ގަތަރުގެ ބިޔަ ކުންފުންޏެއް ކަމަށްވާ އެސްތިތުމާރު ހޯލްޑިންސް އިން ރާއްޖޭގައި ކުރި ފުރަތަމަ ތަޖުރިބާ ކާމިޔާބު ވުމުން، ކިތަންމެ ބޮޑު އިންވެސްޓެއް ކުރަން ވެސް އެ ކުންފުނިން އޮތީ ތައްޔާރަށެވެ. މާލެ އަތޮޅު ދެކުނު ބުރީގައި، ފަޅެއް ހިއްކައިގެން 343 މިލިއަން ޑޮލަރުގެ (5.3 ބިލިއަން ރުފިޔާ) އަގުބޮޑު، ރާއްޖޭގައި އަދި ނެތް ވަރުގެ ރިސޯޓެއް ހެދުމަށް އެކުންފުނިން ވަނީ މިހާރު މަސައްކަތް ފަށައިފަ އެވެ.
ސާޅީސް ހާހެއްހާ މުވައްޒަފުން ތިބި އެސްތިތުމާރު އަކީ ތަފާތު ސާވިސްތަކާއި ސިއްހީ ދާއިރާ އާއި ކޮންޓްރެކްޓިން ދާއިރާ އާއި ބޮޑެތި އިންޑަސްޓްރިއަލް މަސައްކަތްތަކުގައި އަރާހުރި ކުންފުންޏެކެވެ. އެ ކުންފުނީގެ ވައިސް ޗެއާމަން ރާމިޒް އަލް ހައްޔާތު އަކީ، ރާއްޖޭގެ ލަގްޒަރީ ރިސޯޓް ވޯލްޑްރޯފް އެސްޓޯރިއާ، އިތާފުށި ރިސޯޓް، އިތާފުށި އިންވެސްޓްމަންޓްގެ އެއް ހިއްސާދާރު، ދޯހާގެ އެސެޓް ގްރޫފްގެ ވެސް ވައިސް ޗެއާމަން އަދި މެނޭޖިން ޑިރެކްޓަރެވެ. ފަޅެއް ހިއްކައިގެން ހަދައި 2019 ވަނަ އަހަރު ހުޅުވި އިތާފުށި ރިސޯޓުގައި ދެން ހިއްސާ ވަނީ ރިސޯޓް އެންޑް ހޮޓެލް ކޮންސްޓްރަކްޝަން ކުންފުނީގެ ޗެއާމަން މުހައްމަދު އަލީ ޖަނާހު އެވެ.
ގަތަރުގައި 2015 ވަނަ އަހަރު ހުޅުވި ބަނާނާ އައިލެންޑް ރާމިޒުގެ ކުންފުންޏަކުން ތަރައްގީ ކުރީ ޖަނާހުގެ ކުންފުންޏާއި ގުޅިގެންނެވެ. އެ ގުޅުން އިތުރަށް ބަދަހިވެ، ރާމިޒް ގެ އެސެޓް ގްރޫޕުން ރާއްޖޭގައި އިންވެސްޓް ކުރަން ނިންމީ ޖަނާހު ދެއްވި ޔަގީން ކަމުގެ މައްޗަށެވެ. ރާއްޖޭގައި އިތުރު ރިސޯޓެއް ތަރައްގީ ކުރުމާ ގުޅޭ ގޮތުން އިތާފުށި ރިސޯޓުގައި، އާދީއްތަ ދުވަހު އެ ދެ ބޭފުޅުން ވަނީ ނޫސްވެރިންނާ ބައްދަލު ކުރައްވާފައެވެ.
ވޯޑްރޯފް އެސްޓޯރިއާ އިތާފުށީ ރިސޯޓޫގެ ދެ ހިއްސާދާރުން ކަމަށްވާ ރާމިޒް (ކ) އާއި ޖަނާހު -- އަދަދު ފޮޓޯ މުހައްމަދު ޝާބިން
"މި ގާތް އެކުވެރިޔާ އާ އެކު، ފުރަތަމަ ހެދި ރިސޯޓަކީި (ގަތަރުގައި) ބަނާނާ އައިލެންޑް، ދެން 2019 ވަނަ އަހަރު އައިސް ފަޅެއް ބަލާފައި، އިތާފުށީ ތަރައްގީ ކުރަން ނިންމީ،" ޒާމިޒް ވިދާޅުވި އެވެ. "ވޯޑްރޯފް އެއްޓޯރިޔާ، އިތާފުށްޓަކީ ރާއްޖޭގައި މިވަގުތު އޮތް އެންމެ ރަނގަޅު އަދި އެހާމެ ކާމިޔާބު ރިސޯޓެއް."
ކޮވިޑް-19 ގެ ހާލަތުގައި ރާއްޖެއިން ކޮވިޑް މެނޭޖު ކުރި ގޮތް ފަހަގަ ކުރައްވާ ރާމިޒް ސަރުކާރަށް ޝުކުރު އަދާކުރެއްވި އެވެ. ރާއްޖެ އަކީ ޓޫރިޒަމް މެނޭޖު ކުރުމުގައި ހަރުދަނާ ގޮތް ގެންގުޅޭ ގައުމެއް ކަމާއި، ރާއްޖެ އަކީ ޓޫރިޒަމްގެ އިންޓްމަންޓުގެ ރިޓާން އަވަހަށް ލިބޭ، އިންވެސްޓް ކުރަން ވަރަށް އެކަށީގެންވާ ގައުމެއް ކަމަށް އޭނާ ވިދާޅުވި އެވެ.
"މީ ރީތި ގައުމެއް، ރިޓާން ރަނގަޅު ގައުމެއް، އިންވެސްޓްމަންޓާ ބެހޭ ގާނޫނުތައް ވެސް ހުޅަނގާ ރައްޓެހި، އެހެންވީމާ މިތަނުގައި އަދި ވެސް ގިން ގިނަ އިންވެސްޓްމަންޓްތައް ކުރާނަން،" އޭނާ ވިދާޅުވި އެވެ.
އިތުރު ފަޅެއް ހިއްކައިގެން ރާއްޖޭގައި އަދި މިހާތަނަށް ހުޅުވާފައި ނުވާ ފެންވަރުގެ ފެމެލީ ފްރެންޑްލީ ރިސޯޓެއް ތަރައްގީ ކުރަނީ ރާމިޒްގެ އެސްތިތުމާރު ކުންފުނީގެ ސަބްސިޑަރީ ކުންފުންޏެއް ކަމަށްވާ ރޯޔަލް ރިސޯޓްސް އިން ނެވެ. ފަސް ޕްރައިވެޓް އައިލެންޑާއި ރާއްޖޭގެ ފުރަތަމަ ވޯޓާ ޕާކް ހިމެނޭ 128 ވިލާގެ މި ރިސޯޓް މެނޭޖު ކުރާނީ އަލްޓްރާ ލަގްޒަރީ ހޮސްޕިޓަލިޓީ ބްރޭންޑް، ރޯސްވުޑް ހޮޓެލް އެންޑް ރިސޯޓްސް އިން ނެވެ. މިހާރު ފަޅު ހިއްކުރުމުގެ މަސައްކަތް ފަށާފައިވާއިރު، 2025 ގެ ކުރީ ކޮޅު ރިސޯޓް ހުޅުވަން ވަނީ ޕްލޭން ކޮށްފަ އެވެ.
އެސްތިތްމާރުން ރިސޯޓް ތަރައްގީ ކުރަން ނިންމާފައިވާ ފަޅު: މި ފަޅު އޮންނަނީ މާލެ އަތޮޅު ދެކުނު ބުރީގައި -- އަދަދު ފޮޓޯ
"އެއީ ފެމެލީ ޕްރެންޑްލީ ރިސޯޓެއް، ފަސް ޕްއިވެޓް އައިލެންޑް އޮންނާނެ، ދުނިޔޭ ފެންވަރުގެ ރާއްޖޭގެ ފުރަތަމަ ވޯޓާ ޕާކު އެތަކުގައި ހަދާނެ، ނުވަ ރެސްޓޯރަންޓް ހުންނާނެ، ހުރިހާ ހިސާބެއްގެ ކެކުން ލިބެން ހުންނާނެ،" ރާމިޒް ވިދާޅުވި އެވެ.
އޭނާ ވިދާޅުވީ، ރާއްޖެ އަކީ މަތީ ފަންތީގެ ޓޫރިޒަމް މަންޒިލަކަށް ވުމުން އިގްތިސާދީ ލޮޅުންތަކުގެ އަސަރު ކުޑަ ކަމަށެވެ. އެހެން ކަމުން ދެ ވަނަ ރިސޯޓެއް ތަރައްގީ ކުރުމާ ހަމައިން ނުނިންމާނެ ކަމަށާއި ކުރިއަށް އޮތް ތަނުގައި އިތުރު ރިސޯޓްތައް ތަރައްގީ ކުރާނެ ކަމުގެ ޔަގީންކަން އެނާ ދެއްވި އެވެ.
"އަހަމެންގެ އެބަހުރި އިތުރު ބްރޭންޑްތައް، އެ ބްރެންޑްތައް ރާއްޖެ ގެންނަން ބޭނުންވޭ، ކުރިއަށް އޮތް ތިނެއް ނުވަތަ ފަސް އަހަރު ދުވަހުގެ ތެރޭގައި ތިނެއް ނުވަތަ ހަތަރު ޕްރޮޖެކްޓް ގެންނާނަން،" ރާމިޒް ވިދާޅުވި އެވެ.
ރާމިޒް ވިދާޅުވީ ޓޫރިޒަމް ނޫން ދާއިރާތަކުން ވެސް ރާއްޖޭގައި އިންވެސްޓް ކުރުމުގެ ވިސްނުން އެބަހުރި ކަމަށާއި އެސްތިތުމާރު އިން ކުރިއަށް ދާން ވިސްނާފައިވާ ގޮތް ސަރުކާރާއި ހިއްސާ ކޮށްފައިވާނެ ކަމަށެވެ. އުންމީދަކީ އެކުންފުނީގެ އިންވެސްޓްމަންޓް ތަކުގެ ސަބަބުން ރާއްޖޭގެ އިގްތިސާދަށާއި ރައްޔިތުންނަށް ވެސް ފައިދާ ލިބުން ކަމަށް އޭނާ ވިދާޅުވި އެވެ.
