ފުވައްމުލައް ސިޓީގައި ހުރި ގިނަ އާސާާރުތައް ނުބެލެހެއްޓުމުގެ ސަބަބުން ނެތިދިއުމުގެ ބިރު ބޮޑުވެއްޖެ އެވެ.
ފުވައްމުލަކުގެ އާސާރީ ތަންތަނުގެ ތެރޭގައި ހަވިއްތަ، ގެން މިސްކިތް، ވަށޮވެޔޮ އަދި ކެޑޭރެ މިސްކިތް ވެސް ހިމެނެ އެވެ.
ފުވައްމުލައް ސިޓީގެ މޭޔަރު އިސްމާއިލް ރަފީގު "އަދަދު" އަށް ވިދާޅުވީ، އާސާރީ ތަންތަން އެކަށީގެންވާ ގޮތަކަށް ބެލެހެއްޓިފައެއް ނެތް ކަމަށެވެ.
މޭޔަރު ވިދާޅުވީ އޭގެ އެއް ގޮންޖެހުމަކީ ބޭނުންވާ ފައިސާ ނުލިބުން ކަމަށެވެ. އެގޮތުން، އާސާރީ ތަންތަން ބެލެހެއްޓުމަށް ބޭނުންވާ ފައިސާ ހޯދުމަށް އަމިއްލަ ފަރާތްތަކާ ވާހަކަ ދައްކަމުންދާ ކަމަށް އޭނާ ވިދާޅުވި އެވެ.
"[ވިސްނުމަކީ] ރަށުގައި ހުރި އާސާރީ ތަރިކަތަކާ އެއްޗެހި އެއްތަނެއްގައި ބަހައްޓަފައި އެ އެއްޗެހި ބެލެހެއްޓޭނެ ގޮތެއް ހެދުން،" މޭޔަރު ވިދާޅުވި އެވެ.
މޭޔަރު ވިދާޅުވީ ކައުންސިލުގެ ވިސްނުމަކީ ރަށުގައި ހުރި އާސާރީ ތަކެތި އެއްތަނެއްގައި ބަހައްޓައިގެން ބެލެހެއްޓޭނެ ގޮތަކަށް މިއުޒަމެއް ހެދުން ކަމަށެވެ. އަދި ރަށަށް ޒިޔާރަތް ކުރާ ފަރާތްތަކަށް އެތަންތަން ބަލަން ވެސް ފުރުސަތު ދިނުން ކަމަށެވެ. އެހެންކަމުން އެކަންކަން ކުރުމަށް ބޭނުންވާ ފަންޑު ހޯދުމުގެ މަސައްކަތް ކުރަމުންދާ ކަމަށް އޭނާ ވިދާޅުވި އެވެ.
ފުވައްމުލަކު ގެން މިސްކިތު ވެޔޮ؛ އާސާރީ ތަންތަން ނުބެލެހެއްޓުމުގެ ސަބަބުން ނެތިދދިއުމުގެ ބިރުވަނީ ބޮޑުވެފައި -- ފޮޓޯ: މިރާޝް/ އަދަދު
ފުވައްމުލަކުގެ އާސާރީ ތަންތަން ބެލެހެއްޓުމުގައި ދިމާވާ އަނެއް ގޮންޖެހުމަކީ ތަޖުރިބާކާރުންގެ ލަފާ ނުލިބުމެވެ. މޭޔަރު ވިދާޅުވީ އާސާރީ ތަންތަން ބެލެހެއްޓެނީ އެކަމުގެ ތަޖުރިބާއާއި އިލްމު ހުރި މީހުންގެ ލަފައާއެކު ކަމަށެވެ.
"މިސާލަކަށް ގެން މިސްކިތް. އަސްލު ގެއްލޭގޮތަށް ހުރީ ބައެއް އެކްސްޓެންޝަން ހަދާފައި، ދަގަނޑު ޖަހައިގެން. އަޅުގަނޑުމެން އައި ފަހުން އެތަންތަން ރޫޅާފަ، ތަންކޮޅެއް އަސްލާ އެއްގޮތަށް ހުންނާނެ ބަދަލުކޮށްފައި،" ތަޖުރިބާކާރުންގެ ލަފައާ ނުލާވެސް ބައެއް އާސާރީ ތަންތަން ބެލެހެއްޓުމުގެ ކަންކަން ކުރިކަން ފާހަގަކުރައްވަމުން މޭޔަރު ވިދާޅުވި އެވެ.
އޭނާ ވިދާޅުވީ ގެން މިސްކިތް އަސްލާ އެއްގޮތަށް މަރާމާތު ކުރި ނަމަވެސް، އެފަދަ ތަންތަން ރަނގަޅަށް ގިނަ ދުވަހު ބެހެއްޓޭނެ ގޮތަކަށް ހެދުމުގެ "އެކްޕާޓީޒް ނޮލެޖެއް" ނެތް ކަމަށެވެ. އަދި މިކަމުގައި މިނިސްޓްރީގެ އެހީތެރިކަން ވެސް ވަރަށް ބޮޑަށް ބޭނުންވާ ކަމަށް ވިދާޅުވި އެވެ.
"އާސާރީ ދަފްތަރުގައި ހުރި ތަންތަނަކީ މިނިސްޓްރީގެ ވެސް ބޮޑު ޒިންމާއެއް އޮންނަ ތަނެއް. ތަންތަން ހިމާޔަތްކޮށް ބެލެހެއްޓުމަށް މިނިސްޓްރީގެ އެހީތެރިކަމަށް އެދިފައިވާނެ،" ހެރިޓޭޖް މިނިސްޓްރީން ވެސް ފަންޑާއި، ކަމުގެ އިލްމު ތިބި މީހުންގެ ހިދުމަތް ކައުންސިލަށް ލިބޭނެ ގޮތް ހޯދުމަށް މަސައްކަތް ކުރާކަން ފާހަގަކުރައްވަމުން މޭޔަރު ވިދާޅުވި އެވެ.
