މިއުނިކް (މާޗް 9) - ޔުއެފާ ޗެމްޕިއަންސް ލީގުގެ ގަދަ 16 ބުރުގެ ދެ ލެގުގައި ވެސް ބަޔާން މިއުނިކް އަތުން ޕީއެސްޖި ބަލިވެ، އެ ޓީމު މުބާރާތުން ކެޓުމާ އެކު އެ ކްލަބްގައި ކީލިއަން އެމްބާޕޭގެ މުސްތަގުބަލާ ގުޅޭގޮތުން ސުވާލުއުފެދިއްޖެ އެވެ.
މިދިޔަ މަހު ފުރަތަމަ ލެގުގައި ޕީއެސްޖީ ވަނީ އަމިއްލަ ދަނޑުގައި 1-0 އިން ބަޔާން އަތްދަށުވެފަ އެވެ. ނަތީޖާ ނެރެން ޖެހޭ މެޗަކަށް ޕީއެސްޖީން ރޭ ނުކުތީ ބަޔާން ދަނޑަށެވެ. އެ މެޗުން ބަޔާން ވަނީ 2-0 އިން ޕީއެސްޖީ ބަލިކޮށް ކުއާޓާގެ ޖާގަ ހޯދައިފަ އެވެ.
ރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވެސް ޕީއެސްޖީގެ ތަރި އެމްބާޕޭ އަށް އަމާޒުވި ސުވާލަކީ މި ސީޒަނުގައި ޕީއެސްޖީ އަށް ޗެމްޕިއަންސް ލީގު ނުހޯދިއްޖެނަމަ އޭނާ އެ ޓީމުގައި މަޑުކުރާނެތޯ އެވެ.
އެމްބާޕޭ ބުނީ އޭނާ އެ ކްލަބްގައި ދެމިހުރުން އޮތީ އެއް މުބާރާތަކަށް ބަލައިގެން ކަމަށްވާނަމަ އެއީ އިހުތިރާމް ކުޑަ ނިންމުމަކަށް ވާނެ ކަމަށެވެ. ރޭގެ ނަތީޖާ އަށް ފަހު ޕީއެސްޖީ މުބާރާތުން ކެޓުމާ އެކު އަނެއްކާ ވެސް އެމްބާޕޭގެ ކުރިމަގާ ގުޅޭގޮތުން މީޑިއާ އިން ސުވާލު އަމާޒުކުރަން ފެށި އެވެ.
"އަހަރެން މި ހުރީ ހަަމަޖެހިގެން. ދެން ޔަގީނުން ވެސް މި ސީޒަނުގައި އަހަރެން ވިސްނާނީ ޕީއެސްޖީއާ އެކު ލީގު ކާމިޔާބުކުރަން. ދެން އެ އަށް ފަހު ދެން ތި ހުރި ކަންކަމަށް ވިސްނާނީ،" ޕީއެސްޖީއާ އެކު 2025 ވަނަ އަހަރުގެ ޖޫންގެ ނިޔަލަށް ކޮންޓްރެކްޓްގައި ހުރި އެމްބާޕޭ، 24، ބުންޏެވެ.
އެމްބާޕޭ ބުނީ ޕީއެސްޖީ ބަލިވިޔަސް އެ ޓީމުން ވަނީ ދެއްކޭނެ އެންމެ ރަނގަޅު ކުޅުން ދައްކަން މަސައްކަތް ކޮށްފަ އެވެ. އަދި އެ ޓީމު ބަލިވީ ޗެމްޕިއަންސް ލީގު ކާމިޔާބުކުރަން އެކުލަވާލާފައި އޮތް ވަރުގަދަ ޓީމެއް އަތުން ކަމަށާއި ބަޔާނަކީ ތަފާތު ވަރުގަދަ ސްކޮޑެއް އޮތް ޓީމެއް ކަަމަށެވެ.
ރޭގެ މެޗުގައި ޕީއެސްޖީގެ ޑިފެންޑަރު، މާކީނިއޯސް އަށް އަނިޔާވެގެން ބަދަލުކުރަން ޖެހުމުން ދެން އެ ޓީމުގެ ކެޕްޓަން ބޭންޑް އަޅައިގެން ކުޅުނީ އެމްބާޕޭ އެވެ.
