ލިވަޕޫލް (މާޗް 6) - އިނގިރޭސި ޕްރިމިއާ ލީގުގައި މިރޭ ލިވަޕޫލުން 7-0 އިން މެންޗެސްޓާ ޔުނައިޓެޑް ބަލިކޮށް ލީގުގެ ފަސް ވަނަ އަށް ޖެހިލައިފި އެވެ.
މިއީ ޔުނައިޓެޑާއި ލިވަޕޫލްގެ ކުރިމަތިލުމެއްގައި މިހާތަނަށް ތާރީހުގައި ވެސް ނުކުތް އެންމެ ފަރަގު ބޮޑު ނަތީޖާ އެވެ. އެ ގޮތުން، މީގެ ކުރިން 1895-1896 ވަނަ ސީޒަނުގައި ދެ ވަނަ ޑިވިޝަނުގައި ލިވަޕޫލުން ވަނީ 7-1 އިން ޔުނައިޓެޑް ބަލިކޮށްފަ އެވެ. އަނެއްކޮޅުން، މިއީ ޔުނައިޓެޑްގެ އެންމެ ފަރަގު ބޮޑު އެއް ބައްޔެވެ. މީގެ ކުރިން ހަތަރު ފަހަރު ޔުނައިޓެޑް ވަނީ 7-0 އިން ބަލިވެފަ އެވެ. އެންމެ ފަހުން އެ ވަރުގެ ފަރަގަކުން ބަލިވީ 1931 ވަނަ އަހަރު ވުލްވްސް އަތުންނެވެ.
ލިވަޕޫލްގެ އެންފީލްޑް ސްޓޭޑިއަމްގައި މިރޭ ކުޅުނު މެޗު ފަށައިގެން ފުރަތަމަ މިނިޓުން ފެށިގެން ލިވަޕޫލުން ދިޔައީ ފުރުސަތު ތަނަވަސްކުރެވޭތޯ މަސައްކަތް ކުރަމުންނެވެ. ޔުނައިޓެޑަށް ލިބުނު ފުރުސަތެއްގައި އެ ޓީމުގެ ބްރޫނޯ ފެނާންޑޭސް އަށް ހުސްކޮށް ލިބުނު ފުރުސަތުން ބޮލުން ޖެހި ބޯޅަ ދިޔައީ އަރިމަތިން ބޭރުންނެވެ. އަދި ފޯމުގައި ހުރި ޔުނައިޓެޑްގެ މާކަސް ރަޝްފޯޑަށް ލިބުނު ބޯޅަ ވެސް ރަނގަޅަށް ފޮނުވާނުލެވުނެވެ.
މެޗުގައި ލިވަޕޫލަށް ލީޑުނަގައިދިނީ މި ސީޒަނުގައި ޔުނައިޓެޑުން ގަންނަން އުޅެނިކޮށް ލިވަޕޫލުން ހައިޖެކް ކުރި ޑީލެއްގެ ދަށުން ސޮއިކުރި ނެދަލެންޑްސްގެ ފޯވާޑް، ކޯޑީ ގަކްޕޯ އެވެ. މެޗުގެ 43 ވަނަ މިނިޓްގައި ގަކްޕޯ ޖެހި ބޯޅަ އަމާޒުވީ ގޯލުގެ ދުރު ކަނަށެވެ.
ދެ ވަނަ ހާފުގެ ކުޅުން ފެށިގެން، ދެ މިނިޓް ތެރޭ، މެޗުގެ 47 ވަނަ މިނިޓްގައި ޑާވިން ނޫނޭޒް ވަނީ ބޮލުން ގޯލެއް ޖަހައި، ލިވަޕޫލްގެ ލީޑުފުޅާކޮށްދީފަ އެވެ. އޭގެ ތިން މިނިޓް ފަހުން، ސަލާހު ދިން ބޯޅައަަކަށް އަރައި، ގަކްޕޯ ލިވަޕޫލްގެ ތިން ވަނަ ގޯލު ޖެހި އެވެ.
މުހައްމަދު ސަލާހު ވަނީ މެޗުގެ 66 ވަނަ މިނިޓްގައި ޔުނައިޓެޑްގެ މިޑްފީލްޑަރުން އަތުން ހެދުނު ގޯހެއްގެ ފައިދާނަގައި ލިވަޕޫލްގެ ހަތަރު ވަނަ ލަނޑު ޖަހައިފަ އެވެ. ސަލާހު ޖެހި ބޯޅަ ގޯލަށް ވަނީ ހުރަސްދަނޑީގައި ޖެހިފަ އެވެ. މެޗުގެ 75 ވަނަ މިނިޓްގައި ޖޯޑަން ހެންޑަަސަން ނެގި ހުރަހަކުން ނޫނޭޒް ބޮލުން ގޯލެއް ޖަހައި، ލިވަޕޫލަށް ފަސް ވަނަ ގޯލު ޖަހައިދިނެވެ. ސަލާހު ވަނީ އޭރިއާތެރެއިން ލިބުނު ބޯޅައެއް ގޯލަށް ވައްދާލައި މެޗުގެ 83 ވަނަ މިނިޓްގައި ލިވަޕޫލްގެ ހަ ވަނަ ލަނޑު ޖަހައިފަ އެވެ. މި ގޯލު ޖެހި ސަލާހު ވެފައިވަނީ 129 ގޯލާ އެކު ޕްރިމިއާ ލީގުގައި ލިވަޕޫލަށް އެންމެ ގިނަ ގޯލު ޖަހައިދިން ކުޅުންތެރިޔާ އަށެވެ.
ލިވަޕޫލްގެ ހަތް ވަނަ ލަނޑު ޖެހީ ބަދަލަކަށް ކުޅެން އެރި ރޮބާޓޯ ފިރްމީނޯ އެވެ. މިއީ އޭރިއާތެރެއިން ލިބުނު ފުރުސަތެއްގައި ތިރިތިރިން ގޯލަށް ބޯޅަ ފޮނުވާލައިގެން ފިރްމީނޯ ޖެހި ގޯލެކެވެ.
މި މޮޅާ އެކު ލިވަޕޫލް ފަސް ވަނައިގައި އޮތީ 25 މެޗުން 42 ޕޮއިންޓާ އެކު އެވެ. ހަތަރެއްގައި އޮތް ޓޮޓެންހަމް ހޮޓްސްޕާސް އަށް 26 މެޗުން 45 ޕޮއިންޓް ލިބިފައިވާއިރު، ތިން ވަނައިގައި މެންޗެސްޓާ ޔުނައިޓެޑް އޮތީ 25 މެޗުން 49 ޕޮއިންޓާ އެކު އެވެ.
