަށް ވެސް ބައްސާމް ވަނީ ވިދާޅުވެފަ އެވެ.
ޒޯން ސްޓޭޑިއަމްގައި ޕާކިސްތާނާއި ރާއްޖެ ކުޅޭ މެޗު ފަށާނީ 21 ވަނަ ދުވަހު، 15:45 ގަ އެވެ.
މިއީ، ސ. ހިތަދޫ ޒޯން ސްޓޭޑިއަމަށް ފަހު، ބައިނަލްއަގުވާމީ މެޗެއް ރާއްޖޭގެ އެހެން ސަރަހައްދެއްގައި ކުޅެވޭ ފުރަތަމަ ފަހަރެވެ.
ގަމު ޒޯން ސްޓޭޑިއަަމަކީ މި ސަރުކާރުން ތަރައްގީކޮށް 2020 ވަނަ އަހަރުގެ ޑިސެމްބަރު މަހު، ރައީސް އިބްރާހިމް މުހައްމަދު ސޯލިހު ޝަރަފްވެރިކޮށްދެއްވި ރަސްމިއްޔާތެއްގައި ހުޅުވި ދަނޑެކެވެ.
އެ ދަނޑު، ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ޔޫތު މިނިސްޓަރު، މަހުލޫފް ވަނީ އޭއެފްސީ ކަޕްގެ މެޗުތައް އެ ދަނޑުގައި ހޯސްޓް ކުރުމަކީ އަމާޒެއް ކަމަށް ވިދާޅުވެފަ އެވެ. އޭގެ ފަހުން، 2021 ވަނަ އަހަރު އޭއެފްސީ ކަޕް ސެންޓްރަލައިޒްކޮށް ރާއްޖޭގައި ކުޅުނުއިރު، ގަމު ދަނޑުގައި ކުޅެވޭތޯ ބެލި ނަމަވެސް އޭރު އެކަން ކާމިޔާބެއްނުވި އެވެ.
ރާއްޖެ އާއި ޕާކިސްތާން ބައިނަލްއަގުވާމީ އެކުވެރިކަމުގެ މެޗެއްގައި މި ބައްދަލުކުރަނީ 10 އަހަރު ފަހުންނެވެ. ރާއްޖޭން ވަނީ މީގެ ކުރިން 2013 ވަނަ އަހަރުގެ ފެބްރުއަރީ މަހުގެ ތެރޭގައި މާލޭގައި ޕާކިސްތާނާ އެކުވެރިކަމުގެ ދެ މެޗެއް ކުޅެފަ އެވެ. އެ ގޮތުން، ފުރަތަމަ މެޗު 1-1 އިން އެއްވަރުވިއިރު، ދެ ވަނަ މެޗުން ރާއްޖެ މޮޅުވީ 3-0 އިންނެވެ. މިއީ އޭގެ ފަހުން، މި ދެ ޓީމު ބައިނަލްއަގުވާމީ މުބާރާތެއްގައި ވާދަކުރާ ފުރަތަމަ ފަހަރެވެ.
ފީފާ ސަސްޕެންޝަންގެ ސަބަބުން މިިދިޔަ އަހަރުތަކުގައި ގިނަ ގޮންޖެހުންތަކާ ކުރިމަތިލާން ޖެހުނު ޕާކިސްތާނުން އަނެއްކާ ވެސް މެދުކެނޑުމަކަށް ފަހު، މި އަހަރު ޖޫން މަހު އިންޑިއާގައި ބާއްވާ ސާފް ޗެމްޕިއަންޝިޕްގައި ބައިވެރިވާން އަންނަނީ މަސައްކަތް ކުރަމުންނެވެ. ޕާކިސްތާނުން އަންނަނީ ރާއްޖެއާ ދެކޮޅަށް ކުޅޭ މެޗަށް ޕްރެކްޓިސް ކުރަމުންނެވެ.
ޕާކިސްތާން ވަނީ 2018 ވަނަ އަހަރު ބަންގްލަދޭޝްގެ ޑާކާގައި ބޭއްވި ސާފް ޗެމްޕިއަންޝިޕްގެ ސެމީގައި ކުޅެފަ އެވެ. އެއީ 13 އަހަރަށް ފަހު، ސާފްގެ ސެމީގައި ޕާކިސްތާންގެ ފުރަތަމަ ފެނިލުމެވެ. އެންމެ ފަހުން، 2021 ވަނަ އަހަރު ރާއްޖޭގައި ސާފް ޗެމްޕިއަންޝިޕް ހޯސްޓްކުރިއިރު، ޕާކިސްތާން އޮތީ ސަސްޕެންޝަނެއްގަ އެވެ.
ރާއްޖޭގެ ގައުމީ ފުޓްބޯޅަ ޓީމުގެ ކޯޗު، އިޓަލީގެ ފްރެންޗެސްކޯ މޮރިއޭރޯ އަށް ޕާކިސްތާނާ ދެކޮޅަށް ކުޅޭ މެޗަށް ޕްރެކްޓިސް ކުރަން އެކަށީގެންވާ މުއްދަތެއް ނެތެވެ. މިއީ ރާއްޖޭގެ ޕްރީ ސީޒަން ދުވަސްވަރު ކަމަށްވެފައި، ރަސްމީކޮށް ފުޓްބޯޅަ މެޗެއް ނުކުޅޭތާ ހަތް މަސްވާން ގާތްވެފައިވާއިރު، ފުރަތަމަ ޑިވިޝަނުގެ އަށް ކްލަބްގެ ތެރެއިން މި ވަގުތު ޕްރެކްޓިސް ކުރަނީ ދެ ޓީމު ކަމަށްވާތީ އެވެ. އެއީ މިދިޔަ އަހަރުގެ ލީގު ޗެމްޕިއަން، މާޒިޔާ ސްޕޯޓްސް އެންްޑް ރެކްރިއޭޝަނާއި ރަނަރަޕް ކްލަބް އީގަލްސް އެވެ.
