ޕެރިސް (މާޗް 5) - ކީލިއަން އެމްބާޕޭ، ޕީއެސްޖީގެ ތާރީހުގައި އެންމެ ގިނަ ގޯލު ޖަހައިދިން ކުޅުންތެރިޔާގެ ރެކޯޑް ހެދި ގޯލާ އެކު، ފްރެންޗް ލީގުގައި ރޭ ޕީއެސްޖީން ނޯންޓެސް އަތުން 4-2 އިން މޮޅުވެއްޖެ އެވެ.
ޕީއެސްޖީ އަށް އެންމެ ގިނަ ގޯލު ޖަހައިިދިނުމުގެ ރެކޯޑް ކުރިން އޮތީ އެޑިންސަން ކަވާނީ އަތުގަ އެވެ. އެއީ 200 ގޯލު ޖަހައިގެންނެވެ. ރޭގެ މެޗުގެ އިތުރު ވަގުތުގައި ނޯންޓެސް ކޮޅަށް އެމްބާޕޭ، 24، ޖެހި ގޯލަކީ ޕީއެސްޖީ އަށް އޭނާ ކާމިޔާބުކޮށްދިން 201 ވަނަ ގޯލެވެ. މޮނާކޯ ދޫކޮށް، 2017 ވަނަ އަހަރު ޕީއެސްޖީއާ ގުޅުނު އެމްބާޕޭ ވަނީ އެ ޓީމަށް ކުޅެދިން 247 މެޗުން 201 ގޯލު ޖަހައިފަ އެވެ.
ރޭގެ މެޗުގެ 12 ވަނަ މިނިޓްގައި ޕީއެސްޖީ އަށް ލީޑުނަގައިދިނީ އޭރިއާތެރެއިން ލިބުނު ފުރުސަތަކުން ގޯލުގެ ތިރީ ކަނަށް ބޯޅަ ފޮނުވާލައިގެން މެސީ އެވެ. މެޗުގެ 17 ވަނަ މިނިޓްގައި ޕީއެސްޖީން ލީޑުފުޅާކުރި ލަނޑަކީ ނޯންޓެސްގެ ޖޯއެން ހަޖާމް އަތުން ބައިކޮޅަށް ވަން ގޯލެކެވެ.
ދެ ގޯލުގެ ލީޑެއް ނެގި ނަމަވެސް ޕީއެސްޖީ އަށް ކުރީގައި އޮވެ ފުރަތަމަ ހާފު ނިންމައިނުލެވުނެވެ. އެ ގޮތުން، މެޗުގެ 31 ވަނަ މިނިޓްގައި ނޯންޓެސްގެ ލުޑޮވިކް ބްލާސް ހަނި އޭންގަލުން ގޯލަށް ބޯޅަ ފޮނުވާލައި އެ ޓީމުގެ ފުރަތަމަ ގޯލު ޖެހި އެވެ. ބްލާސް ޖެހި ބޯޅަ ގޯލަށް ވަނީ ޕީއެސްޖީ ކީޕަރު ޖިއަންލުއީޖީ ޑޮންނަރުންމާ އަތުގައި ޖެހިފަ އެވެ. އޭގެ ހަތް މިނިޓް ފަހުން، ކޯނަރެއްގައި ތަނަވަސްކުރި ފުރުސަތެއްގައި އިގްނާޝިއަސް ގަނާގޯ ވަނީ ގޯލު ރޮނގުމަތިން ބޮލުން ގޯލެއް ޖަހައި އެ ޓީމަށް އެއްވަރުކޮށްދީފަ އެވެ.
ޕީއެސްޖީ މޮޅުވީ ދެ ވަނަ ހާފުގައި އިތުރު ދެ ގޯލު ޖަހައިގެންނެވެ. މެޗުގެ 60 ވަަނަ މިނިޓްގައި ޕީއެސްޖީ އަށް އަލުން ލީޑުނަަގައިދިނީ އޭރިއާތެރެއިން ޑަނީލޯ ޕެރޭރާ ބޮލުން ޖެހި ގޯލުންނެވެ. މިއީ އެމްބާޕޭ ނެގި ހުރަހަކުން ޑަނީލޯ ޖެހި ގޯލެކެވެ. އިތުރު ވަގުތުގައި އެމްބާޕޭ، ޕީއެސްޖީގެ ފަހު ގޯލު ޖެހީ އޭރިއާތެެރެއިން ލިބުނު ބޯޅަ ކޮންޓްރޯލް ކުރުމަށް ފަހު ގޯލުގެ ދުރު ކަނަށް ފޮނުވާލައިގެންނެވެ.
