ސިޔާސީ ދާއިރާއަށް އަންހެނުން ނުނިކުމެ ވާން ނެތް ކަމަށް ޓްރާންސްޕޯޓު މިނިސްޓަރު އައިޝަތު ނަހުލާ ވިދާޅުވެއްޖެ އެވެ.
ޖުމްހޫރީ ޕާޓީގެ ޑެޕިއުޓީ ލީޑަރު ކަމަށް ކުރިމަތިލައްވައި، ކެމްޕެއިނު ކުރުމަށް ރޭ ބޭއްވި ޖަލްސާއެއްގައި ނަހުލާ ވަނީ ސިޔާސީ މައިދާނަށް ނުކުންނަން ޖެހުނު ގޮތުގެ ވާހަކަ ތަކުރާރު ކުރައްވައިފަ އެވެ.
ފިރިކަލުން ގާސިމް އިބްރާހިމާއި ދޮންދަރިކަލުން ސިޔާދު ގާސިމްގެ ހައްގުގައި ސިޔާސީ މައިދާނަށް ނުކުންނަން ޖެހިވަޑައިގެންނެވި ނަމަވެސް، މަސްރަހު ބަލާލިއިރު "ކަމަކު ދާކަށް ނެތް" ކަމަށް ނަހުލާ ވިދާޅުވި އެވެ.
ނަހުލާ ވިދާޅުވީ އަންހެނުންނަކީ ވަރަށް ހިތްވަރުގަދަ ބައެއް ކަމަށާއި ކޮންމެ ކަމަކާ ވެސް ކުރިމަތިލާނެ އަދި އެކަމެއް ކޮށްފަ ދައްކާނެ ބައެއް ކަމަށެވެ.
"އަޅުގަނޑުމެން ގޭގައި ތިބެގެން ވާކަށް ނެތް، އަޅުގަނޑުމެންގެ ބަސް ކިޔުން ނެތި ކަންތައްތައް ނިންމަން ވެއްޖެއްޔާ އެއްގޮތަކަށް ވެސް ހިއެއް ނުވޭ ރަނގަޅުވާނެ ހެންނެއް،" އަންހެނުން މި ދާއިރާއަށް ނުކުތުމަށް ގޮވާލައި ނަހުލާ ވިދާޅުވި އެވެ.
ދީނުގައި ކަން އޮންނަ ގޮތުގެ މިސާލު ނަންގަވައި ނަހުލާ އިތުރަށް ވިދާޅުވީ، އަންހެނުންގެ މަޝްވަރާ އާއި އަންހެނުންގެ ނިންމުންތަކަކީ މުހިންމު ކަންކަން ކަމަށެވެ.
ޖޭޕީގެ ކައުންސިލްގައި ހިމެނިވަޑައިގަންނަވާ ނަހުލާ އިތުރަށް ވިދާޅުވީ އެ މަގާމަށް ހޮވިއްޖެނަމަ ފިރިހެނުންނާ އެއް ހަމައެއްގައި ފައިތިލަ ސާބިތުކުރާނެ އަންހެނެއް ކަން ދައްކައިދޭނެ ކަމަށެވެ.
"އަޅުގަނޑުގެ މި މަސައްކަތަކީ އަންހެނުންނަށް ދިރުމެއް ގެނެސްދޭނެ މަސައްކަތެއް ކަމުގައިވާނެކަމުގައި ދަންނަވަން،" ނަހުލާ ވިދާޅުވި އެވެ.
މި މަސައްކަތުގައި އެންމެ ހިތްވަރުދެއްވައި އެއް ބޭފުޅަކީ ފިރިކަލުން ގާސިމް ކަން ފާހަގަކުރައްވައި އޭނާ ވަނީ ގާސިމަށް ވަރަށް ބޮޑަށް ތައުރީފް ކުރައްވައިފަ އެވެ.
"ހިތްވަރު ބަލިވާ ވަގުތު ވެސް އަޅުގަނޑަށް ވާނެ ކަން އަޅުގަނޑަށް ކުރެވޭނެ ކަން ހަނދާން ކޮށްދެއްވައި، އައިޝާ މީހަކަށް ނުބައްލައިވައި އައިޝާ ކުރިއަށް ވަޑައިގަންނަވާށޭ، އައިޝާއަށް ވާނެ އަބަދަވެސް ކަންފަތުގައި އިނދޭ،" އޭނާ ވިދާޅުވި އެވެ.
މި ހަފްތާ ބަންދުގައި އޮންނަ ޖޭޕީ ކޮންގްރެސްގައި އިންތިހާބު ކުރާ ނައިބު ލީޑަރުގެ މަގާމަށް ނަހުލާ ހިމެނޭހެން 11 ބޭފުޅަކު ކުރިމަތިލެއްވި އެވެ. ލީޑަރުގެ މަގާމަށް ކުރިމަތިލެއްވީ އެ ޕާޓީގެ މިހާރުގެ ވެސް ލީޑަރު ގާސިމް އިބްރާހިމް އެކަންޏެވެ.
