ރަޝިއާ އާއި ޗައިނާގެ ގުޅުން އާ ހަރުފަތްތަކަކަށް އަރަމުންދާ ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
ޔޫކްރެއިންގައި ކުރަމުންދާ ހަނގުރާމައަށް އަހަރެއް ފުރެން ގާތްވެފައި ވަނިކޮށް ޗައިނާގެ އެންމެ އިސް ޑިޕްލޮމެޓް ވާންގް ޔީ ބުދަ ދުވަހު ރަޝިއާއަށް ވަޑައިގެން، ޕުޓިންއާ ބައްދަލުކުރެއްވި އެވެ.
"ބައިނަލްއަގްވާމީ ހާލަތު ހަމައަކަށް އެޅުވުމަށް" ރަޝިއާ އާއި ޗައިނާ ގުޅިގެން މަސައްކަތް ކުރުން "ވަރަށް މުހިއްމު" ކަމަށް އެ ބައްދަލުވުމުގައި ޕުޓިން ވިދާޅުވި އެވެ.
ވިޔަފާރީގެ އިތުރުން އެހެން ދާއިރާތަކުގައި ވެސް ރަޝިއާ އާއި ޗައިނާއިން "އާ ހަރުފަތްތަކަކަށް އަރަމުންދާ" ކަމަށް ވިދާޅުވެ، ޕުޓިން ފާހަގަކުރެއްވި ގޮތުގައި ދެ ގައުމުގެ ވިޔަފާރީގެ އަގު 2024 ގެ ކުރިން 200 ބިލިއަން ޑޮލަރަށް އަރާނެ އެވެ.
ވާންގް ސިފަކުރެއްވި ގޮތުގައި ޗައިނާ އާއި ރަޝިއާގެ ގުޅުމަކީ ފަރުބަދަައެއްހާ ވަރުގަދަ ގުޅުމެކެވެ. އަދި ބައިނަލްއަގްވާމީ ލޮޅުންތަކުން އެ ފަރުބަދަ ނުގުޑާނެ ކަމަށާއި ތިން ވަނަ ފަރާތެއްގެ އެއްވެސް ޕްރެޝަރެއް އެ ގުޅުމަށް ނޯންނާނެ ކަމަށް ވިދާޅުވި އެވެ.
ޗައިނާއިން ދާދި ފަހުން ބުނެފައި ވަނީ ޔޫކްރެއިންގައި ސުލްހަ ގާއިމްކުރެވޭނެ ރޭވުމެއް އާއްމުކުރާނެ ކަމަށެވެ. އެހެން ނަމަވެސް އެމެރިކާ އާއި ޔޫރަޕުން ދެކޭ ގޮތުގައި އެއީ މާ ބޮޑު ބުރަދަނެއް ހުރި ރޭވުމަކަށް ނުވާނެ އެވެ.
ޕުޓިންގެ އިތުރުން ރަޝިއާގެ ސެކިއުރިޓީއާ ގުޅޭ އެންމެ އިސް އޮފިޝަލް އަދި ފޮރިން މިނިސްޓަރާ ވެސް ވާންގް ބައްދަލުކުރެއްވި އެވެ.
ހުޅަނގުގެ ނޫސްތަކުން ރިޕޯޓު ކުރާ ގޮތުގައި ޗައިނާގެ ރައީސް ޝީ ޖިންޕިން މި އަހަރު ރަޝިއާއަށް ދަތުރުފުޅެއް ކުރައްވާނެ އެވެ.
