ބޭންކް އޮފް މޯލްޑިވްސް (ބީއެމްއެލް) ގައި ހުޅުވާފައި ހުންނަ އެކައުންޓުތަކުން ކަސްޓަމަރުންނަށް ނޭނގި ފައިސާ ނަގަމުންދާ މައްސަލައިގައި ހަމައެކަނި ބޭންކް ކުށްވެރި ކުރުން ގޯސް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މަކަރާއި ހީލަތުން ކަސްޓަމަރުންގެ އިންޓަނެޓް ބޭންކިން ޔޫސާނޭމް އަދި ޕާސްވޯޑް ހޯދައިގެން އެކައުންޓުގައި ހުންނަ ފައިސާ ކެނޑޭ މައްސަލަ އާންމު ވެފައިވާ ދަނޑިވަޅެއްގައި، ރައްޔިތުންގެ މަޖިލީހުގެ މިއަދުގެ ޖަލްސާގައި ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ ވަނީ އެކަމާ ގުޅިގެން ކުއްލި މައްސަލައެއް ހުށަހަޅާފަ އެވެ.
ކުއްލި މައްސަލައަށް ބަހުސް ކުރި މެންބަރުން ވަނީ ކުއްލި މައްސަލައަށް ބަހުސް ކުރެއްވި ގިނަ މެންބަރުން ވަނީ މި މައްސަލައިގައި ބީއެމްއެލްއިން އެކަށީގެންވާ ފިޔަވަޅެއް ނާޅާ ކަމުގެ ކަންބޮޑުވުން ފާޅުކޮށް، އިހުމާލު އޮތް ކަން ފާހަގަކޮށްފަ އެވެ. އަދި މިގޮތަށް ގެއްލޭ ފައިސާ އަނބުރާ ދިނުމުގެ ފުރިހަމަ ޒިންމާ ބީއެމްއެލްއިން ނަގަންޖެހޭނެ ކަމަށް ވެސް މެމްބަރުން ވިދާޅުވި އެވެ.
ކުއްލި މައްސަލައިގެ ބަހުސް ތެރެއިން ނަޝީދު ވިދާޅުވީ ވައްކަމެއް ހިނގާ ކަމަށް މެންބަރުން ބުނާ ކަމަށާއި ވައްކަމެއް ހިނގުމުން ހުށަހަޅަން ޖެހެނީ ފުލުހުންނަށް ކަމަށެވެ.
"ވައްކަމެއް ހިނގީމާ ފުރަތަމަ ދާން ޖެހެނީ ފުލުސް އޮފީހަށް، އަޅުގަނޑަކަށް އެއްވެސް އިއްޒަތްތެރި މެންބަރަކު މިތަނުގައި ފުލުސް އޮފީހުގެ ވާހަކަ ފާހަގައެއް ނުކުރޭ، ކަނޑައެޅިގެން ވައްކަމެއް މި ކުރަނީ،" ނަޝީދު ވިދާޅުވި އެވެ.
ނަޝީދު ވިދާޅުވީ ވައްކަމުގެ މައްސަލަތައް ބަލަން ހަވާލުކޮށްފައި އޮތީ ބޭންކަކާ ނޫން ކަމަށެވެ.
ނަޝީދުގެ ވާހަކައަށް ރައްދު ދެއްވަމުން ދެން ބަހުސް ކުރެއްވި މަކުނުދޫ ދާއިރާގެ މެންބަރު މުހައްމަދު ރާއީ ވިދާޅުވީ މައްސަލަ ފުލުހުންނަށް ރިޕޯޓު ކުރުމުން ބުނަނީ ބޭންކަށް ދާން ކަަމަށެވެ. އެހެންނަމަވެސް ބޭންކުން ދެނީ ކަންބޮޑުވާ ޖަވާބެއް ކަމަށް އޭނާ ވިދާޅުވި އެވެ.
"ދެން ގެއްލުނީ ނޫންހޭ، ގުޅާނާލާނަމޭ ބުނެފަ ދެން މަސް ދުވަސް ވާއިރު ވެސް ގުޅާ ނުލެވޭ،" ރާއީ ވިދާޅުވި އެވެ.
ކުއްލި މައްސަލައިގައި އޮތީ ކީކޭ؟
ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ ހުށަހެޅުއްވި ކުއްލި މައްސަލާގައި ބުނެފައިވަނީ، ރާއްޖޭގައި އެހެން ގިނަ ބޭންކުތަކެއް ހިންގަމުންދާއިރު، މި މައްސަލަ ހަމައެކަނި ބީއެމްއެލްއަށް ދިމާވުމަކީ ވަރަށް ބޮޑު ކަންބޮޑުވުމެއް ކަމަށެވެ.
އަދި ބީއެމްއެލްގެ ކަސްޓަމަރުންގެ ޒާތީ މައުލޫމާތުތައް ހޯދައިގެން، އޮޅުވާލައިގެން އެކި އެކައުންޓުތަކުން ފައިސާ ނަގަމުންދާއިރު، އެކަން ރިޕޯޓު ކުރިޔަސް، އެ ފައިސާ އަނބުރާ ނުހޯދި، ގިނަ ބަޔަކަށް އިޔާދަނުކުރެވޭ ވަރުގެ ގެއްލުންތައް ވަމުންދާ ކަމަށް އެ މައްސަލައިގައި ބުނެފައިވެ އެވެ.
އެހެންކަމުން، ނަޝީދު ހުށަހެޅުއްވި އެ ކުއްލި މައްސަލައިގައި ވަނީ މިކަން ހައްލުކޮށްދިނުމަށް ބީއެމްއެލްގެ އިތުރުން ސަރުކާރަށް ގޮވާލައިފަ އެވެ.
އެ ކުއްލި މައްސަލަ މަޖިލީހަށް ބަލައިގެންފައިވަނީ އެކަމަށް ނެގި ވޯޓުގައި ބައިވެރިވެވަޑައިގެންނެވި 33 މެމްބަރުންގެ އަގުލަބިއްޔަތުންނެވެ.
ބީއެމްއެލްގެ އެކައުންޓުތަކުން އޮޅުވާލައިގެން ފައިސާ ނަގަމުންދާ މައްސަލަ މިހާރު ވެސް މަޖިލީހުގެ އެސްއޯއީ ކޮމިޓީން އަންނަނީ ބަލަމުންނެވެ.
ބައެއް ކަސްޓަމަރުންގެ ކްރެޑިޓު ކާޑުތަކުން މުއާމަލާތްތައް ކޮށްފައިވަނީ ބޭރުގެ މާޗެންޓެއްގައި ހުރި ޑޭޓާ ވަގަށް ނަގައިގެން ކަމަށާއި އެފަދަ ހާލަތްތަކުގައި ގެއްލޭ ފައިސާ އަނބުރައި ހޯދައިދޭނެ ކަމުގެ ޔަގީންކަން ބީއެމްއެލް އިން ވަނީ ދީފަ އެވެ.
މަކަރާ ހީލަތުން ފައިސާ ހޯދާ މައްސަލަތަކުގެ ތަހުގީގަށް ލިބިފައިވާ މައުލޫމާތަށް ބަލާއިރު ގިނަ އީމެއިލްތަކެއް ކޮމްޕޮމައިޒްވެފައި ހުރިކަން ފާހަގަ ކުރެވޭތީ އީމެއިލް ޕާސްވޯޑާއި އިންޓަނެޓް ބޭންކިން ޕާސްވޯޑް ބަދަލުކުރުމަށް ފުލުހުން ވެސް ވަނީ އިލްތިމާސްކޮށްފަ އެވެ.
