މިލާން (މާޗް 3) - އިޓާލިއަން ލީގުގައި އެންމެ ފަހުން ކްރެމޮނެސޭ އަތުން 2-1 އިން އޭއެސް ރޯމާ ބަލިވި މެޗުގައި އެ ޓީމުގެ ކޯޗު ހޯސޭ މޮރީނިއޯ، ރެފްރީއާ ދިމާކޮށްލި މައްސަލަައިގައި އޭނާ ދެއްކި ރަތް ކާޑާ އެކު، އެ މެޗަށް ފަހު ހިނގާދިޔަ ކަންތައްތަކުގެ މައްސަލަ ބަލައި، މޮރީނިއޯ 10،000 ޑޮލަރުން ޖޫރިމަނާކޮށްފި އެވެ.
ކްރެމޮނެސޭ އަތުން ރޯމާ ބަލިވި މެޗުގައި މޮރީނިއޯ އަށް ދެއްކީ މި ސީޒަނުގައި އޭނާ އަށް ދެއްކި ތިން ވަނަ ރަތް ކާޑެވެ. އިޓާލިއަން ލީގުގައި މި ފަހަރު އެންމެ ރަތް ކާޑު ގިނައީ ވެސް މޮރީނިއޯގެ އެވެ.
މޮރީނިއޯ އަށް ރަތް ކާޑު ދެއްކީ ހަތަރު ވަނަ އޮފިޝަލް، މާކޯ ސޭރާއާ ދިމާކޮށްލާފައިވާތީ އާއި ތަކުރާރުކޮށް ރެފްރީގެ ނިންމުމަށް ފާޑުކިޔައިފައިވާތީ އެވެ. މޮރީނިއޯ، އަށް ރަތް ކާޑު ދައްކައި، ބެންޗުން ފޮނުވާލީ ދެ ވަނަ ހާފުގެ ކުޅުން ފެށިތާ ދެ މިނިޓް ތެރޭގަ އެވެ.
އެ މެޗަށް ފަހު މޮރީނިއޯ ވަނީ ރެފްރީންގެ ރޫމަށް ވަދެ، ސޭރާއާ ވާހަކަ ދައްކަން މަސައްކަތް ކޮށްފަ އެވެ. އަދި ރެފްރީންގެ ރޫމަށް މޮރީނިއޮ ވަތް މައްސަލައާ ގުޅޭ ކަންތައްތައް ބަލައި، އޭނާ ދެ މެޗަށް ސަސްޕެންޑްކޮށް، 10،000 ޑޮލަރުން ޖޫރިމަނާކޮށްފައިވެ އެވެ.
މޮރީނިއޯ، ރެފްރީންގެ ރޫމަށް ވަދެ، ދެއްކި ވާހަކަތައް އިޓަލީގެ މީޑިއާގައި ވަނީ ރިޕޯޓްކޮށްފަ އެވެ. އެ ގޮތުން މޮރީނިއޯ ވަނީ ސޭރާ ގަސްދުގައި ރޯމާއާ ދެކޮޅަށް ނިންމުންތައް ނިންމަން މެޗު ރެފްރީ އަށް ލަފާދީފައިވާ ކަމަށް ބުނެ، ތުހުމަތުކޮށްފަ އެވެ. އަދި ސޭރާ އެ ކަމަށް މާފަށް އެދެން ވެސް މޮރީނިއޯ ޑިމާންޑްކުރި އެވެ.
ސޭރާ މާފަށް އެދެން ދެކޮޅު ހެދުމުން މޮރީނިއޯ ބުނެފައިވަނީ ކަންތައްތައް ހިނގާގޮތް އެނގޭ ކަމަށާއި ސޭރާ އަކީ ޓިއުރިން އަށް ނިސްބަތްވާ މީހެއް ކަމަށްވާތީ، އޭނާ ބޭނުންވީ އާދިއްތަ ދުވަހު ޔުވެންޓަސްއާ ދެކޮޅަށް ރޯމާ ކުޅޭ މެޗަށް މޮރީނިއޯ ސަސްޕެންޑްކޮށް، ބެންޗަށް ނާދެވޭ ގޮތް ހެދުމަށް ކަމަށެވެ.
މޮރީނިއޯގެ އެ ވާހަކަ އަށް ރައްދުދިނުމުގެ ގޮތުން ސޭރާ ބުނީ އެ ވާހަކަ އެ ގޮތަށް ހަދަހަދައިގެން މޮރީނިއޯ ދައްކާނެކަން ކުރިން ވެސް އެނގޭ ކަމަށާއި ހަގީގަތުގައި މޮރީނިއޯ ޖަޒުބާތުގައި ޖެހިގެން ހެދުނީ ގޯހެއްކަން އެއްބަސްވާން ޖެހޭ ކަމަށެވެ.
