ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރު ކަން މާމިގިލި ދާއިރާއަށް ހަތަރުވަނަ ދައުރަކަށް އިންތިހާބުވި ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ދިނުމަށް އަންނަ މަޖިލީހުގެ މެޖޯރިޓީ އޮންނަ ޕީއެންސީގެ ޕާލިމެންޓްރީ ގްރޫޕުގައި މިއަދު މަޝްވަރާކޮށްފި އެވެ.
ވިހިވަނަ މަޖިލީހުގެ 93 މެންބަރުންގެ ތެރެއިން ސަރުކާރާއެކު 79 މެންބަރުން ތިއްބަވާނެ އެވެ. އޭގެ ތެރޭގައި ސީދާ ޕީއެންސީ ތަމްސީލްކުރައްވާ 75 މެންބަރުން ތިއްބަވާނެ އެވެ. މަޖިލީހުގެ ދާއިމީ ކޮމިޓީތަކަކީ، މަޖިލީހުގައި ޕާޓީތައް ތަމްސީލްކުރާ ނިސްބަތަކަށް އެކުލަވާލާ ކޮމިޓީތަކެކެވެ.
އެހެންވެ މިއަދު މެންދުރުފަހު ބޭއްވި ޕީއެންސީގެ ޕާލިމެންޓްރީ ގްރޫޕުގެ ބައްދަލުވުމުގައި ކޮމިޓީތައް ބެހޭނެ ގޮތަކާ ގުޅޭ ގޮތުން މަޝްވަރާކޮށް ބައެއް ކޮމިޓީތަކަށް މެންބަރުންތަކެއްގެ ނަން ހުށަހަޅާފައިވެ އެވެ. އޭގެ ތެރޭގައި މާލިއްޔަތު ކޮމިޓީގެ މުގައްރިރު ކަން ގާސިމަށް ދިނުމަށް މަޝްވަރާކޮށްފައިވެ އެވެ.
ޕީއެންސީގެ އެއް މެންބަރަކު، ނަން ނުޖަހާ ގޮތަށް ކިޔައިދެއްވި ގޮތުގައި އެ ކޮމިޓީގެ މުގައްރިރުކަން ކުރައްވަން ގާސިމް ބޭނުންފުޅުވެގެން ރައީސް ޑރ. މުހައްމަދު މުއިއްޒަށް ހުށަހަޅުއްވާފައިވާތީ އެ ކަމާ ގުޅޭ ގޮތުން މިއަދުގެ ބައްދަލުވުމުގައި މެންބަރުން ވާހަކަ ދެއްކެވި އެވެ.
"އެކި ކޮމިޓީތަކަށް މެންބަރުން ތިބޭނެ ގޮތެއް ނިންމަން ވެގެން، ކޮންމެ ކޮމިޓީއަކަށް ޝައުގުވެރިވާ މެންބަރުންނާއި ލީޑާޝިޕަށް ފެންނަ މެންބަރުންގެ ނަން ހިމަނައިގެން ކޮމިޓީތައް އޮންނަ ގޮތެއް ދެއްކި، އޭގެ ތެރޭގައި ގާސިމް މާލިއްޔަތު ކޮމިޓީގެ މުގައްރިރަށް ލުމަށް ވެސް ވާހަކަ ދެއްކި،" އެ މެންބަރު ވިދާޅުވި އެވެ.
ޕީއެންސީގެ އެހެން މެންބަރަކު ވެސް ވިދާޅުވީ މިއަދުގެ ބައްދަލުވުމުގައި ކޮމިޓީތައް އޮންނާނެ ގޮތެއް ނިންމާފައިނުވާ ކަމަށެވެ. ގާސިމް ވެސް ހިމެނޭ ގޮތަށް ކޮމިޓީތަކުގެ މުގައްރިރުންނަށް ޝައުގުވެރިވާ މެންބަރުންގެ ވާހަކަ ދައްކަވައި މަޝްވަރާ ކުރެއްވި ކަމަށް އޭނާ ވިދާޅުވި އެވެ.
"މިއަދަކު ވަކި ގޮތެއް ނުނިންމާ، ގާސިމްގެ ޝައުގު އޮތް ކަން ފާހަގަކޮށްލި، ދެން ކޮމިޓީތައް އެކުލަވާލަން ޖެހޭތީ އެ އޮންނާނެ ގޮތަކާ ގުޅޭ ގޮތުން ވާހަކަ ދައްކައި ޝައުގުވެރިކަން މެންބަރުންގެ ހުރި ދިމާތައް ބަލައިލީ،" އެ މެންބަރު ވެސް ވިދާޅުވި އެވެ.
ޕީއެންސީގެ ޕާލިމެންޓްރީ ގްރޫޕްގެ ލީޑަރަކަށް އިންތިހާބުކުރި، އިނގުރައިދޫ ދާއިރާގެ އިންތިހާބީ މެންބަރު އިބްރާހިމް ފަލާހު "އަދަދު" ނޫހަށް ވިދާޅުވީ ކޮމިޓީތައް ފައިނަލް ކުރުމަށް މާދަމާގެ ޖަލްސާއަށް ފަހު ޕާލިމެންޓްރީ ގްރޫޕްގެ ބައްދަލުވުމެއް ތާވަލު ކޮށްފައި ވާނެ ކަމަށެވެ.
ޕީޖީ ގްރޫޕްގެ ރަސްމީ ނިންމުމެއް ނެތުމުން، އެކި ކޮމިޓީތަކުގެ މުގައްރިރުންނަށް ހަމަޖައްސަވަން އެ ގްރޫޕްގައި މިއަދު މަޝްވަރާ ކުރެއްވި ނަންތައް ފަލާހު ވިދާޅެއް ނުވެ އެވެ.
"މިހާރު މަޖިލީހުގެ ގާތްގަނޑަކަށް 90 ޕަސެންޓަކީ ޕީއެންސީ އަދި ޕީއެންސީއާ ގުޅިފައިވާ ޕާޓީތަކުގެ މެންބަރުން، ކޮމިޓީތައް އެކުލަވާލަން ވަކި ގޮތެއް ނިންމުމުގެ ކުރިން އެބަ ޖެހޭ މަޝްވަރާކޮށް އެކި މެންބަރުންގެ ވިސްނުން ހުރި ގޮތެއް ބަލަން، އެ ކަން ކުރިއަށް ދިޔައީ މިއަދު،" ފަލާހު ވިދާޅުވި އެވެ.
"ކޮމިޓީތަކަށް މެންބަރުން ނަގާނީ މާދަމާގެ ޖަލްސާއަށް ފަހު،" ފަލާހު ވެސް ވިދާޅުވި އެވެ.
އާ މަޖިލީހުގެ މެންބަރުން ހުވާ ކުރުން އޮންނާނީ މާދަމާ ހެނދުނު 9:00 ޖަހާއިރެވެ. ހުވާ ކުރުމަށް ފަހު އާ މަޖިލީހުގެ ރައީސް އަދި ނައިބު ރައީސް އިންތިހާބު ކުރުމުގެ ޖަލްސާ ފަށާނީ ހެނދުނު 10:15 ގަ އެވެ.
