ލަންޑަން (މާޗް 5) - އިނގިރޭސި ޕްރިމިއާ ލީގުގައި މިރޭ ނިއުކާސަލް ޔުނައިޓެޑް 2-0 އިން ބަލިކޮށް، މެންްޗެސްޓާ ސިޓީން ލީގުގެ ރޭހުގައި ފަރަގު ކުޑަކުރަން އުންމީދެއްގައި ތިއްބައި، ފަހަތުން އަރައި 3-2 އިން ބޯންމައުތު ބަލިކޮށް ލީގުގެ ކުރީގައި އޮތް އާސެނަލުން ޗެމްޕިއަންކަން ހޯދަން ބޭނުންވާ ހިތްވަރު ދައްކައިފި އެވެ.
ނިއުކާސަލް އަތުން މޮޅުވެ، ސިޓީން ވަނީ މިރޭ އާސެނަލްގެ މެޗުގެ ކުރިން އެ ޓީމާ ދެ ޕޮއިންޓަށް ގާތަށް ޖެހިލައިފަ އެވެ. މެޗުގެ ފަހު ސިކުންތު ކޮޅުގެ ތެރޭގައި އާސެނަލުން ޖެހި ގޯލުން މޮޅުވެ، އެ ޓީމުން ވަނީ ލީގުގެ އެއް ވަނައިގައި ފަސް ޕޮއިންޓުގެ ލީޑު ދަމަހައްޓައިފަ އެވެ.
އާސެނަލަށް ވަނީ 26 މެޗުން 63 ޕޮއިންޓް ލިބިފަ އެވެ. ދެ ވަނައިގައި އޮތް މެންޗެސްޓާ ސިޓީގެ އޮތީ 26 މެޗުން 58 ޕޮއިންޓެވެ. ލީގުގެ ރޭހުގައި ދެން އޮތް މެންޗެސްޓާ ޔުނައިޓެޑަށް 24 މެޗުން ވަނީ 49 ޕޮއިންޓް ލިބިފަ އެވެ. ޔުނައިޓެޑުން މާދަމާރޭ ލިވަޕޫލް ދަނޑުގައި އެ ޓީމާ ދެކޮޅަށް ނުކުންނާނެ އެވެ.
އަމިއްލަ ދަނޑުގައި ކުޅުނު ސިޓީން ނިއުކާސަލް ބަލިކުރިއިރު، ގޯލުތައް ޖެހީ ފުރަތަމަ ހާފުގައި ފިލް ފޯޑެން އަދި ދެ ވަނަ ހާފުގައި ބެނާޑޯ ސިލްވާ އެވެ. މި މެޗުގައި ގޯލު ޖަހަން ނިއުކާސަލަށް ލިބުނު ފުރުސަތުތައް ބޭނުންނުކުރެވިދިޔައިރު، މިއީ ސިޓީގެ ކީޕަރު އެޑަސަން މޮރާއެސް ކޮޅަށް ގޯލެއް ނުވަދެ، ޕްރިމިއާ ލީގުގައި އޭނާ ފުރިހަމަ ކުރި 100 ވަނަ މެޗެވެ. ކޮޅަށް ގޯލެއް ނުވަދެ، 100 ކްލީންޝީޓް ހަމަކުރުމުގެ ރެކޯޑެއް ޕްރިމިއާ ލީގުގައި އޮތީ ހަ ކީޕަރެއް އަތުގަ އެވެ.
އާސެނަލް ދަނޑުގައި މިރޭ ބޯންމައުތުން ވަނީ ނުވަ ވަނަ ސިކުންތުގައި ފިލް ބިލިންގެ ގޯލުން ލީޑުނަގައިފަ އެވެ. އަދި 57 ވަނަ މިނިޓްގައި މާކޯ ސެނޭސީ ބޮލުން ގޯލެއް ޖަހައި، ބޯންމައުތަށް ލީޑުފުޅާކޮށްދިނެވެ. އާސެނަލް ކޮޅަށް ނަތީޖާ އަނބުރާލުމުގައި ބަދަލަކަށް ކުޅެން އެރި ރީސް ނެލްސަން މުހިންމު ރޯލެއް ކުޅުނެވެ.
އެ ގޮތުން، މެޗުގެ 62 ވަނަ މިނިޓްގައި އާސެނަލަށް ފުރަތަމަ ގޯލު ޖަހައިދިނީ އެމީލް ސްމިތު ރޯވް ދިން ބޯޅައަކުން ތޯމަސް ޕާޓޭ އެވެ. މެޗުގެ 70 ވަަނަ މިނިޓްގައި ނެލްސަން ދިން ބޯޅައަކުން ބެން ވައިޓް އާސެނަލަށް އެއްވަރުކޮށްދިންއިރު، އިތުރު ވަގުތަށް ދެއްކި ހަތް މިނިޓް ވެސް ފުރިހަމަވި ފަހުން ކޯނަރެއްގައި ލިބުނު ފުރުސަތެއްގައި ނެލްސަން ވަނީ އާސެނަލް މޮޅުކޮށްދީފަ އެވެ.
ލީގުގެ ހަތަރެއްގައި އޮތް ޓޮޓެންހަމް ހޮޓްސްޕާސް ވަނީ މިރޭ ރަށުންބޭރުގައި ވުލްވްސް އަތުން 1-0 އިން ބަލިވެފަ އެވެ. ވުލްވްސްގެ ހަމައެކަނި ގޯލު ޖެހީ އެޑަމާ ޓްރައޯރޭ އެވެ. ޓޮޓެންހަމް ހަތަރެއްގައި އޮތީ 26 މެޗުން 45 ޕޮއިންޓާ އެކު އެވެ.
ޗެލްސީން ވެސްލީ ފޮފާނާ ކޯނަރެއްގައި ބޮލުންޖެހި ގޯލުން 1-0 އިން ލީޑްސް ޔުނައިޓެޑް ބަލިކުރިއިރު، މިއީ އެންމެ ފަހުން ކުޅުނު 15 މެޗުން ޗެލްސީން ހޯދި ފުރަތަމަ މޮޅެވެ. މި ތިން ޕޮއިންޓާ އެކު ޗެލްސީ އޮތީ 25 މެޗުން 34 ޕޮއިންޓް ހޯދައިގެން ލީގުގެ 10 ވަނައިގަ އެވެ.
