ދިވެހިންނަކީ ޒަމާނުއްސުރެއް ކުޅިވަރަށް ހާއްސަ ލޯތްބެއް ޖެހިފައިވާ ބައެކެވެ. ދުނިޔޭގެ އެކި ކަންކޮޅުތަކުގައި ކުރިއަށްދާ ކުޅިވަރު މުބާރާތްތައް ޖޯޝާއި ފޯރީގައި ބަލަމުންދާ ބައެކެވެ. ދާދި ފަހުން ނިމިގެންދިޔަ ފީފާ ކްލަބް ވޯލްޑް ކަޕާއި ޕްރިމިއާ ލީގާއި ލަލީގާ ފަދަ ފުޓުބޯޅަ މުބާރާތްތަކަކީ ވަގުތު ހުސްކޮށްގެން އެއްވެސް މެޗެއް ގެއްލުވާނުލައި ދިވެހިން ބަލަމުންގެންދާ މުބާރާތްތަކެވެ.
އެ މުބާރާތްތައް ދިވެހި ސިޓިން ރޫމްތަކުގައި އާއިލާއާއި އެކުވެރިންނާއެކު ތިބެ ބަލާލެވޭނެ މަގުފަހިކޮށްދިނުމަށް މީޑިއާނެޓުން ބުރަ މަސައްކަތްތަކެއް ކުރެ އެވެ. އެގޮތުން މިފަހަރު މީޑިއާނެޓުގެ މިސްރާބު ހުރީ ދިވެހިންނާ ހަމައަށް ކްރިކެޓުގެ ފޯރި ގެނެސްދިނުމަށެވެ. އިންޑިއަން ޕްރިމިއާ ލީގު ނުވަތަ އައިޕީއެލްގެ އަންހެން އަދި ފިރިހެން މުބާރާތް ދިވެހިންނަށް މި މާޗު މަހު ފެނިގެންދާނެ ކަމަށް މީޑިއާނެޓުން މައުލޫމާތު ދެއެވެ.
ދެހާށް އަށްވަނަ އަހަރު ބޯޑް އޮފް ކޮންޓްރޯލް ފޯ ކްރިކެޓް އިން އިންޑިއާ (ބީ.ސީ.ސީ.އައި) އިން އިސްނަގައިގެން އިފްތިތާހު ކުރި އިންޑިއަން ޕްރިމިއާ ލީގަކީ ކުރިކެޓުގެ ދުނިޔޭގައި ކުޅޭ އެންމެ ފޯރިގަދަ މުބާރާތްކަމާމެދު ޝައްކެއް ނެތެވެ.
އައިޕީއެލްގެ 15 ވަނަ މުބާރާތް މިއަހަރު ބޭއްވުމަށް ތައްޔާރުވަމުން އަންނައިރު، އެ މުބާރާތް އާ ހަރުފަތަކަށް ގެންދިއުމަށް މުބާރާތް އިންތިޒާމު ކުރާ ފަރާތްތަކުން ވަނީ ނިންމާފަ އެވެ. އެގޮތުން މިއަހަރަކީ އަންހެނުންގެ އައިޕީއެލް ބޭއްވޭ ފުރަތަމަ ފަހަރެވެ.
މާޗު މަހުގެ 26 ވަނަ ދުވަހުގެ ނިޔަލަށް ކުރިއަށްދާ ވިމެންސް އައިޕީއެލްގައި ފަސް ޓީމެއް ވާދަކުރާނެ އެވެ. އެއީ ފިރިހެނުންގެ އައިޕީއެލްގައި ވެސް ވާދަކުރާ ފްރެންޗައިޒް ޓީމުތަށް ކަމަށްވާ ގުޖުރާތު ޖަޔަންޓްސްއާއި މުމްބާއީ އިންޑިއަންސްއާއި ރޯޔަލް ޗެލެންޖާސް ބެންގަލޯއާއި ޑެލީ ކެޕިޓަލްސްގެ އިތުރުން ހަމައެކަނި އަންހެން ބައިގައި ވާދަކުރާ ޔޫޕީ ވޮރިއާޒް ޓީމެވެ.
އެ މުބާރާތަށް ޓީމުތައް އެކުލަވާލުމުގެ ގޮތުން ބޭއްވި އޯކްޝަން، ހުސްވި ހަފުތާގައި ވަނީ ބާއްވާފަ އެވެ. އެ އޯކްޝަނުގައި ދުނިޔޭގެ ނަން މަޝްހޫރު އަންހެން ކުރިކެޓު ކުޅުންތެރިން ބޮޑު އަގުގައި އެކި ޓީމުތަކަށް ވަނީ ގެންގޮސްފަ އެވެ. އޭގެ ތެރޭގައި އިންޑިޔާގެ ކުޅުންތެރިންގެ އިތުރުން ދުނިޔޭގެ އެކި ގައުމުތަކުގެ އެންމެ ހުނަރުވެރި ކުޅުންތެރިން ވެސް ހިމެނެ އެވެ.
މުބާރާތުގައި ބައިވެރިވާ ފަސް ޓީމަށް އަވަސް ކަޅިއެއް
ގުޖުރާތު ޖަޔަންޓްސް
ގުޖުރާތު ޖަޔަންޓްސްއަކީ ފާއިތުވި އަހަރުގެ ފިރިހެން އައިޕީއެލް ޗެމްޕިއަންކަން ހޯދި ގުޖުރާތް ޓައިޓަންސްގެ އަންހެން ޓީމެވެ. އެ ޓީމުންވަނީ މުބާރާތަށް ބޮޑެތި ހަރަދުތަކެއް ކޮށްފަ އެވެ. އެގޮތުން 32 މިލިއަން ރުޕީޒްއަށް އޮސްޓްރޭލިއާގެ ހުނަރުވެރި އޯލްރައުންޑާ އޭޝްލީ ގާޑްނާ ވަނީ އެޓީމަށް ގެންގޮސްފަ އެވެ. އޭޝްލީ އަކީ އޯކްޝަންގައި ދެވަނައަށް އެންމެ އަގުބޮޑުކޮށް ޓީމަކުން ގަތް ކުޅުންތެރިޔާ އެވެ. އޭގެއިތުރުން ދުނިޔޭގެ ޓީ20 ރޭންކިންގް ދެވަނަ ކުޅުންތެރިޔާގެ މަގާމުގައި ހުރި އޮސްޓްރޭލިއާގެ ބެތު މޫނީވެސް މި މުބާރާތުގައި ފެނިގެންދާނީ ގުޖުރާތު ޖަޔަންޓްސް އިންނެވެ.
މުމްބާއީ އިންޑިއަންސް
އައިޕީއެލްގެ ތަށި ފަސް ފަހަރު ހޯދާފައިވާ މުބާރާތުގެ އެންމެ ކާމިޔާބު ޓީމު މުމްބާއީ އިންޑިއަންސްއަކީ އިންޑިއާގެ އެންމެ މުއްސަނދި އާއިލާ ކަމުގައިވާ އަމްބާނީސްގެ ޕްރެންޗައިޒް އެކެވެ. 32 މިލިއަން ރުޕީޒްއަށް އުމުރުން 30 އަހަރުގެ އިނގިރޭސި ކުޅުންތެރިޔާ ނެޓެލީ ސްކިވާ ވަނީ މުމްބާއީ އިންޑިއަންސް ޓީމާއި ގުޅިފައެވެ. ނަމަވެސް މި ޓީމުގައި އެންމެ ފާހަގަކޮށްލެވެނީ މުބާރާތް ބާއްވާ ގައުމު އިންޑިއާގެ އަންހެން ކުރިކެޓު ޓީމުގެ ކެޕްޓަން ހަރްމަންޕްރީތު ކޯރް އެވެ. ޓީ20 ފޯމެޓުގައި 2،956 ލަނޑު އިންޑިއާ ޓީމަށް ހަދާފައިވާ ކޯރްގެ ލީޑަޝިޕަކީ ޓީމަށް އެންމެ މުހިއްމު އެއް ކަންތައް ކަމުގައި ޓީމުގެ އޯނަރުން އޯކްޝަންއަށް ފަހު ބުނެފައިވެ އެވެ.
ރޯޔަލް ޗެލެންޖާޒް ބެންގަލޯ
އިންޑިއާގެ އެންމެ ހުނަރުވެރި އަންހެން ކުރިކެޓު ކުޅުންތެރިޔަކީ ސްމްރިތީ މަންދަނާކަމާ މެދު ދެބަސްވާނެ މީހަކު އިންޑިއާގައި ވެސް ވަރަށް މަދުވާނެ އެވެ. ސްމްރިތީއަކީ މި މުބާރާތުގައި ކުޅޭނެ އެންމެ އަގުބޮޑު ކުޅުންތެރިޔާ އެވެ. އާރްސީބީ އިން ސްމްރިތީގެ ސޮއި ހޯދާފައިވަނީ 34 މިލިއަން ރުޕީޒްއަށެވެ. މި ޓީމަކީ ދުނިޔޭގެ އެންމެ ނަން މަޝްހޫރު ކުރިކެޓު ތަރިންގެ މައްޗަށް އެކުލެވިގެންވާ ޓީމެކެވެ. އޭގެ ތެރޭގައި ސައުތު އެފްރިކާގެ ޑޭން ވެން ނިއެކޭކްއާއި އިނގިރޭސި ކުޅުންތެރިޔާ ހެދާ ނައިޓް އަދި އިންޑިއާގެ ރިޗާ ގޯޝް ފާހަގަކޮށްލެވެ އެވެ. ގިނަ ބަޔަކު ބުނާގޮތުގައި މި މުބާރާތުގެ އެންމެ ވަރުގަދަ ސްކޮޑެއް އެކުލަވާލާފައިވަނީ މި ޓީމުންނެވެ.
ޑެލީ ކެޕިޓަލްސް
އިންޑިއާގެ ވެރިރަށް ދިއްލީއަށް ނިސްބަތްވާ ޑެލީ ކެޕިޓަލްސް ޓީމުންވަނީ އިންޑިއާގެ ޒުވާން ގިނަ ކުޅުންތެރިންގެ ސޮއި ހޯދައިފަ އެވެ. އޭގެ ތެރޭގައި ޖެމީމާ ރޮޑްރިގޭޒްއާއި ޝެފާލީ ވަރުމާ އަދި ޝިކާ ޕާންޑޭ ފާހަގަކޮށްލެވެ އެވެ. މި ޓީމަށް ގެނެސްފައިވާ އިންޓަނޭޝަނަލް ކުޅުންތެރިންގެ ތެރެއިން އެންމެ ފާހަގަކޮށްލެވެނީ ސައުތު އެފްރިކާގެ އޯލް ރައުންޑާ މަރިޒާން ކެޕް އަދި އޮސްޓްރޭލިއާގެ މެގް ލެނިން އެވެ. މެގް ލެނިން އަކީ މިވަގުތު އޮސްޓްރޭލިއާ އަންހެން ކްރިކެޓް ޓީމުގެ ކެޕްޓަން އެވެ.
ޔޫ ޕީ ވޮރިއާޒް
އައިޕީއެލްއަށް މުޅިން އާ ނަމެއް ނަމަވެސް މި ޓީމަކީ ތަފާތު މޮޅު ކުޅުންތެރިންގެ މައްޗައް ބިނާވެފައިވާ ޓީމެއްކަމަށާއި ޔޫ ޕީ ވޮރިއާޒްއިން މުބާރާތުގެ ތައްޓަށް ވަރުގަދަ ޗެލެންޖެއް ދޭނެ ކަމަށް ގިނަބަޔަކު އިއްތިފާގުވެ އެވެ. ދުނިޔޭގެ ޓީ20 ރޭންކިންގެ އެއްވަނަ ކުޅުންތެރިޔާ ޓާލިއާ މެކްގުރާ ފެނިގެންދާނީ މި ޓީމުންނެވެ. އޭގެއިތުރުން އިންޑިއާގެ އެންމެ މަތިން ރޭންކު ކުރެވިފައިވާ އޯލް ރައުންޑާ ދީޕްތީ ޝަރްމާވެސް މިޓީމުގައި އިސް ރޯލެއް އަދާކުރާނެ އެވެ. ދީޕްތީގެ ސޮއި މިޓީމުން ހޯދާފައިވަނީ 26 މިލިއަން ރުޕީޒްއަށެވެ.
މުބާރާތް ފެށެން މަދު ދުވަސްކޮޅަކަށްވެފައި ވާއިރު، ޓީމުތަކުން ދަނީ ފޯރިއާއި ޖޯޝުގައި ތައްޔާރީތައް ވަމުންނެވެ. މުބާރާތުގެ މެޗުތައް ކުޅޭނީ މުމްބާއީގެ ދެ ސްޓޭޑިއަމް ކަމަށްވާ ޑީ ވައި ޕަޓޭލް ސްޓޭޑިއަމް އަދި ބްރަބޯން ސްޓޭޑިއަމްގަ އެވެ. މުބާރާތް ފަށާ މެޗުގައި ބައްދަލުކުރާނީ ގުޖުރާތު ޖަޔަންޓްސްއާއި މުމްބާއީ އިންޑިއަންސް އެވެ.
މި މުބާރާތުގެ ހުރިހާ މެޗެއް މީޑިއާނެޓުގެ އައިސް ނެޓްވޯކް މެދުވެރިކޮށް ފޯނު އަދި ޓީ.ވީ އިން ލައިވްކޮށް ބަލާލެވޭނެ އެވެ.
