ލަންޑަން (ފެބްރުއަރީ 26) - އިނގިރޭސި ޕްރިމިއާ ލީގުގައި މިރޭ ޓޮޓެންހަމް ހޮޓްސްޕާސް އަތުން 2-0 އިން ބަލިވެ، ޗެލްސީގެ ކޯޗު ގްރަހަމް ޕޮޓާ އިތުރު ޕްރެޝަރަކަށް ވައްޓާލައި އެ ޓީމުގެ ސީޒަން އުނދަގޫ ފައްތަރަކަށް ގޮސްފި އެވެ.
މި މެޗުން ބަލިވެ، ލީގުގެ ގަދަ ހަތަރެއްގައި ނިންމުމުގެ ފުރުސަތު ޗެލްސީ އަށް ވަނީ ހަނިވެފަ އެވެ. ހަތަރެއްގައި އޮތް ޓޮޓެންހަމް އަށް 25 މެޗުން 45 ޕޮއިންޓް ލިބިފައިވާއިރު، ޗެލްސީ 10 ވަނައިގައި އޮތީ 24 މެޗުން 31 ޕޮއިންޓް ހޯދައިގެންނެވެ.
ލީގުގައި އެންމެ ފަހުން ކުޅުނު 15 މެޗުގެ ތެރެއިން ޗެލްސީ މޮޅުވީ އެންމެ ދެ މެޗުންނެވެ. ގަދަ ހަތަރެއް ހޯދުމުގެ ފުރުސަތު ޗެލްސީ އަށް ފަނޑުވަމުން އަންނައިރު، އަންނަ ސީޒަނުގެ ޗެމްޕިއަންސް ލީގަށް ޗެލްސީ ކޮލިފައިނުވެއްޖެނަމަ އެ ޓީމުން މާލީ ގޮތުން ކްލަބްގެ ހިންގުމަށް ގިނަ ބަދަލުތަކެއް ގެންނަން ޖެހޭނެ އެވެ.
މެޗަށް ފަހު ޗެލްސީގެ ކޯޗު ޕޮޓާ ބުނީ ކޮންމެ މެޗެއްގައި ނަތީޖާ ދަށްވުމާ އެކު މީޑިއާ ކުރިމަތީގައި ހުރެ ދައްކަން ޖެހެނީ ޕާފޯމަންސްގައި ހުރި ރަނގަޅު ކަންތައްތަކުގެ ވާހަކަ ކަމަށެވެ. އެކަމަކު، މިހާރު ނަތީޖާ އެ ހުރީ އަރައިގަންނަން އުނދަގޫ ހިސާބެއްގައި ކަމަށް ފާހަގަކޮށް ޕޮޓާ ބުނީ ކަންކަން ރަނގަޅުކުރެވޭނެ ކަމުގެ އުންމީދު އެބައޮތް ކަމަށެެވެ.
ޗެލްސީގެ ކޯޗު ގްރަހަމް ޕޮޓާ މިރޭ ޓޮޓެންހަމާ ދެކޮޅަށް ކުޅުނު މެޗުގެ ތެރެއިން.
މެޗުގެ ފުރަތަމަ ހާފުގެ އިތުރު ވަގުތުގައި ޗެލްސީގެ ހަކީމް ޒިޔެޗަށް ދެއްކި ރަތް ކާޑެއް ވަނީ ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީގައި ރީނދޫ ކާޑަކަށް ބަދަލުކޮށްފަ އެވެ. ޒިޔެޗަށް ރަތް ކާޑު ދެއްކީ ބޯޅަ ނެތިސް ކުޅުންތެރިއަކަށް ހަމަލާއެއް ދިން ކަމަށް ބަލައިފަ އެވެ. އެކަަމަކު، ވީއޭއާރް އިން ބަލާފައި، ނިންމީ އެއީ ރީނދޫ ކާޑެއް ކަމަށެވެ.
ޓޮޓެންހަމް އިން މިރޭގެ މެޗުގައި ލީޑުނެގީ ދެ ވަނަ ހާފްގެ ކުޅުން ފެށިތާ މިނިޓެއްގެ ތެރޭގައި އޭރިއާބޭރުން އޮލިވާ ސްކިޕް ޖެހި ގޯލުންނެވެ. އެ ބޯޅަ އަމާޒުވީ ގޯލުގެ މަތީ ދާގަނޑަށެވެ. ޗެލްސީ ޑިފެންޑަރުން ކައިރިން ގޮސް އެ ބޯޅަ ގޯލަށް ވަނީ ޗެލްސީގެ ކީޕަރު ކެޕާ އަރިއްޒަބަލާގާ އަތުގައި ޖެހިފަ އެވެ.
ޗެލްސީން ނަތީޖާ ހަމަހަމަކުރެވޭތޯ ގިނަ އެޓޭކްތަކެއް ކުރި ނަމަވެސް ޓޮޓެންހަމް އިން ވަނީ 81 ވަނަ މިނިޓްގައި ދެ ވަނަ ގޯލު ޖަހައިފަ އެވެ. މިއީ ކޯނަރެއްގައި ސޮން ހެއުން މިން ނެގި ބޯޅައެއް އެރިކް ޑަޔާ ޖައްސާލުމުން އޭރިއާތެރެއިން ހެރީ ކޭން ހަމަޖެހިލާފައި ޖެހި ގޯލެކެވެ. މިއީ ކޭން މި ސީޒަނުގެ ހުރިހާ މުބާރާތެއްގައި ޖެހި 20 ވަނަ ގޯލެވެ. ކޭން މި ވަނީ ޖެހިޖެހިގެން ނުވަ ސީޒަނުގައި މަދުވެގެން ކޮންމެ އަހަރެއްގައި 20 ލަނޑު ޖަހައިފަ އެވެ.
