ބަންގްލަދޭޝްގެ އިރުދެކުނުގައި ހުންނަ ރޮހިންޔާ ރެފިއުޖީ ކޭމްޕެއްގައި އަލިފާން ރޯވެ އެތައް ހާސް ބަޔަކު މަގުމަތިވެއްޖެ އެވެ.
އާދީއްތަ ދުވަހު އަލިފާން ރޯވީ ކޮކްސަޒް ބާޒާރް ރެފިއުޖީ ކޭމްޕުގަ އެވެ. ބެލެވޭ ގޮތުގައި އެ ތަނުގައި މީހުން ދިރިއުޅުނު 2000 އަށް ވުރެ ގިނަ ތަންތަން އަނދައި ހުލިވި އެވެ.
އަލިފާންގަނޑު ނިއްވާލުމުން ރެފިއުޖީން އެނބުރި ގޮސް، ބޭނުންކުރެވޭ ހާލަތުގައި ހުރި ތަކެތި ފެނޭތޯ މަސައްކަތް ކުރަމުންދާ ކަމަށް ރިޕޯޓުތައް ބުނެ އެވެ.
ބެލެވޭ ގޮތުގައި 12،000 އެއްހާ މީހުން ދިރިއުޅޭ ތަންތަން ވަނީ ސުންނާފަތިވެފަ އެވެ. އެއީ އަވައްޓެރި މިޔަންމާގައި ހިންގި ގަތުލުއާއްމުން ސަލާމަތް ވާން ހިޖުރަ ކުރި މީހުންނެވެ.
އަލިފާން ރޯވާން މެދުވެރިވި ސަބަބު ސާފު ނުވާ އިރު، މިހާތަނަށް އެއްވެސް މީހަކު މަރުވި ކަމުގެ ރިޕޯޓެއް ވެސް ނުލިބެ އެވެ.
ރެފިއުޖީން ދިރިއުޅޭ ތަންތަނުގެ އިތުރުން 35 މިސްކިތާއި 21 ތައުލީމީ މަރުކަޒު ވެސް ސުންނާފަތިވި ކަމަށް ބަންގްލަދޭޝްގެ އިދާރާތަކުން ބުނެ އެވެ.
ގިނަ ބަޔަކު ތޮއްޖެހިގެން ދިރިއުޅޭ ރެފިއުޖީ ކޭމްޕުތަކުގައި ފަސޭހައިން އަލިފާން ރޯވުމުގެ ފުރުސަތު އޮވެ އެވެ.
ރިޕޯޓުތައް ބުނާ ގޮތުން ޖެނުއަރީ 2021 އިން ޑިސެމްބަރު 2022 އަށް ރޮހިންޔާ ކޭމްޕުތަކުގައި އަލިފާނުގެ 222 ހާދިސާ ހިނގި އެވެ. އޭގެ ތެރޭގައި ގަސްދުގައި ރޯކުރުމުގެ 60 ކޭސް ހިމެނެ އެވެ.
