ލަންޑަން، (މާޗް 5) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑާ ދެކޮޅަށް ކުޅޭ މެޗަކީ ވާދަވެރިކަމުގެ ތެރެއިންނާއި އެހެން ހުރިހާ ގޮތްގޮތުން ވެސް ހާއްސަ އަދި "ބޮޑު" މެޗެއްގެ ގޮތުގައި ލިވަޕޫލްގެ ކޯޗު ޔާގެން ކްލޮޕް ސިފަކޮށްފި އެވެ.
އިނގިރޭސި ފުޓްބޯޅަައިގެ އެންމެ ވާދަވެރި ޓިމްތަކުގެ ތެރޭގައި ހިމެނޭ ލިވަޕޫލާއި މެންޗެސްޓާ ޔުނައިޓެޑް މިރޭ ވާދަކުރާއިރު، މިވަގުތު ޔުނައިޓެޑް އޮތީ 49 ޕޮއިންޓާ އެކު ތާވަލްގެ ތިން ވަަނައިގަ އެވެ. ސީޒަންގެ ކުރީކޮޅު އެހާ ރަނގަޅު ނަތީޖާތަކެއް ނުނެރެވުނު ނަމަވެސް ލިވަޕޫލުން ވަނީ ކުޅުން ރަނގަޅުކޮށް މިހާރު ލީގު ތާވަލްގެ ހަ ވަނަ އަށް ޖެހިލާފަ އެވެ. މިރޭ މެޗުން މޮޅުވެ އެ ޓީމަށް ލީގުގެ ފަސް ވަނަ އަށް ޖެހިލެވޭނެ އެވެ.
މިރޭގެ މެޗާ ގުޅޭގޮތުން ލިވަޕޫލްގެ ކޯޗު ކްލޮޕް ބުނީ ލިވަޕޫލުން ޔުނައިޓެޑާ ދެކޮޅަށް ކުޅޭ ކޮންމެ މެޗަކީ ވެސް ގިނަ ގޮތްގޮތުން ހާއްސަ އަދި ފޯރިގަދަ މެޗުތަކެއް ކަމަށެވެ، ދެ ޓީމުގެ ހާލަތު ކޮންމެ ގޮތަކަށް އޮތް ކަމުގައިވިޔަސް އެ ޖޯޝަށް ބަދަލެއް ނާންނަ ކަމަށް ކްލޮޕް ވަނީ ބުނެފަ އެވެ.
އޭނާ ބުނީ މިހާރު ދެ ޓީމް އޮތް ހާލަތަށް ބަލާއިރު ދެ ޓީމަށް ވެސް މެޗުގެ މުހިންމުކަން ބޮޑު ކަމަށެވެ. ލީގު ރޭހުގައި އޮތް ޔުނައިޓެޑަށް މި މެޗުން މޮޅުވާން މުހިންމުވާއިރު، ގަދަ ހަތަރެއްގެ ޓާގެޓްގައި މިހާރު އޮތް ލިވަޕޫލަށް ވެސް މި މެޗުން ރަނގަޅު ނަތީޖާ އެއް ހޯދުން މުހިންމު ކަން ކްލޮޕް ފާހަގަކުރި އެވެ.
ކްލޮޕް ވަނީ މި ސީޒަނަށް ޔުނައިޓެޑްގެ ތައްޔާރީތަކާއި އެ ޓީމުން ބިނާކުރަމުން އަންނަ ޓީމަށް ވެސް ތައުރީފްކޮށްފަ އެވެ. އޭނާ ބުނީ ޔުނައިޓެޑުން އެ ތައްޔާރުކުރާ ޓީމަކީ ދިގު މުއްދަތަށް ވިސްނައިގެން ތައްޔާރުކުރާ ޓީމަކަށް ވުރެ ބޮޑަށް މި ދެ ތިން އަހަރު ކާމިޔާބު ހޯދަން ތައްޔާރުކޮށްފައި އޮތް ޓީމެއް ކަމަށެވެ. ޓްރާންސްފާ މާކެޓުން އެ ޓީމުން ގަތް ކުޅުންތެރިންނަށް ބަލާއިރު ވެސް އެކަން ފާހަގަވާ ކަމަށެވެ.
"މިސާލަކަށް ކަސެމީރޯ، އެރިކްސަން، ނޫނީ ވަރާން ވިޔަސް. މި ހުރިހާ ކުޅުންތެރިންނަކީ ވެސް ޒުވާން ކުޅުންތެރިންނެއް ނޫން. ޓެން ހާގަށް އިނގޭ އޭނާ ޓީމް މިހާރު ރެޑީކުރަން ބޭނުންވާ ގޮތް، މިސްރާބު އެނގިގެން އެ ކުރަނީ" ކްލޮޮޕް ބުންޏެވެ.
މި އަހަރުގެ ކުރީކޮޅު ލިވަޕޫލުގެ ނަތީޖާތައް ދަށްކޮށް ފެނުނު ނަމަވެސް މިހާރު އެ ޓީމުން ވަނީ މަޑުމަޑުން ކުޅުން ރަނގަޅުކޮށްފަ އެވެ. އެންމެ ފަހުން ލީގުގައި އެ ޓީމް ކުޅުނު ހަތަރު ބަލިވެފައި ނުވާއިރު، ޔުނައިޓެޑާ ދެކޮޅަށް އަމިއްލަ ދަނޑުގައި ކުޅެ ރަނގަޅު ނަތީޖާއެއް ހޯދޭނެކަމަށް ކްލޮޕް ޔަގީންކުރެ އެވެ.
ޔުނައިޓެޑްގެ ކޯޗު އެރިކް ޓެން ހާގް ބުނީ ޒަމާންވީ ވާދަވެރިންގެ މެޗަކަށް ނުކުންނައިރު ސަޕޯޓަރުން ވެސް ވަރަށް ބޮޑަށް ތައްޔާރުވާނެ ކަމަށެވެ. ވަކިން ހާއްސަކޮށް ލިވަޕޫލްގެ ދަނޑުގައި ކުޅެން ޖެހޭއިރު އެ ސްޓޭޑިއަމްގައި ލިވަޕޫލްގެ ސަޕޯޓަރުން ދައްކަނީ އާ ރޫހެއް ކަމަށް އޭނާ ބުނެފައިވެ އެވެ.
ޓެން ހާގް ބުނީ ސަޕޯޓަރުންގެ ފަރާތުން ކޮންމެ ކަހަލަ މަންޒަރެއް ފެނުނު ނަމަވެސް އެންފީލްޑްގައި ކުޅެން ޔުނައިޓެޑުން ޖެހިލުން ނުވާ ކަމަށެވެ. އޭނާ ބުނީ މިހާރު ޔުނައިޓެޑުގެ ކުޅުންތެރިން ވެސް ބޭނުންވަނީ ސަޕޯޓަރުންގެ ޕްރެޝަރާ އެކު ކުޅެ މޮޅުވާން ކަމަށާއި ޔުނައިޓެޑް ގައި އޮތީ އެ ކަހަލަ ޖޯޝެއް ކަަމަށެވެ.
ލީގުގެ ބޮޑެތި ޓީމްތަކާ ދެކޮޅަށް އަމިއްލަ ދަނޑުގައި މި ސީޒަންގައި ޔުނައިޓެޑުން މޮޅުވެފައިވީ ނަމަވެސް ރަށުން ބޭރުގައި ބޮޑު ޓީމެއް އަތުން އަދި ޔުނައިޓެޑް މި ސީޒަންގައި މޮޅެއް ނުވެ އެވެ. އަމިއްލަ ދަނޑުގައި ލިވަޕޫލް، މެންޗެސްޓާ ސިޓީ، އާސެނަލް އަދި ޓޮޓެންހަމްގެ މައްޗަށް ޔުނައިޓެޑުން ކުރި ހޯދާފައިވާއިރު، ރަށުން ބޭރުގައި އެ ޓީމް ވަނީ އާސެނަލާއި ސީޓީ އަތުން ބަލިވެފަ އެވެ.
ޓެން ހާގު ބުނީ ސީޒަންގެ ބާކީ ހުރި މެޗުތަކުން ބޭނުންވާ ނަތީޖާތައް ހޯދަން ބަލާއިރު ރަށުން ބޭރުގައި ކުޅޭ މެޗުތަކުން ގިނަ ޕޮއިންޓްތަކެއް ހޯދަން ޖެހޭނެ ކަމަށެވެ.
އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑާއި ލިވަޕޫލް ވާދަކުރާ މެޗު ފަށާނީ ރާއްޖެ ގަޑިން 09:30ގަ އެވެ.
