ޕެރިސް (ފެބްރުއަރީ 27) - ފްރެންޗް ލީގުގައި މިރޭ ލިއޮނަލް މެސީ އާއި ކީލިއަން އެމްބާޕޭ ގުޅިގެން ކާމިޔާބުކުރި ގޯލުތަކާ އެކު، ޕީއެސްޖީން 3-0 އިން މާސޭ ބަލިކޮށް ލީގުގެ ކުރީގައި އަށް ޕޮއިންޓުގެ ލީޑެއް ނަގައިފި އެވެ.
މި މެޗުގައި އެމްބާޕޭ ވަނީ ޕީއެސްޖީ އަށް 200 ވަނަ ގޯލު ޖަހައިދީފަ އެވެ. އަނެއްކޮޅުން މެސީ ކާމިޔާބުކުރީ ކްލަބް ކެރިއަރުގެ 700 ވަނަ ގޯލެވެ.
މާސޭ ކައިރިން މޮޅުވެ، ޕީއެސްޖީ އެއް ވަނައިގައި އޮތީ 25 މެޗުން 60 ޕޮއިންޓް ހަމަކޮށްގެންނެވެ. ދެ ވަނައިގައި އޮތް މާސޭ އަށް ވަނީ 25 މެޗުން 52 ޕޮއިންޓް ލިބިފަ އެވެ.
މާސޭގެ ދަނޑު ސްޓޭޑް އޮރެންޖް ވެލޮޑޮރޯމްގައި ކުޅުނު މެޗުގައި ޕީއެސްޖީން ލީޑުނެގީ 25 ވަނަ މިނިޓްގައި އެމްބާޕޭ ޖެހި ގޯލުންނެވެ. މެސީ ދިން ބޯޅައެއް ހިފައިގެން އޭރިއާތެރެއަށް ވަދެ، އެމްބާޕޭ ފޮނުވާލި ބޯޅަ އަމާޒުވީ ގޯލުގެ ދުުރު ކަނަށެވެ. އޭގެ ހަތަރު މިނިޓް ފަހުން، އެމްބާޕޭ، އޭރިއާތެރެއަށް ތިރިތިރިން ހުރަސްކޮށްލި ބޯޅައަށް އަރައި، މެސީ ވަނީ ޕީއެސްޖީގެ ލީޑުފުޅާކޮށްދީފަ އެވެ.
މެޗުގައި މާސޭ އަށް ލަނޑެއް ޖަހަން އެ ޓީމުގެ ރުސްލާން މަލިނޯސްކީ އާއި އަލެކްސިސް ސަންޗޭޒް ގުޅިގެން އެޓޭކްތަކެއް ކުރެވޭތޯ ބެލިނަމަވެސް ޕީއެސްޖީގެ ގޯލުގައި ހުރި އިޓަލީގެ ޖިއަންލުއީޖީ ޑޮންނަރުންމާ ކައިރިން ގޯލެއް ޖެހޭ ގޮތެއްނުވި އެވެ.
ޕީއެސްޖީން ތިން ވަނަ ގޯލު ޖެހީ މެޗުގެ ދެ ވަނަ ހާފުގަ އެވެ. މިއީ ދެ ވަނަ ހާފް ފެށިގެން 10 މިނިޓް ހިނގި ފަހުން، މެޗުގެ 55 ވަނަ މިނިޓްގައި އެމްބާޕޭ ޖެހި ގޯލެކެވެ. މެސީ މަތިން އޭރިއާތެރެއަށް ވައްޓާލި ބޯޅަ އަށް ހުސްކޮށް އަރައި އެމްބާޕޭ ވަނީ ވޮލީ އަކުން ގޯލުގެ ދުރު ކަނަށް ފޮނުވާލައިފަ އެެވެ.
މި މެޗުގައި ޖެހި ދެ ގޯލާ އެކު އެމްބާޕޭ ވަނީ ޕީއެސްޖީ އަށް އެންމެ ގިނަ ގޯލު ޖަހައިދީގެން އެ ޓީމަށް ކުރިން ކުޅުނު ފޯވާޑް އެޑިންސަން ކަވާނީ ހަދާފައިވާ ރެކޯޑާ ހަމަކޮށްފަ އެވެ. ކަވާނީ، ޕީއެސްޖީ އަށް 200 ގޯލު ހަމަކުރީ 301 މެޗު ކުޅެދީގެންނެވެ. އުމުރުން، 24، އަހަރުގެ އެމްބާޕޭ މި ވަނީ 247 މެޗުން 200 ގޯލު ޖަހައިފަ އެވެ.
މި މެޗުގައި މެސީ، ޖެހި ގޯލަކީ އޭނާ ކްލަބް ކެރިއަރުގައި ކާމިޔާބުކުރި 700 ވަނަ ގޯލެވެ. މެސީ ވަނީ ބާސެލޯނާ އަށް 672 ގޯލު ޖަހައިދީފަ އެވެ. ޕީއެސްޖީ އަށް ކާމިޔާބުކޮށްދިނީ 28 ގޯލެވެ.
ޕީއެސްޖީގެ ކޯޗު ކްރިސްޓޮފް ގަލްޓިއޭ ފާހަގަކުރާގޮތުގައި ސީޒަނުގެ މުހިންމު ހިސާބަށް އަންނައިރު، ޓީމުގައި ތިބި އެންމެ މުހިންމު ކުޅުންތެރިން ކަމަށްވާ އެމްބާޕޭ އާއި މެސީގެ ކޮމްބިނޭޝަން ރަނގަޅުވުމަކީ ބޮޑު ހިތްހަމަޖެހުމެކެވެ.
