މި އަހަރުގެ "ރައިސީނާ ޑައިލޮގް"ގައި ބައިވެރިވެވަޑައިގަތުމަށް ފޮރިން މިނިސްޓަރު އަބްދުﷲ ޝާހިދު އިންޑިއާއަށް ވަޑައިގެންފި އެވެ.
މާޗް 2 އިން 4 އަށް ކުރިއަށްދާ މި އަހަރުގެ ކޮންފަރެންސްގައި ބާއްވާ ޕެނަލް ޑިސްކަޝަނެއްގައި މިނިސްޓަރު ޝާހިދު ބައިވެރިވެވަޑައިގަންނަވާނެ ކަމަށް ފޮރިން މިނިސްޓްރީޏް ބުނެ އެވެ.
ކޮންފަރެންސްގެ ބައިވެރިވެވަޑައިގަތުމުގެ އިތުރުން ޝާހިދު މި ދަތުރުފުޅުގައި އިންޑިއާ ސަރުކާރުގެ އިސް އޮފިޝަލުންނާ ބައްދަލުކުރެއްވުމަށް ހަމަޖެހިފައިވެ އެވެ.
ރައިސީނާ ޑައިލޮގަކީ ކޮބާ؟
ރައިސީނާ ޑައިލޮގަކީ މިނިސްޓްރީ އޮފް އެކްސްޓާނަލް އެފެއާޒާއި އޮބްޒާވާ ރިސާޗް ފައުންޑޭޝަން (އޯއާރުއެފް) އާ ގުޅިގެން ބާއްވާ ބައިނަލްއަގުވާމީ ކޮންފަރެންސެވެ. މި އަހަރުގެ ކޮންފަރެންސް އިފްތިތާހު ކޮށްދެއްވާނީ ބޮޑުވަޒީރު ނަރެންދުރަ މޯދީ އެވެ.
އިންޑިއާގެ ވެރިކަންކުރާ ސިޓީ، ދިއްލީގައި ބާއްވާ ކޮންފަރެންސްގައި 100 އަށް ވުރެ ގިނަ ގައުމުތަކުން ސަރުކާރުގެ އިސްވެރިންނާއި މިނިސްޓަރުންނާއ އަސްކަރީ ކޮމާންޑަރުންނާއި އިގްތިސޯދީ އަދި ވިޔަފާރީގެ ދާއިރާތަކުގެ ވެރިން ބައިވެރިވެ އެވެ.
މިފަހަރު ކޮންފަރެންސްގެ ޝަރަފުވެރި މެހްމާނަކީ އިޓަލީވިލާތުގެ ބޮޑުވަޒީރު ޖޯޖީޔާ މެލޯނީ އެވެ.
