ލަންޑަން (މާޗް 10) - ޗެލްސީ އަށް ކުޅެމުން އަންނަ އިނގިރޭސި ގައުމީ ޓީމުގެ މިޑްފީލްޑަރު، މޭސަން މައުންޓް ވިއްކާލަން އެ ކްލަބުން ކިޔާ އަގުދޭން މެންޗެސްޓާ ޔުނައިޓެޑުން ތައްޔާރަށް އޮތް ކަމަށް މީޑިއާ ރިޕޯޓްތައް ބުނެފި އެވެ.
މި ސީޒަނުގައި މިހާތަނަށް އާ ކުޅުންތެރިން ހޯދަން ދެ ޓްރާންސްފާ މާކެޓްގައި 600 މިލިއަން ޑޮލަރަށް ވުރެ އިތުރަށް ހަރަދުކޮށްފައިވާ ޗެލްސީން މި އަހަރުގެ ޖޫން 30 ގެ ކުރިން ކްލަބުން ބައެއް ކުުޅުންތެރިން ވިއްކާލައި، އެ ކްލަބްގެ ހަރަދުގެ ކަންކަން ގަވާއިދަށް ފަންތަން ޖެހެ އެވެ.
އެ ގޮތުން، އެ ކަންކަން ހަމަޖެއްސުމުގެ ގޮތުން މި ސީޒަން ނިމުމުން ބައެއް ކުުޅުންތެރިން ވިއްކާލާނެ އެވެ. އޭގެ ތެރޭގައި، 24 އަހަރުގެ މައުންޓް ވެސް ހިމެނެ އެވެ.
މައުންޓްގެ ސޮއި ހޯދުމުގެ ރޭހުގައި ނިއުކާސަލް ޔުނައިޓެޑާއި ލިވަޕޫލްގެ ނަން ކުރިން އައި ނަމަވެސް މިހާރު އެ ރޭހަށް ޔުނައިޓެޑް ވެސް ވަނީ ވަދެފަ އެވެ. ރިޕޯޓްތައް ބުނާގޮތުން ޔުނައިޓެޑުން އޮތީ ޗެލްސީން މައުންޓް ވިއްކާލަން ކިޔާ 50 މިލިއަން ޕައުންޑް (64 މިިލިއަން ޑޮލަރު) ދޭން ވެސް ތައްޔާރަށެވެ.
ލިވަޕޫލުން މައުންޓް ގަންނަން ބޭނުންވަނީ 40 މިލިއަން ޑޮލަރަށް ކަމަށް ރިޕޯޓްތައް ބުނެ އެވެ. ނިއުކާސަލް އިން ރަސްމީކޮށް މައުންޓް ގަންނަން ވާހަކަ ދައްކަން ފަށާނީ މި ސީޒަން ނިމުމުން ކަމަށް އެ ކްލަބްގެ އޮފިޝަލަކާ ހަވާލާދީ މީޑިއާގައި ވަނީ ރިޕޯޓްކޮށްފަ އެވެ.
ނެދަލެންޑްސްގެ ވިޓެސޭ އާހެމް އާއި އިނގިރޭސި ދެ ވަނަ ޑިވިޝަންގެ ޑާބީ ކައުންޓީ އަށް ލޯން އުސޫލުން ކުޅެން ފެށި މައުންޓް އަށް ޗެލްސީ ޓީމުން ފުރުސަތު ލިބެން ފެށީ ފްރޭންކް ލަމްޕާޑް، 2019 ވަނަ އަހަރު ޗެލްސީ ކޯޗަކަށް ހުރިއިރު އެވެ.
އޭގެ ފަހުން، ތޯމަސް ޓުޗެލްގެ ކޯޗުކަމުގައި ޗެލްސީން ގިނަ ކާމިޔާބީތަކެއް ހޯދިއިރު، މައުންޓް އިސް ރޯލެއް ކުޅުނެވެ.
އެކަމަކު، މި ސީޒަނުގެ މެދުތެރެއިން ޓުޗެލް ވަކިކޮށް، ގްރަހަމް ޕޮޓާ ޗެލްސީއާ ހަވާލުވި ފަހުން މައުންޓަށް އެކަށީގެންވާ ވަރަށް ފުރުސަތު ނުލިބި ކުޅުމަށް ވަނީ އަސަރުކޮށްފަ އެވެ. މައުންޓް، މި ސީީޒަނަށް ފަހު ކްލަބް ބަދަލުކުރާއިރު، އެންމެ ބޮޑަށް ވިސްނާނީ ކުޅުމުގެ ފުރުސަތު ގިނައިން ލިބޭ ޓީމަކާ ގުޅުމަށެވެ.
