ޕެރިސް (ފެބްރުއަރީ 22) - ޕީއެސްޖީގެ ފޯވާޑް ލިއޮނަލް މެސީ މި ސީޒަނަށް ފަހު އެ ކުލަބް ދޫކޮށްލިޔަސް އެ ޓީމުގައި މަޑުކުރަން ބޭނުންވާ ކަމަށް ނޭމާ ބުނެފި އެވެ.
އާޖެންޓީނާގެ ކެޕްޓަން މެސީ ފްރާންސްގެ ޗެމްޕިއަން ޕީއެސްޖީއާ އެކު ހަދާފައިވާ ކޮންޓްރެކްޓް މި ސީޒަންގެ ނިޔަލަށް ހަމަވާނެ އެވެ. މެސީ އަށް އާ ކޮންޓްރެކްޓެއް ހުށަހެޅުމާ ގުޅޭ މަޝްވަރާތައް ޕީއެސްޖީން ފަށާފައިވާއިރު، އެ ވާހަކަތަކަށް މާ ބޮޑު ކުރިއެރުމެއް ނުލިބޭ ކަމަށް ފްރާންސްގެ މީޑިއާތަކުން ރިޕޯޓްކުރެ އެވެ.
މި ދަނޑުވަޅުގައި މެސީ ހޯދުމަށް އޭނާގެ ކުރީގެ ކުލަބު ބާސެލޯނާ އިން ބޭނުންވާ ކަމުގެ އަޑުތައް ވެސް ވަނީ ފެތުރިފަ އެވެ. ނަމަވެސް މިކަމުގައި މާ ބޮޑު ހަގީގަތެއް ނެތްކަމަށް މެސީގެ ބައްޕަ ވަނީ ބުނެފަ އެވެ.
މެސީގެ ކޮންޓްރެކްޓްގެ ވާހަކަތަކާ ބެހޭ އަޑު ގަދަވެފައިވާ މި ދަނޑިވަޅުގައި ޕީއެސްޖީގެ ބްރެޒިލް ތަރި ނޭމާ ވެސް ވިއްކާލަން ކުލަބުން ބޭނުންވާ ކަމަށް ރިޕޯޓްތައް ބުނެ އެވެ. މި ރިޕޯޓްތައް ބުނާ ގޮތުން އެކުލަބުން މި ސީޒަނަށް ފަހު ވިއްކާލަން ބޭނުންވާ ކުޅުންތެރިންގެ ލިސްޓުގައި ނޭމާ ހިމެނެ އެވެ.
މި ރިޕޯޓްތަކާ ގުޅޭގޮތުން ނޭމާ ބުނީ އޭނާ ޕީއެސްޖީގައި ހުރީ އުފަލުން ކަމަށާއި، އެ ކުލަބާ އެކު ހަދާފައިވާ ކޮންޓްރެކްޓަށް ފުރިހަމަ އަށް އިހުތިރާމް ކުރަން ބޭނުންވާ ކަމަށް އޭނާ ބުންޏެވެ.
މީގެ ހަ ވަރަކަށް އަހަރު ކުރިން، 2017 ވަނަ އަހަރު ދުނިޔޭގެ ރެކޯޑް ޓްރާންސްފާ ފީއެއް ކަމަށްވާ، 242 މިލިއަން ޑޮލަރަށް ސްޕެއިންގެ ބާސެލޯނާ އިން ޕީއެސްޖީ އަށް ބަދަލުވި ނޭމާ އެންމެ ފަހުން އާ ކުރި ޕީއެސްޖީގެ ކޮންޓްރެކްޓާ ހަމަވާނީ 2027ގަ އެވެ.
ނޭމާ ބުނީ އޭނާގެ ފޯކަސް ހުރީ ޕީއެސްޖީގެ އަމާޒުތައް ހާސިލްކުރަން ކަމަށާއި، ކުލަބުން އޭނާ ވިއްކާލަން ބޭނުންވާ ވާހަކަ މީޑިއާތަކުން ރިޕޯޓް ކުރިޔަސް އެ ކަމަށް ފަރުވާލެއް ނެތް ކަމަށެވެ.
ބެލެވޭ ގޮތުގައި ޕީއެސްޖީ އިން ނޭމާ ވިއްކާލަން ބޭނުންވަނީ އޭނާގެ އަނިޔާގެ މައްސަލަތައް ގިނަ ކަމުންނެވެ. މުހިންމު މެޗުތަކުގެ ކުރިން ނޭމާ އަށް އަނިޔާވާތީ އެ ކުލަބަށް ބައެއް މުބާރާތްތަކުގައި ގިނަ އުނދަގޫތަކާ ދިމާވާ ކަމަށް ރިޕޯޓްތައް ބުނެ އެވެ.
މި އަހަރު ވެސް ޔުއެފާ ޗެމްޕިއަންސް ލީގުގެ މުހިންމު މެޗެއް ކުރިއަށް އޮތްއިރު މި ވަގުތު ވެސް ނޭމާ ހުރީ އަނިޔާގަ އެވެ. އެންމެ ފަހުން ލީގުގައި ކުޅުނު މެޗުގައި ފައިގެ ކުޑަ ހުޅަށް ލިބުނު އަނިޔާގެ ސަބަބުން ނޭމާ އަށް ޗެމްޕިއަންސް ލީގުގެ ދެވަނަ ބުރުގައި ބަޔާން މިޔުނިކާ ދެކޮޅަށް ކުޅޭ ދެ ވަނަ ލެގުގައި ނުކުޅެވޭނެ ކަމަށް ބެލެވެ އެވެ. ފުރަތަމަ ލެގުގައި ޕީއެސްޖީ އަމިއްލަ ދަނޑުގައި ވަނީ ބަލިވެފަ އެވެ.
ނޭމާ ވިއްކާލަން ކީ ނަމަވެސް ޕީއެސްޖީ އަށް އިތުރު ގޮންޖެހުންތަކެއް އެބަހުއްޓެވެ. އެއީ އޭނާ އަށް މިވަގުތު ޕީއެސްޖީ އިން ދެމުން އަންނަ މުސާރަ ކަމަށްވާ ހަފްތާ އަކު ހަތް ލައްކަ ޑޮލަރު ދެވޭނެ ވަރުގެ މާލީ ތަނަވަސްކަންހުރި ކުލަބުތައް މަދުވުމެވެ.
މި ވަގުތު ޔޫރަޕްގައި އޮތް ކުލަބުތަކަށް ބަލާއިރު އެވަރުގެ މުސާރައެއް ދެވޭނެކަމަށް ބެލެވެނީ ދެ ކުލަބަކަށެވެ. އެއީ އިނގިރޭސި ދެ ކުލަބު ކަމަށްވާ ޗެލްސީ އާއި ނިއުކާސަލް ޔުނައިޓެޑެވެ. މި ދެ ކުލަބުގެ ތެރެއިން ޗެލްސީ އިން ނޭމާ ގަތުމަށް ޝައުގުވެރިކަން ހުރި ކަމަށް އިނގިރޭސި ނޫސްތަކުން ބުނެ އެވެ.
