މިއުނިކް (މާޗް 8) - ޔުއެފާ ޗެމްޕިއަންސް ލީގުގެ ގަދަ 16 ބުުރުގެ ދެ ވަނަ ލެގުގައި މިރޭ ބަޔާން މިއުނިކާ ދެކޮޅަށް ނަތީޖާ އަނބުރާލަން ޕީއެސްޖީން ބަރޯސާވާނެ ހަތިޔާރަކީ އެ ޓީމަށް ކުޅޭ ފްރާންސްގެ ތަރި ކީލިއަން އެމްބާޕޭ ކަމަށް ޕީއެސްޖީގެ ކޯޗު ކްރިސްޓޮފް ގަލްޓިއޭ ބުނެފި އެވެ.
މި ދިޔަ މަހު ކުޅުނު ފުރަތަމަ ލެގުގެ މެޗުން ޕީއެސްޖީ ވަނީ އަމިއްލަ ދަނޑުގައި ބަޔާން އަތުން 1-0 އިން ބަލިވެފަ އެވެ. އެހެންކަމުން، މިރޭ ރަނގަޅު ނަތީޖާ އަކުން ބަޔާން ދަނޑުގައި މޮޅުވެގެން ނޫން ގޮޮތަކަށް ޕީއެސްޖީ އަކަށް މުބާރާތުގައި ކުރިއަށް ދެވޭނެ މަގެއް ނެތެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕީއެސްޖީގެ ކޯޗު ގަލްޓިއޭ ބުނީ ނަތީޖާ އަނބުރާލަން ބޭނުންވާ ފެންވަރު ޕީއެސްޖީގެ ޓީމުގައި އެބަހުރި ކަމަށާއި ބަރޯސާވާނެ ކުޅުންތެރިއެއް ހޯދާނެ ހާލަތެއް އައިސްފިނަމަ އެ ކުޅުންތެރިއަކަށް ވާނީ އެމްބާޕޭ ކަމަށެވެ.
"ފުރަތަމަ ލެގުގައި ކުޅުނު ވަރަށް ވުރެ ރަނގަޅު ފުޓްބޯޅައެއް ޔަގީނުން ވެސް އަހަރެމެން ކުޅެން ޖެހޭ. އެ އަށް މަސައްކަތް ކުރަން މި އުޅެނީ. އަހަރެމެންގެ އެބައޮތް ގޭމްޕްލޭނެއް، ދެން އަހަރަމެންގެ ޓީމުގައި އެބަހުރި ކީލިއަން (އެމްބާޕޭ)،" ގަލްޓިއޭ ބުންޏެވެ.
ބަޔާނާ ދެކޮޅަށް ފުރަތަމަ ލެގުގައި އެމްބާޕޭ ކުޅެން އެރީ ބަދަލަކަށެވެ. އެ މެޗުގައި އެމްބާޕޭ ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. މި ސީޒަނުގައި 30 މެޗުން 30 ގޯލު ޖަހާފައިވާ އެމްބާޕޭ މި ވަގުތު ހުރި ފޯމަށް ބަލާއިރު، އޭނާ އަށް ތަފާތު ދެއްކޭނެ ކަމަށް ގަލްޓިއޭ ގަބޫލުކުރެ އެވެ.
މިރޭގެ މެޗުން ޕީއެސްޖީ އަށް ކުރި ނުހޯދި އެ ޓީމަށް ޗެމްޕިއަންސް ލީގު ނިމިއްޖެނަމަ، މި ސީޒަނަށް ފަހު އެމްބާޕޭ އެ ޓީމު ދޫކޮށްލާނެ ކަމަށް މީޑިއާތަކުން ވަނީ ރިޕޯޓްކޮށްފަ އެވެ. އެކަމަކު، އެމްބާޕޭ ބުނީ އޭނާގެ މުސްތަގުބަލާ ގުޅޭގޮތުން ނިންމަނީ ޕީއެސްޖީ އަށް ޗެމްޕިއަންސް ލީގުގައި ވާ ގޮތަކުން ކަމަށް ވާނަމަ އެއީ ވަރަށް އިހުތިރާމް ކުޑަ ނިންމުމެއް ކަމަށެވެ.
ޕީއެސްޖީގައި އެމްބާޕޭ، މަޑުކޮށްގެން ހުރީ އެ ކްލަބްގެ ޕްރޮޖެކްޓާ މެދު ހިތް ރުހޭތީ ކަމަށް ވަނީ ބުނެފަ އެވެ.
އަނިޔާގެ ސަބަބުން ޕީއެސްޖީގެ ތަރި ނޭމާ އަށް ސީޒަން ނިމިފައިވާއިރު، އެއީ ޓީމަށް އަންނާނެ ކިހާ ބޮޑު އުނިކަމެއްތޯ ސުވާލުކުރުމުން ގަލްޓިއޭ ބުނީ ޔަގީނުން ވެސް އެއީ ގެއްލުމެއް ކަމަށާއި އެކަމަކު، ނެތް ކުޅުންތެރިއެއްގެ ވާހަކަ މާ ބޮޑަށް ދައްކައިގެން ނެގެޓިވް ކަމެއް ސިކުނޑީގައި ހަރުލެއްވުމަށް ވުރެ، ރަނގަޅަށް މެޗަށް ފޯކަސް ކުރަން ބޭނުންވާ ކަމަށެވެ.
ބަޔާނާއި ޕީއެސްޖީ ކުޅޭ މެޗު ފަށާނީ މިރޭ ރާއްޖެ ގަޑިން 1 ޖަހާއިރު އެވެ.
