މެންޗެސްޓާ (ފެބްރުއަރީ 24) - ޔުއެފާ ޔޫރޮޕާ ލީގުގެ ނޮކައުޓް ޕްލޭއޮފް ބުރުގެ ދެ ވަނަ ލެގުގައި ރޭ ފަހަތުން އަރައި 2-1 އިން މޮޅުވެ، މެންޗެސްޓާ ޔުނައިޓެޑުން ބާސެލޯނާ ކަޓުވާލިއިރު، ފްރާންސްގެ ނޯންޓެސް ކޮޅަށް އަންހެލް ޑި މާރިއާ ހެދި ހެޓްރިކުން 3-0 އިން ޔުވެންޓަސް މޮޅުވެ، މުބާރާތުގެ ގަދަ 16 ބުރުުން ފުރުސަތު ހޯދައިފި އެވެ.
ބާސެލޯނާ ދަނޑުގައި މިދިޔަ ހަފްތާގައި 2-2 އިން އެއްވަރުވިއިރު، ރޭގެ މެޗުން ޔުނައިޓެޑް ދަނޑުގައި ކޮންމެ ޓީމެއް މޮޅުވިޔަސް އޮތީ ގަދަ 16 ބުރުން ފުރުސަތު ލިބޭ ގޮތަށެވެ. އެ ގޮތުން ރޭ ފުރަތަމަ ލީޑުނެގީ ބާސެލޯނާ އިންނެވެ. މެޗުގެ 18 ވަނަ މިނިޓްގައި ޕެނަލްޓީ އަކުން ބާސެލޯނާގެ ގޯލު ޖެހީ ރޮބަޓް ލެވަންޑޯސްކީ އެވެ. މިއީ ޔުނައިޓެޑްގެ ބްރޫނޯ ފެނާންޑޭސް އެ ޓީމުގެ އޭރިއާތެރެއިން ބާސެލޯނާގެ އަލެހަންދްރޯ ބާލްޑޭ އަށް ކުރި ފައުލަކަށް ދިން ޕެނަލްޓީ އެކެވެ.
ޔުނައިޓެޑުން އެއްވަރުކުރީ ދެ ވަނަ ހާފްގެ ކުޅުން ފެށިގެން ދެ ވަނަ މިނިޓްގަ އެވެ. އޭރިއާ ރޮނގުކައިރިން ފްރެޑް ވަނީ ބޯޅަ ކޮންޓްރޯލް ކުރުމަށްފަހު ތިރީ ކަނަށް ފޮނުވާލައިފަ އެވެ. ބާސެލޯނާ އަށް އަލުން ލީޑުނަގައިދޭން ޖޫލްސް ކޫންޑޭ ބޮލުންޖެހި ބޯޅަ ޔުނައިޓެޑް ކީޕަރު ޑޭވިޑް ޑެހެއާ މަތަކުރި އެވެ.
މެޗުން ޔުނައިޓެޑް މޮޅުކޮށްދިން ގޯލު ޖެހީ ބަދަަލަކަށް ކުޅެން އެރި އެންޓޮނީ އެވެ. މިއީ މެޗުގެ 73 ވަނަ މިނިޓްގައި ބާސެލޯނާ އޭރިއާތެރެއިން ގޯލުގެ ދުރު ކަނަށް ބޯޅަ ފޮނުވާލައިގެން އެންޓޮނީ ޖެހި ގޯލެކެވެ.
ނޯންޓެސް ކޮޅަށް ގޯލު ޖެހުމަށް ފަހު ޑި މާރިއާ އުފާފާޅުކުރަނީ: މިއީ ޔުވެންޓަސް އަށް ޑި މާރިއާ ހަދައިދިން ފުރަތަމަ ހެޓްރިކް ފެނިގެންދިޔަ މެޗު.
ޔުވެންޓަސް ދަނޑުގައި މިދިޔަ ހަފްތާގައި 1-1 އިން އެއްވަރުވި ނަމަވެސް ރޭ ނޯންޓެސް ދަނޑުގައި ޔުވެންޓަސް ވަނީ ފުރިހަމަ މޮޅެއް ހޯދައިފަ އެވެ. މެޗުގެ ފަސް ވަނަ މިނިޓްގައި ޑި މާރިއާ ގޯލެއް ޖަހާފައި ވަނިކޮށް، ނޯންޓެސްގެ ނިކޮލަސް ޕަލޯއިސް ކުރި ފައުލަކަށް އޭނާ އަށް ރަތް ކާޑެއް ދެއްކުމުން، ޕެނަލްޓީން ޑި މާރިއާ ވަނީ ޔުވެންޓަސްގެ ލީޑުފުޅާކޮށްދީފަ އެވެ. ޑިމާރިއާ، ހެޓްރިކް ފުރިހަމަ ކުރީ މެޗުގެ 78 ވަނަ މިނިޓްގައި އޭރިއާތެރެއިން ބޮލުން ޖެހި ގޯލުންނެވެ.
ރޭ ކުޅުނު ދެ ވަނަ ލެގުގެ އެހެން މެޗުތަކުގެ ނަތީޖާ އަށް ބަލާއިރު، ރޯމާ ވަނީ 2-0 އިން ރެޑްބުލް ސަލްޒްބާގް ބަލިކޮށްފަ އެވެ. ޕީއެސްވީ އައިންދޯވަން އިން 2-0 އިން ސެވިއްޔާ ބަލިކުރިޔަސް އެގްރިގޭޓުން ދިޔައީ ސެވިއްޔާ އެވެ. މޮނާކޯ ދަނޑުގައި 3-2 އިން މޮޅުވެ، އެގްރިގޭޓް އެއްވަރުވުމުން، ޕެނަލްޓީ ޖަހައިގެން ލެވަކޫސަން ވެސް ވަނީ އަނެއް ބުރަށް ދަތުރުކޮށްފަ އެވެ. ޔޫނިއަން ބާލިން އިން 3-1 އިން އަޔަކްސް ކަޓުވާލިއިރު، ޝަކްތާރު ޑޮނެސްކް އިން ވަނީ ޕެނަލްޓީ ޖަހައިގެން ފްރާންސްގެ ރެނެސް ކަޓުވާލައިފަ އެެވެ.
